1 Ma aram mu gu sap bayay nga urngin e tin be buch nde mat’aw u lan e re fayleng ney. Ma pi’in ka ni gafgow nagrad e yad be yor, ma dariy be’ nra aywegrad. Dariy be’ nra aywegrad ni bochan e pi’in ni be gafgow nagrad e yad e bay gelingrad. 2 Me awan’ug ko pi’in karm’ad karanod; kabfel’ wa’athrad ko pi’in kiyad bfos. 3 Machane ri kabfel’ wa’athan e pi’in ndawor ni gargelegrad, ni darguyed e tin nde mat’aw ni be buch u lan e re fayleng ney.

4 Mu ku gu nang ko mangfan nma maruwel e girdi’ nib gel ni nge fel’ rograd: fan e be awan’rad ko tin bay rok e pi’in yad bbuguliyoror. Machane ba m’ayfan. Bod ni yibe lol’oeg e nifeng 5 yad be yog nib balyang be’ nike uchmiy pa’ ngak nge pag ir nge li’ e mak’iy. 6 Dabisiy ni arrogon, machane kabfel’ ni nge yag ngom ni buchuuw, nib gapas lanin’um, ko bin nge thay parwom ni gubin ngiyal’ ni ga be maruwel nga l’agruw raba’ i pa’am, ni ga be guy rogon ni ngam focholiy e nifeng.

7 Ku reb e ban’en ni ku gguy ko yafos nib m’ayfan. 8 Ba’aray be’ nma par rok ni go’ ir. Dariy fak ni pumo’on, fa walagen ni pumo’on, ma maruwel ni gubin ngiyal’, ma der gaman u lanyan’ ko fel’ rogon ni bay rok. Fan ngak mini’ e tinef e maruwel ni aram feni almarin me pag ni da ki un ko felfelan’? Ku ara’ reb nib m’ayfan — ma ba gafgow e par riy.

9 L’agruw e bfel’ ko ta’reb, ni bochan e yow ra peth miyow maruwel ni bfel’ rogon. 10 Fa’anra paraw bagyow me ayweg bagyow nge sak’iynag. Machane fa’anra be’ ni go’ ir nra paraw, ma rib gafgow, ni bochan e dariy be’ nra ayweg. 11 Ma fa’anra yib e garbeb, ma l’agruw ni’ e rayag nra molow nga ta’bang miyow par ni yow ba magwal. Ma urogon ni nge m’ay e ulum rom ni go’ gur? 12 L’agruw ni’ e rayag ni ngar tapngiyew yow u ba cham nike yibnag be’ ma fa’anra ta’bagyow mra waer. Ba yil’ i tal nni ngongliy u dalip yil’ e gaf e ba mo’maw ni nge math’.

13 Kabfel’ rogon be’ nib pagel ni dariy ban’en rok ma ba gonop, ngak be’ nib pilung nike pilbithir ma bbalyang ni der ma fanay e fanow rok be’, 14 ni yug aram rogon ni yan u kalbus nga tagil’ e pilung ara ni gargeleg u tafen nib gafgow. 15 U gu leamnag murung’agen gubin e girdi’ nma par ko re fayleng ney, mu gub gu na’ab ngay nu bang u fithik’rad e bay be’ nika ba pagel riy nra yin’ luwan e en ni pilung. 16 Demturug oren e girdi’ nra gagiyegnag be’ nib pilung; ma nap’an nra chuw ko pilung, ma dariy be’ nra pining e magaer u wan’ ko tin i rin’. Rib m’ayfan. Bod ni be lol’oeg e nifeng.