João 18

Jesus nni kol

1 Ma nap’an ni mu’ Jesus ko meybil me un pi gachalpen ngak ngar th’abed fare lul’ ni Kidron fithingan nga baraba’. Ma bay ba chuwo’ i gek’iy u rom nni yung ni yima l’angag fithik’, me yan Jesus nge pi gachalpen ngay. 2 Mi Judas, ni ir e yagnag Jesus, e manang e gin’em, ya ke yo’or yay ni mu’ulung Jesus nge pi gachalpen ngay. 3 Ma aram me yan Judas ko gin’em nike un ba ulung i salthaw ngak nge boch i matanagen e Tempel ni pi’rad e pi tolang ko prist nge pi Farise, ranod ni kar feked talin e cham, nge magal, nge nifiy. 4 Ma manang Jesus urngin ban’en ni bay nrin’ ngak; ma aram me thay ngam’on me ga’ar ngorad, "I mini’ e gimed be gayiy?"

5 Miyad fulweg ni lungurad, "I Jesus nu Nazareth."

Me ga’ar, "I gag ir."

Mi Judas, ni ir e yagnag Jesus e bay u fithik’rad ni yad ba sak’iy. 6 Ma nap’an ni ga’ar Jesus ngorad, "I gag ir," miyad sul nga wuryal miyad thig nga but’. 7 Me fithrad Jesus bayay ni ga’ar, "I mini’ e gimed be gayiy?"

Miyad yog ni lungurad, "I Jesus nu Nazareth."

8 Me ga’ar Jesus, "Ke m’ay i yog rog ngomed ni gag ir, fa’anra i gag e gimed be gayeg, me ere mpaged e tin ni ba’aray e girdi’ ngranod." ( 9 I yog e re bugithin ney ni bochan e nge yib i m’ug nib riyul’ e thin ni fa’ani yog ni ga’ar, "Chitamag, dariy ta’ bagayad fa pi’in ni mpi’ ngog nike malog.")

10 Ma bay ba saydon rok Peter; me girengiy me toy ngak e sib rok fare Prist ni Th’abi Ga’ nge luf e ba’ ni mat’aw i yuwan tel. I Malkus fithingan e re sib nem. 11 Me ga’ar Jesus ngak Peter, "Mu sulweg e saydon rom nga tafen! Ga be finey ndab ku gu unum e n’en ni bay ko fare kap ni aram e gafgow nike pi’ e Chitamag ngog?"

Jesus nni fek nga p’eowchen Annas

12 Me kol fare ulung i salthaw nge en nib tolang rorad nge pi matanagen e Tempel ni girdi’ nu Israel Jesus, miyad m’ag, 13 miyad fek ngak Annas nsom’on, ni ir e chitamngin e re pin nleengin Kaifas, mi Kaifas e ir fare Prist ni Th’abi Ga’. 14 I Kaifas e ir e yog ngak piyu Israel ni kabfel’ ni ta’reb e girdi’ e nge yim’ ni fan ngak urngin e girdi’.

Peter ni mithag ni manang Jesus

15 Me un Simon Peter nge reb i gachalpen Jesus u daken Jesus. Ma bin ba’aram i gachalpen Jesus ni gathi ir Peter e ri manang fare Prist ni Th’abi Ga’ owchen, ma aram me un ngak Jesus ngalan e yoror ko naun rok fare Prist ni Th’abi Ga’. 16 Me par Peter u wuru’ e yoror u to’oben i langan e garog. Ma fa binem i gachalpen Jesus ni fa en ni manang fare Prist ni Th’abi Ga’ owchen e sul nge non ngak ba rugod nib sak’iy u baraba’ i langan e garog, nge mu’ me fek Peter ngar bow ngalan e yoror. 17 Me ga’ar fare rugod nib sak’iy u baraba’ i langan e garog ngak Peter, "Gathi ku gur reb i gachalpen e re mo’on nem?"

Me fulweg Peter ni ga’ar, "Gathi gag."

18 Ma ke ko’reg e pi tapigpig nge girdi’en e matanag ba nifiy ko charkol ni bochan e ba garbeb, kar cholngobiyed ni yad ba sak’iy yad be ror ngay. Me yan Peter i un ngorad ko sak’iy, ngi i ror.

Fare Prist ni Th’abi Ga’ ni i fith boch e de’er ngak Jesus

19 Me fith fare Prist ni Th’abi Ga’ Jesus u murung’agen pi gachalpen nge murung’agen e machib ni be tay. 20 Me fulweg Jesus ni ga’ar, "Urngin ngiyal’ ni gu ma machib ngak urngin e girdi’ u fithik’ e girdi’ ni yo’or; ma urngin e machib ni gu ma tay e gu ma tay u lan tafen e mu’ulung i yan ngu lan e Tempel ko gin nma mu’ulung urngin e girdi’ nu Israel ngay. Dawor gu weliy, ban’en nib mith. 21 Ere mang ni ga be fitheg? Mu fith e girdi’ ni ur rung’aged e thin ni ug weliy. Mu fithrad ko n’en ni kug weliy ngorad — ya yad manang e n’en ni u gog."

22 Fa’ani yog Jesus e re bugithin ney, me batnag reb fapi matanag Jesus me ga’ar ngak, "I di’in ma kamnon ngak e en ir e Prist ni Th’abi Ga’ ni errogon!"

23 Me fulweg Jesus ngak ni ga’ar, "Fa’anra kugog ban’en nib kireb, me ere mog nge rung’ag urngin e girdi’ ni yad bay u roy e n’en ni kugog. Ma fa’anra gub mat’aw ko n’en ni kugog, me ere mang ni kam bat nigeg?"

24 Ma aram me pi’ Annas Jesus ni kabay e m’ag rok ngan fek i yan ngak Kaifas, ni fare Prist ni Th’abi Ga’.

Peter ni ki mithag bayay ni manang Jesus

25 Ka bay Peter u rom ni kab sak’iy ni be ror. Me fith e tin ni ba’aram e girdi’ ngak ni lungurad, "Gathi gur reb i gachalpen e re mo’on nem?"

Me mithag Peter ni ga’ar, "Danga’, gathi gag."

26 Ma reb fapi sib rok fare Prist ni Th’abi Ga’, ni be’ rok fare mo’on ni luf Peter yuwan tel e non ni ga’ar, "Gathi gur e gguyem ni gimew ko fa gin’en ni bay fare chuwo’ i gek’iy riy nni yung?"

27 Miki ga’ar Peter bayay, "Danga’ " — ma ka chingiyal’nem me chochol ba nimen.

Jesus nni fek nga p’eowchen Pilate

28 Ri kab kadbul miyad fek Jesus u tafen Kaifas nga tafen e en ni ir e am. Ma de yan piyu Israel ngalan fare naun ntafen e am ni be’ u Roma, ya yad ba’adag ni ngar pired ni yad bbe’ech u yalen e Motochiyel rorad, ni bochan e nge yag nra uned i kay e ggan ko madnom ni Paluk’af. 29 Ma aram me yan Pilate nga wuru’ e naun ngar mada’gad me ga’ar ngorad, "Mang e ke bucheg e re mo’on ney?"

30 Miyad fulweg ni lungurad, "Fa’an mang e dawori ngongliy ban’en nrib kireb ma dab gu feked i yib ngom."

31 Me ga’ar Pilate ngorad, "Mfeked ngam pufthin niged u rogon yalen e motochiyel romed."

Me fulweg fapi cha’ ni lungurad, "Dawor nni pi’ mat’awmad ni nge yag ni gu li’ed be’ ngem’." ( 32 Me yodoroy ni fan e nge yib i m’ug nib riyul’ e tin nike yog Jesus ko re ngiyal’ i n’en ni ba’aram ni fa’ani i weliy e mit i yam’ ni nge tay.)

33 Me sul Pilate ngalan e naun me pining Jesus. Me fith Pilate Jesus ni ga’ar ngak, "I gur fare pilung rok piyu Israel fa danga’?"

34 Me fulweg Jesus ngak ni ga’ar, "Re bugithin nir ni kam fith ngog e gur e yib ko leam rom ara yugu boch e girdi’ e kar weliyed murung’ageg ngom?"

35 Me fulweg Pilate ni ga’ar, "Ga be finey ni gu be’ u Israel? Girdi’ ko nam rom nge pi tolang ko prist rorad e kar pi’ed gur ngog. Ere be mang e kam rin’?"

36 Me ga’ar Jesus, "Gin nsuwog e dariy u roy u fayleng; fa’an mang e gin nsuwog e bay u roy u fayleng mra cham e tirog e girdi’ ni nge dabiyag nni koleg ngan pi’eg ngak piyu Israel. Gin nsuwog e dariy u roy u fayleng!"

37 Ma aram me fith Pilate ngak ni ga’ar, "Ere gur be’ ni gab pilung?"

Me fulweg Jesus ni ga’ar, "Kamog ni gag be’ ni gub pilung. Ni gargel nigeg ngaray nga fayleng ni bochan e nggu weliy murung’agen e tin riyul’. En ni girdi’en e tin riyul’ e ra rung’ag e thin ni gu be yog."

38 Me fith Pilate ni ga’ar, "Mang e tin riyul’?"

Jesus nturguy ni ngan li’ ngem’

Ma aram me sul Pilate ngak yu Israel nga wuru’ e naun me ga’ar ngorad, "Dawor gu pir’eg tapgin ni ngan turguy e gechig rok. 39 Machane rogon yalmed e gu ma pag ta’reb e kalbus ko chirofen ni madnom ko Paluk’af. Ere gimed ba’adag ni nggu pag fa en ni pilung rok piyu Israel?"

40 Miyad fulweg ngak u fithik’ e tolul ni be lungurad, "Danga’, gathi ir! I Barabbas e gamad ba’adag ni ngam pag!" (Mi Barabbas e ba moro’ro’ ntacham.)