1 Gimed e pi’in bay e sib romed, mu ngongliyed e tin nib mat’aw ma bfel’ ngak e sib romed. Dab mpaged talin ni ku errogon gimed ni bay be’ u tharmiy ni ir e suwon gimed.

2 Dab mpaged e meybil, mu tiyan’med ko ngiyal’ ni gimed be meybil riy, ma gimed be pining e magaer ngak Got. 3 Mu ku um yibiliyed gamow, nge bing Got e kanawo’ ngomow nge yag ni gu machib nigew e thin rok ngak e girdi’, ma gamow weliy e tin immoy nda nnang ni murung’agen Kristus. Ya ireray fan ni gu bay u kalbus e chiney. 4 Ere mmeybilgad nge yag ni gu weliy murung’agen nib tamilang, nrogon nthingar gu rin’.

5 Um gonopiyed rogon pangimed ngak e pi’in ndawori mich Jesus Kristus u wun’rad, ma gubin ngiyal’ nra bung rogomed ni ngam weliyed e thin rok Got ngorad mi gimed weliy. 6 Ma gubin ngiyal’ nthingar umogned e thin ngorad ni bfel’ ma bay fan, ma thingar mu nanged rogon ni ngam pi’ed e fulweg nib mat’aw ko tin ke fith be’ nge be’ ngomed.

7 I Tykikus nib t’uf rodad ni walagdad ni girdi’en Kristus, ni ir reb e tapigpig nib yul’yul’ ma gamad nga ta’ab raba’ i maruwel ku Somol, e ir e bayi weliy salpeg ni gubin ngomed. 8 Ireray fan ni kug l’oeg ke yib ngomed, ni nge weliy salapmad ni gamad gubin ngomed nge felfelan’med. 9 Ma ke un Onesimus ngak, ni ir fa’anem ni walagdad ni girdi’en Kristus nrib t’uf rodad ma ba yul’yul’, me ir bigimed. Yow e bay ra weliyew ngomed urngin ban’en ni yibe rin’ u roy.

10 Aristarkus, ni bay rog u kalbus e be ga’ar nge felan’ Got ngomed, ma ku errogon Mark, ni be’ rok Barnabas. (Nike taw e thin riy ngomed faram u rogon ni ngam t’ufeged ko ngiyal’ nra taw ngomed.) 11 I Joshua, ni yima pining Justus ngak, e ku errogon ni be ga’ar nge felan’ Got ngomed. Kemus e dalip i girdi’ nu Israel nra manged girdi’en Kristus ni yad be un ngog ko maruwel ni fan ko gagiyeg rok Got, ma rib ga’ e ayuw ni kar pi’ed ngog.

12 I Epafras, ni gimed nga baraba’ me ir reb e tapigpig rok Kristus Jesus e be ga’ar e nge felan’ Got ngomed. Gubin ngiyal’ nri ma pi’ e meybil romed, nma wenig nagmed ngak Got ni nge ayuwegmed ngam pired ni gimed bmuduwgil me ilal e leam romed nrogon girdi’en Kristus, ma kari muduwgilan’med, ma gimed be rin’ e tin nib m’agan’ Got ngay. 13 Rayag ni nggu mang mich rok ngomed ko maruwel ni be tay nib gel ni fan ngomed, ma fan ko girdi’ nu Laodicea ngu Hierapolis. 14 I togta Luke nrib t’uf rodad, nge Demas e be lungurow e nge felan’ Got ngomed.

15 Mogned ngak e pi’in ni walagdad ni girdi’en Kristus ni yad ma par u Laodicea nge fare pin i Nimfa nge girdi’en e galesiya ni yad ma mu’ulung nga naun rok ni be lungumad e nge felan’ Got ngorad. 16 Gimed ra mu’ i be’eg e re gi babyor ney mi gimed guy rogon ngkun be’eg ngak girdi’en e galesiya nu Laodicea. Mi gimed be’eg e babyor ni bay ni pi’ u Laodicea nge yib ngomed. 17 Me lungumed ngak Arkippus, "Mu guy rogon ngam mu’nag fare maruwel ni kan pi’ ngom ko maruwel rok Somol."

18 Re bugithin ni ba’aray e ri gag Paul e gu yoloy nga pa’ag: Nge felan’ Got ngomed. Dab mpaged talin e chen ni ka nin’ ngog!

I Got e ngi i ayuwegmed.