Ester 2

Ester ni mang Queen

1 Ma fa’ani aw e damumuw rok fare pilung, me par ngi i leamnag e n’en nike rin’ Vashti nge lungun nike wereg nib togopluw ngak fare queen. 2 Ma boch fapi tafanow rok ni yad ba chugur ngak e lungrad ngak, "Mangfan ni dabmog ngan changarnag boch e rugod ni dawor ra nanged e pumo’on ma yad ba pidorang? 3 Rayag ni nge bang e nug u tan gil’ilungum ma ga duwgiliy be’ riy ngamog ngorad ngar feked gubin e rugod nib pidorang i yib ko harem*2:3 HAREM: Naun ko ppin ko an pilung. ni bay u roy u Susa, ni re binaw ni tochuch. Ma ga tayrad nga tan pa’ Hegai, ni fare eunuch ni ir e bmilfan e pi pin rom ngak, nge chamgiyrad ko falay ngari m’ug fel’ngirad. 4 Ma ga mel’eg e re rugod ni ir e th’abi fel’ u wun’um nge yan nga luwan Vashti nge mang queen."

Me felan’ fare pilung ko re bugithin nem, me fol riy.

5 Immoy reb e Jew u rom u Susa ni Mordekai fithingan nib mo’on ni fak Jair; ni reb i girdi’en e ganong rok Benjamin ma ku reb i owchen Kish nge Shimei. 6 Nap’an ni fek Nebukadnezzar ni Pilung nu Babylon i Jehoiakin ni Pilung nu Judah nga Babylon nib kalbus, nib mu’un barba’ i girdi’ ngak ni ku ni kolrad, ma immoy Mordekai u fithik’rad. 7 Immoy be’ ni bpin ni walagen, ya walag e gal labthir rorow, ni Ester fithingan ma fithingan ni Hebrew e Hadassah ni ka ba rugod ma ba pidorang ma rib fel’ i tay kenggin nge rarayen dow. Nim’ rok Ester me fek Mordekai nge chugliy nge ilal me par ni fak.

8 Nap’an ni pag fare pilung lungun ni garer u daken e nam ma bo’or e rugod nni fekrad i yib nga Susa ni bay Ester u fithik’rad. Ester e kun fek ngalan fare naun ni tafen e pilung nga tan pa’ Hegai, ni ir e bmilfan fare tafen e ppin ngak. 9 Ma ba’adag Hegai daken Ester, ma aram mri tiyan’ ngak ngi i ayuweg. Ka ngiyal’nem me tabab Hegai i ngongliy rogon Ester ngan chamgiy ko falay ma ba muduwgil e ggan rok. Me pi’ e bin nth’abi fel’ e senggil ngak u lan fare naun ni tafen e ppin, me tay medlip e ppin nni mel’egrad u rom u tafen e pilung ni ngar pigpiggad ngak.

10 I fol ko n’en ni yog Mordekai ngak ni dabi yog ni ir e ba Jew. 11 Gubin e rran ma yug be cheal Mordekai u lan e yoror ko fare tafen e ppin, ni bochan e ba’adag ni nge nang salpen Ester, me nang ko mang e bay nrin’ ngak.

12 Rogon ni yima ayuweg fapi ppin ni yibe maluk nagrad ko falay ni ngar pidoranggad e reb e duw n’umngin nap’an, nel’ e pul e yima chamgiyrad ko gapgep nge myrrh ma ku nel’ e pul e yima chamgiyrad ko gapgep nge balsam. Ma nga tomuren e aram e yira fekrad ni ta’ta’abgayad i yan ngak Xerxes ni Pilung. 13 Nap’an nra yan bagyad fapi rugod u tafen e ppin ngak fare pilung, ma demturug e re mit i mad ni ba’adag ni nge yin’ mra yag. 14 Ra blayal’ me yan e ngaram me yan i kakadbul riy min fek i yan nga reb e tafen’ e ppin ni Shaashgaz e ba milfan ngak nma ayweg, ireram e re eunuch nib milfan e pi ppin rok e en pilung ngak. Ma aram e dabki yan ko fare pilung bayay, kemus ni fa’anra fare pilung e ba’adag fare pin me yog fithingan mi ni fek i yib ngak.

15 Me taw nga nap’an ni nge yan Ester ngak fare pilung. Ester e ba rugod ni fak Abihail ni labthir rok nge labthir rok Mordekai e yow walag, ma Mordekai e ke pof Ester ni nge fakay; Ester e gubin e girdi’ nra guy maba m’agan’rad ngak. Nap’an ni taw ni nge yan, me chuw ko re mad nike yog Hegai ngak ni nge chuw ngay, ni fare eunuch nib milfan fare tafen e ppin ngak. 16 U lan e re duw ni gaman e medlip e duw ngay nike pilung i Xerxes ko pul ni ragag ni aram e pul ni Tebeth mi ni fek Ester i yan ngak Xerxes ni Pilung ngalan fare naun rok. 17 U fithik’ fapi ppin ma Ester e th’abi adag, ma ir u fithik’ fapi ppin e ri magan’ ngak ma ba’adag daken. Ma aram me tay fare te’elyaw rok le’engin e pilung nga lolugen, me mangnag queen nike yan nga luwan Vashti. 18 Ma aram me yog ni ngan madnomnag Ester me pining gubin e pi tolang ko salthaw rok nge gubin e tolang ko am. Me yog ni ngan toffan*2:18 toffan; ara dab kun pi’ e tax. u ga’ngin gil’ilungun me wereg e tow’ath ni yo’or ni thawon e pilung.

Mordekai ni ayuweg e pogofan rok fare pilung

19 Ma fa’ani mokun bayay fapi rugod nga ta’bang, ma ke par Mordekai nga but’ u langan e garog u tafen e pilung. 20 Ma ka dawori yog Ester ngak be’ ni ir reb e Jew. I yog Mordekai ngak ndabi yog ngak be’, me fol riy nde yog ni bod rogon ni i fol ko ngiyal’ ni i chugliy Mordekai ni kabochi bulyal.

21 Ngiyal’ ni ba’aram ni immoy Mordekai u reb e liw u lan fare tafen e pilung, ma bay l’agruw e eunuch ni Bigthana nge Teresh ni ur matnagiyew langan e mab ni yan ngalan e pi senggil rok fare pilung, miyow damumuw ngak Xerxes ni Pilung miyow makathnag ni ngan thang e fan rok. 22 Me na’ab Mordekai ngay me yog ngak Queen Ester, ma aram me yog Ester ngak e an pilung e n’en nike na’ab Mordekai ngay. 23 Aram min gay marung’agen fare makath mi ni pir’eg nib riyul’, ma aram min uchuliy fa galicha’ ngar m’ow. Me yog fare pilung ni ngan yoloy e pin’ey ni buch ngalan babyoren e pi tayugang’ u tan gil’ilungun.