1 Pi tafager rog ni gimed ba t’uf rog, urngin e pi thin ney e keyog Got nra rin’ ngodad! Ere ngad pithiged gadad u urngin ban’en nma alitnag e dowef nge lanin’uy, ma ngad gayed rogon ni ngad pired ni gadad ba thothup, ni aram e ngu’ud pired ni bay madgun Got u wun’dad.

2 Dab kum mitheged lanin’med romad. Ya dawor gu ngongliyed e kireb ngak be’, ma dawor gu kireb niged be’, fa reb e kug ban niged be’ kug feked ban’en rok. 3 Dagur yog e re bugithin ney ni gu be turguy e kireb nga dakenmed; ya bod ni kugog ko som’on, nri gimed ba t’uf romad ni gubin ngiyal’ ma gimed bay u lanin’mad, ndemturug ko gamad ba fos fa gamad ra yin’. 4 Kari pagan’ug ngomed, ma ke felan’ug ngomed! Ku gu be par nib athamgil lanin’ug, ma gub sug ko felfelan’ u fithik’ urngin e gafgow ni gamad be mada’nag.

5 I mus ko ngiyal’ ni gu tawgad riy nga Macedonia ma ku de yag ni gu toffangad. Ya gubin yang ma ug pir’eged e gafgow riy, ma gamad be malu’ag thin e girdi’, ma gamad be rus. 6 Machane Got nma pi’ e athamgil nga laniyan’ e pi’in ke mulan’rad e pi’ e athamgil nga lanin’mad ni bochan Titus ni yib ngomad. 7 Gathi kemus ni bochan e wub ni tay, machane ku bochan murung’agmed ni weliy ngomad u rogon ni mpi’ed e athamgil nga laniyan’. Keyog ngomad rogon ni kam m’ad ni bochan ni manga yugu mu guyed gag, nge rogon nike taganan’med, nge rogon ni kam pired ni kam fal’eged rogomed ni ngam yororgad rog; ere kari gel e felfelan’ ngog e chiney.

8 Yugu ra ke taganan’med ko fa gi babyor ni gu pi’ nge yib ngomed, ma dawori kireban’ug ngay ni kug yoloy. Ku rayag ni nge kireban’ug ni bochan e gi babyor nem ko ngiyal’ ni gu nang nike taganan’med u lan bochi ngiyal’ ni bochan e gi babyor nem. 9 Machane chiney e kug felfelan’ — ni gathi bochan e kug kirebnag an’med, machane bochan e taganan’ ni mu ted e pingeg lanin’med ngam thiliyeged pangimed. Re taganan’ nir ni yib ngomed e maruwel Got ngay, ere dariy e kireb ni kug ngongliyed ngomed. 10 Ya re kireban’ nem ni maruwel Got ngay e ir e piliyeg lanin’med ngam thapgad ngak Got ere dabi kireban’ug ngay! Machane bin nu fayleng e kireban’ e ma fek e yam’ i yib ngodad. 11 Mu guyed e n’en ni rin’ Got ko re kireban’ romed nir: a mu guyed rogon e n’en nike rin’ ngomed kam tedan’med, nge rogon nri gimed ba’adag ni ngam daged e mich ri’ nda mu uned ko kireb! Nge rogon e puwan’ ni mu ted ni bochan e de rin’ be’ e tin nib mat’aw, nge rogon ni magafan’med, nge rogon e leam ni mu ted, nge fanmed yul’yul’, nge rogon ni mu fal’eged rogomed ni ngam gechigniged e en nike ngongliy e kireb! Ma kam daged nda mu uned ko re kireb nem.

12 Ere yugu aram rogon ni gu yoloy e babyor nge yib ngomed ma gu rin’ ni gathi bochan e cha’ ni ngongliy e kireb, ara cha’ nni ngongliy e kireb ngak. Machane gu yoloy ni nggu tamilang nagmed u p’eowchen Got ngarogon fanmed yul’yul’ ngomad. 13 Ireray fan me yib e athamgil nga lanin’mad.

Gathi kemus ni yib e athamgil nga lanin’mad; ya ri ba ga’ e felfelan’ ni pi’ Titus ngomad ko felfelan’ nike tay u rogon ni mu ayuweged ni gimed gubin nge felfelan’. 14 Kug weliy murung’agmed ngak ni gub felan’ ngay, ma dawor mu t’ared lanin’ug. Gubin ngiyal’ ni tin nib riyul’ e kug weliyed ngomed. Ere aram rogon ni thimed ni kug weliyed ngak Titus ni gamad ba felan’ ngay e ke m’ug nib riyul’. 15 Ri gimed ba t’uf rok ya ka manang rogon ni gimed gubin ma mpired ni kam fal’eged rogomed ni ngam folgad ko tin ni yog, nge rogon ni yib ngomed mi gimed t’ufeg u fithik’ e tamdag nge marus. 16 Kari gu felfelan’ ni fan e rayag ni gu toer ngomed!