1 Me reb e Sabbath ni be yan Jesus u fithik’ e woldug ni wheat ni aram e pin’en ni yima ngongliy nge mang flowa. Me tabab pi gachalpen i t’ar wom’ngin boch fapi woldug ngu’ur alilngiyed ngu’ur ked. 2 Me ga’ar boch e Farise, "Mangfan ni gimed be rin’ e tin keyog e Motochiyel rodad ndabiyag ni ngan rin’ ko chirofen ni Sabbath?"

3 Me fulweg Jesus ngorad ni ga’ar, "Dawor mbe’eged murung’agen e n’en ni rin’ David ko ngiyal’ ni yib e bilig riy ngak nge pi’in yad be un ngak? 4 I yan ngalan e naun rok Got, me fek fare flowa ni kan pi’ ngak Got, nge kay miki pi’ ngak e pi’in yad be un ngak. Machane ba togopluw ko Motochiyel rodad ni nge kay yugu be’, ya kemus ni pi prist e yad ra kay."

5 Me ul ul Jesus ngay nge ga’ar, "En ni Fak e Girdi’ e ir e Somol ko Sabbath."

6 Me taw nga reb e Sabbath me yan Jesus ngalan reb e tafen e mu’ulung nge machib. Ma bay be’ nib mo’on riy nib marwoth e ba’ ni mat’aw i pa’. 7 Ma boch e tamchib ko Motochiyel nge pi Farise e ur fineyed ni gomanga yigi yib tapgin nge yag ni rogned ban’en nib kireb nike rin’ Jesus; ma aram miyad yip’ e damit ngak ngar guyed ko ra golnag be’ ko liliy ko chirofen nem ni Sabbath fa danga’. 8 Machane manang Jesus e n’en ni yad be leamnag me ga’ar ngak fa’anem nib marwoth baraba’ i pa’, "Mu sak’iy nga mub aray ngam’on." Me sak’iy fare mo’on me yan i par nib sak’iy ko fa gin’em. 9 Me ga’ar Jesus ngorad, "Nggu fithmed: Mang e ma pagdad e Motochiyel rodad ngad rin’ed ko chirofen ni Sabbath? Ngan ayuweg e girdi’ fa ngan gafgow nagrad? Ngan ayuweg e pogofan ku be’ fa ngan thang?" 10 Me ere i changar Jesus u owcherad i yan, me ga’ar* ngak fare mo’on, "Mu k’iyag pa’am." Me rin’ ni aram rogon, me manigil pa’ nge sul ngarogon.

11 Me yib e damumuw ngorad nib gel miyad tabab i puruy’nag u fithik’rad e n’en ni ngar rin’ed ngak Jesus.

12 Re ngiyal’ i n’em e yan Jesus nga daken bburey ni nge meybil, me par u rom ni reb e neap’ ni be meybil ngak Got. 13 Ma fa’ani rran me pining pi gachalpen ngarbad ngak me mel’eg ragag nge l’agruw i yad u fithingrad, me tunguy fithingrad ni apostel, 14 ni pi cha’nem e aram Simon (ni ir e ki tunguy ngachalen ni Peter) nge walagen Peter ni Andrew; nge James nge John, nge Filip nge Bartholomew, 15 nge Matthew nge Thomas, nge James ni Alfeus e chitamngin, nge Simon (ni yima pining e en nma tiyan’ ko nam rok ngak), 16 nge Judas ni James e chitamngin, nge Judas Iskariot, ni pig nge yagnag Jesus.

17 Marbad e pi apostel u daken e burey nga but’, me yib i sak’iy Jesus nga daken e tagapas, ni yad boch i gachalpen ni pire’. Ma bay e girdi’ u rom ni pire’ ni pire’ nike mu’ulung, ni girdi’ ni yib u gubin yang u Judea, ngu Jerusalem, nge pi binaw nu Tyre ngu Simon nib chugur ko day; 18 ni karbad ni ngar motoyilgad ngak me chuweg e liliy rorad. Ma pi’in be gafgow nagrad e mo’onyan’ e ku rabad ngak nge gol nagrad. 19 Ma gubin e girdi’ nra guyed rogon ni ngar mathgad ngak, ya be yan gelngin nga wuru’ i downgin be chuweg e liliy rorad ni yad gubin.

20 Me sap Jesus ngak pi gachalpen me ga’ar ngorad:

"Ngam felan’gad e pi’in gimed ba gafgow, ya gin nsuwon Got e tafenmed!

21 "Ngam felan’gad e pi’in gimed be yim’ ko bilig e chiney;

ya bay mu fosgad!

"Ngam felan’gad e pi’in gimed be yor e chiney,

ya bay um minmingad!

22 "Ngam felan’gad ko ngiyal’ nra fanenikaymed e girdi’ riy, ngar chuweged gimed u fithik’rad, miyad yog e thin nib kireb ngomed, miyad yog ni gimed ba kireb, ni bochan e en ni Fak e Girdi’! 23 Ra ni yodoro’ nagmed, ma ngari mu felfelan’gad, ngam oggad ngalang ko felfelan’, ya bay labgen ni ba ga’ ni fanmed ni kan tay u tharmiy. Ya pi chitamangirad e ku er e n’en ni ur rin’ed ngak e pi profet.

24 "Ma kam gafgowgad e pi’in pire’ ban’en romed e chiney;

ya kam mu’gad ko fel’ rogon!

25 "Kam gafgowgad e pi’in gimed be fos e chiney;

ya bay mm’ad ko bilig!

"Kam gafgowgad e pi’in gimed be minmin e chiney;

ya bayi kireban’med ngu’um yorgad!

26 "Kam gafgowgad ni fa’anra gubin e girdi’ ma gimed bfel’ u l’ugunrad; ya pi chitamangirad e ireram e pi thin ni urogned u murung’agen e pi profet ni yigo’ bogi ban’en.

27 "Machane nggog ngomed e pi’in gimed be motoyil ngog, ni nge t’uf romed e pi to’ogor romed, mu ngongliyed e tin ni bfel’ ngak e pi’in ndaburad dakenmed, 28 mu yibiliyed ngak Got ni nge ayuweg e pi’in kar yibiliyed gimed ni nge buch ban’en romed, mi gimed yibiliy ngak Got ni nge ayuweg e pi’in yad be ngongliy e kireb ngomed. 29 Fa’anra batnag be’ baraba’ i linglingim, ma ga pag ngki batnag e ba’ ni kabay; fa’anra fek be’ wuru’ e mad rom, ma ka ga pag nge fek kenggin e mad rom. 30 Mpi’ed ngak urngin e girdi’ ni yad be ning ban’en ngomed, ma fa’anra fek be’ e tirom gur be’, ma dab ku mog ngak ni nge fulweg ngom. 31 Mu rin’ed ngak boch e girdi’ e tin ni ir e gimed ba’adag ni ngar rin’ed ngomed.

32 "Fa’anra kemus ni girdi’ ni gimed ba t’uf rorad e yad ba t’uf romed, ma mang ni gimed be finey nra fal’eg Got wa’athmed riy? Ya mus ngak e pi’in yad ba tadenen ma ba t’uf rorad e pi’in yad ba t’uf rorad! 33 Ma fa’anra kemus ni pi’in yad ma rin’ e tin ni bfel’ ngomed e ngam rin’ed e tin ni bfel’ ngorad, me ere mang ni gimed be finey nra fal’eg Got wa’athmed riy? Ya mus ngak e pi’in nib tadenen ma yad ma rin’ ni errogon! 34 Fa’anra yib be’ i ning ban’en ngak bigimed ni nge maruwel ngay nge mu’ me fulweg, me pi’ ngak ni bochan e manang nra fulweg fa’anem ngak, me ere mang ni gimed be finey nra fal’eg Got wa’athmed riy? Mus ko pi’in ntadenen ma yad ma pi’ ban’en ngak e pi’in ntadenen ni fan e yad manang ni rogon oren e tin nra pi’ed e aram urngin e tin ni bay ni fulweg ngorad! 35 Aram e danga’! Nge t’uf romed e pi to’ogor romed mi gimed rin’ e tin ni bfel’ ngorad; ra ning be’ ban’en ngomed ni nge maruwel ngay mi gimed pi’ ma dab mu leam niged ban’en ni nge pi’ riy ngomed. Ya bay labgen ni ba ga’ nra fulweg Got ngomed, ma gimed pifak Got nib Th’abi Tolang. Ya Got e ba gol ngak e pi’in ndarir pininged e magaer ngak nge pi’in nib kireb. 36 Ere um runguyed e girdi’, ni bod rogon e Chitamangimed nma runguy e girdi’."

37 "Dab mu turguyed e kireb nga daken be’, ma aram e dabi turguy Got e kireb nga dakenmed; dab mu turguyed e gechig rok be’, ma aram e dabi turguy Got e gechig romed; mu n’iged fan u wun’med e kireb nike ngongliy be’ ngomed, me n’ag Got fan u wan’ e kireb ni kam ngongliyed. 38 Mu golgad ngak e girdi’ me gol Got ngomed: nra pi’ ngomed nge yan i mus ngarogon e fol riy u wan’, nra map’ nga pa’med ni pire’ — nge sugsug pa’med riy. Ya re fol ni ga ra pi’ ngak be’ e ireram e re fol nra pi’ Got ngom."

39 Me yog Jesus ngorad e re fanathin ni ba’aray ni ga’ar, "Be’ nib malmit e dabiyag ni nge pow’iy reb e malmit; ya fa’anra rin’, ma yow l’agruw ni yow ra mul ngalan wol’ e ran. 40 Dariy be’ ni yibe sukulnag nib tolang ngak e en ni ir e be fil ban’en ngak; machane gubin e girdi’ ni yibe sukulnagrad e fa’anra mu’nag bagayad e sukul ni yibe tay ngak, ma aram e ke bod rogon e cha’ ni ir e be sukulnag.

41 "Mangfan nib m’uth owchem nga ba tabyu’ ni bay u lan mit be’ ni walagem, machane damur tiyan’um nga ba ley i gek’iy ni bay u lan owchem? 42 Ere ra di’in me lungum ngak walagem, Mu son, nggu chuweg e re tabyu’ ni be’er u lan owchem, machane damur guy fare ley i gek’iy ni bay u lan owchem? Ere gur e cha’ ni ga be dake modingnigem! Som’on e ngam chuweg fare ley i gek’iy u lan owchem, nge mu’ ma aram e rayag ni mu guy ban’en ngam chuweg fare tabyu’ ni bay u lan owchen be’ ni walagem."

43 "Ba ke gek’iy ni bfel’ rogon e der ma k’uf nib kireb wom’ngin, ma ba kaen nib kireb rogon e derma k’uf ni bfel’ wom’ngin. 44 Ya urngin kaen e gek’iy ma yima poy u wom’ngin; ya danir t’ar e fig u l’ugun nochi ke gek’iy ni bay rachangalen, ara nt’ar e grape u nochi ke gek’iy nib makenken. 45 Be’ ni bfel’ e ma fek e tin ni bfel’ ko pin’en nib manigil nike kunuy nga laniyan’; ma be’ nib kireb e ma fek e tin nib kireb ko tin nib kireb ban’en nike kunuy nga laniyan’. Ya ra be’ ma be yog l’ugun e pin’en nib sug u laniyan’."

46 "Mangfan ni gimed be piningeg ni be lungumed Somol, Somol, ma damur rin’ed e tin ni gu be yog ngomed? 47 Gubin e girdi’ ni yad be yib ngog ngar rung’aged e thin ni gu be yog miyad par ni yad be fol riy — e nggu dag ngomed rogorad. 48 Yad bod be’ nib mo’on ni toy ba naun ni ba’aray rogon: i fu’og e but’ nib to’ar nge yan i sunumeg e def ko fare naun nga daken e war. Me sugubur e lul’ nge yib e ran riy nga daken e binaw nge yib ko fare naun ma de yag ni nge mithmitheg, ni bochan e bfel’ rogon ntoy. 49 Machane en ni rung’ag e thin rog ma de fol riy e bod be’ ni toy ba naun nga daken e but’ nde ngongliy e def riy; ma fa’ani sugubur e lul’ nge yib e ran nga daken e binaw nge yib ko fare naun me buthug ni ka chingiyal’ nem — me puth nrib ga’ lingan!"