Ester 7

1 Ma aram me yan fare pilung nge Haman ni ngar abichgad Ester 2 ko yay ni l’agruw ngay. Ma nap’an ni yad be unum e wayin me fith fare pilung Ester bayay ni ga’ar, "Aram e chiney, i gur Queen Ester, mang e ga ba’ adag? Mog ngog mu gu pi’ ngom. Ni mus nga baley u gil’ilungug mu gu ra pi’ ngom."

3 Me fulweg Queen Ester ni ga’ar, "Fa’anra ba m’agan’um ngay i gur Pilung ni ngam pi’ e n’en ni gu be siro’nag ma gu be wenignag ngom, ni dab ni thang e pogofan rog nge girdi’ rog. 4 Gamad e pi girdi’ rog e ka ni pi’mad nchuway’ ni ngan thang e fan romad. Fa’anra mang e kemus ni kan pi’mad ni chuway’ ni bod e sib, ma ku gu th’ab gulngag ndab gu magawon nigem riy; ma biney e ngan thirifmad u but’ mi ni thang owchemad!"

5 Aram me fith Xerxes ni Pilung Ester ni ga’ar, "Mini’ e en nike thiyan’ ma ke leamnag ban’en ni errogon? Bu uw e re mo’on nir?"

6 Me fulweg Esther ni ga’ar, "En ni to’ogor romad, ni ir e be tay thibngimad, e re mo’on ni kireb ney i Haman!"

Me sap Haman ngak fare pilung nge fare queen ni kari rus. 7 Me sak’iy fare pilung ni kari damumuw ngalang, nge chuw u lan fare senggil, nge yan nga wean ngalan e milay’. Ma kenang Haman nike t’ar fare pilung u wan’ ni nge gechignag ni fan e ren’ey, ma aram me par nde yan nga wean ni nge wenig ngak Queen Ester ni nge ayuweg e pogofan rok. 8 Ka fin yigi pag ir nga but’ nga daken ba chiya’ nib n’uw ni bay Ester u daken ni nge wenig ni ngan runguy me sul fare pilung nga senggil nike yib u milay’. Nap’an ni guy fare pilung e n’en ke rin’ Haman, me tolul ni ga’ar, "Mogew, re mo’on ney e nge kol le’engig u roy u p’eowcheg, u lan e naun rog?"

Ma yug nap’an ni non fare pilung ni aram rogon me upunguy fapi eunuch lolugen Haman. 9 Ma aram me ga’ar bagyad ni Harbonah fithingan, "Cha’aney i Haman e ke chamey ba fen e mo’ochol u tafen ni bochan e nge uchuluy Mordekai riy, ni fa’anem ni ayweg e pogofan rom i gur pilung. Re fen e mo’ochol nem e medlip i ragag nge lal e fit tolngin!"

Me ga’ar fare pilung, "Mu uchliyed Haman riy!"

10 Ma aram mi ni uchuliy Haman nge yim’ ko fare fen e mo’ochol nike chamey ni fen Mordekai. Aram me m’ay e damumuw rok fare pilung.