Marcos 7

Thin ni i machibnag pi chitamangiy

1 Me mu’ulung e pi Farise nge boch e tamchib ko Motochiyel ngak Jesus nrabad u Jerusalem. 2 Miyad guy boch pi gachalpen Jesus ni yad be abich nde be’ech pa’rad, ni fan e ren’em e bochan e dar luk niged pa’rad nrogon nike yog e pi Farise ni nge rin’ e girdi’.

3 (Ya pi Farise nge urngin piyu Israel e yad be fol ko tin ni af rok pi chitamangirad ngorad: dab ra abichgad ni fa’anra dab ra luk niged pa’rad nrogon yalen ni yima lukuy pa’ay, 4 fa ra ked ban’en ni yib u market ni fa’anra dar luk niged ko som’on.*7:4 ban’en ni yib u market ni fa’anra dar luk niged ko som’on; ara ban’en ni woran e market ni fa’anra dar luk niged ko som’on. Ma ku bo’or yugu boch yalrad nike af rok pi chitamangirad ngorad ni ka yad be fol riy, ni bod yalen e maluk kap, nge th’ib, nge plet, nge bet.*7:4 Boch e babyor e dariy riy e nge bet.)

5 Me fith e pi Farise nge pi tamchib ko Motochiyel Jesus ni lungurad ngak, "Mangfan nder fol pi gachalpem ko yalen nike yib rok pi chitamangidad ni kakrom ke af ngodad, ma yad be abich nga pa’rad nde be’ech?"

6 Me fulweg Jesus ngorad ni ga’ar, "Rib sorok Isaiah ni profet ni fa’ani weliy murung’agmed, ni gimed e pi’in gimed ma dake moding niged gimed, ni bod ni yoloy ni ga’ar:

I Got e ga’ar, ‘Pi girdi’ ney e yad be tayfag ko thin ni yad be yog,

machane rib mal’af lanin’rad rog.

7 Mm’ayfan e siro’ nge pigpig ni yad be tay ngog,

ya pi motochiyel ni girdi’ e sunumiy

e yad be machibnag ngak e girdi’ ni gowa pi motochiyel rog!’

8 "Kam digeyed e motochiyel rok Got ma kam folgad ko tin ni be fil e girdi’ ngomed."

9 Me ul ul Jesus ngay nge ga’ar ngorad, "Rib soromed ni msasalpiyed ngam n’iged e motochiyel rok Got ni bochan e ngam ayuweged yalmed! 10 Ya ga’ar Moses, ‘Mu liyor ko chitamam nge chitinam;’ ku errogon ni yog ni ga’ar, ‘En nra yog e chitamngin fa chitiningin nga dalib e thingar nli’ ngem’.’ 11 Machane gimed be fil ko girdi’, ni fa’anra bay ban’en rok be’ nrayag ni nge pi’ nge fel’ rogon e chitamngin fa chitiningin riy, machane me yog ni ga’ar, ‘Ren’ey e Korban’ (ni fan e re bugithin ney e ke ga’ar, ren’ey e ke mil suwon ngak Got), 12 ma aram e ke yib e tawey rok ndabki ayuweg e chitamngin fa chitiningin. 13 Ireray kanawo’en ni gimed be darifannag e thin rok Got ni bochan e pin’ey ni gimed be fil ngak e girdi’. Ma bo’or bogi ban’en ni bod e tiney ni gimed be rin’."

Pin’en nma alitnag be’

14 Me ere ki pining Jesus fapi girdi’ ni aram urngirad ngarbad ngak bayay me ga’ar ngorad, "Mu telmed ngog ni gimed gubin, mi gimed guy rogon ngam nanged fan. 15 Dariy ban’en nra yan u wuru’ i downgin be’ nga fithik’ i downgin nge alitnag facha’. Machane n’en nma yib u laniyan’ be’ e ir e ma alitnag facha’." 16 *7:16 Boch e babyor e ka ni puthuy ngay e verse 16: Ere mu telmed ni fa’anra bay telmed ni ngam rung’aged ban’en ngay! (mu guy e 4:23).

17 Ma nap’an ni digey Jesus fapi girdi’ ni aram urngirad me yan ngalan e naun, me fith pi gachalpen fan fare fanathin ngak. 18 Me ga’ar Jesus ngorad, "Gimed e gathi yugu ba tamilang boch an’med ngak yugu boch e girdi’. Mogned, dawor mu nanged fan? Dariy ban’en nra yan u wuru’ i downgin be’ nga fithik’ i downgin nge alitnag facha’, 19 ya gathi ke yan nga laniyan’, ya ke yan ngalan gil’iggan ni bay yan u rom nga wuru’ i downgin." (Re bugithin ney ni yog Jesus e aram e keyog ni gubin mit e ggan mra ni kay.)

20 Miki ul ul Jesus ngay nge ga’ar, "N’en nma yib u laniyan’ be’ e ir e ma alitnag facha’. 21 Yu fithik’ i laniyan’ be’ e ir e ma yib e leam nib kireb riy ni ir e ma pingeg fa’anem nge darngal, me moro’ro’ u fithik’ e yargel, me thang e fan ko girdi’, 22 miyow par be’ ni gathi mabgol rok, me chogow, me rin’ urngin mit e kireb; me sabanban, me puwlag, me awan’, me t’ar e thin nga daken be’, me tolngan’, me balbalyang — 23 urngin e pi kireb ney e ma yib u laniyan’ be’ nge alitnag fa’anem."

Michan’ rok be’ ni bpin

24 Me chuw Jesus u rom nge yan ngabangi nug nib chugur ko binaw nu Tyre. Me yan i par ngalan ba naun ni ba’adag ndariy be’ ni nge nang ni bay u rom, machane de yag ni nge par nib mith. 25 Me rung’ag be’ ni bpin murung’agen Jesus, ni be’ ni bpin nike ying ba mo’onyan’ ngak bochi pin ni fak, ma ka chingiyal’ nem me yib i paraw nga but’ u to’oben i ay Jesus. 26 Re pin nem e be’ u bang, nni gargelnag u Fonicia ni bay u lan yu Syria. Me wenig ngak Jesus ni nge tuluf fare mo’onyan’ nge chuw u fithik’ i dow fak. 27 Me fulweg Jesus ngak ni ga’ar, "Som’on e ngaan duruw’iy e pi’in bitir; ya de mat’aw ni ngan fek gan e pi’in bitir nga nin’ ko pilis."

28 Machane me fulweg fare pin ni ga’ar, "Er rogon, machane mus ko pilis ni bay u tan e tebel nma kay e ggan nike aw u gan e pi’in bitir!"

29 Me ga’ar Jesus ngak, "Bochan e re bugithin nir ni kamog ni fulweg ko tin kugog ma aram e ngam sul nga tafnam; ya fare mo’onyan’ e ke chuw u fithik’ i dow fakam!"

30 Me ere sul fare pin nga tafen me pir’eg fare tir rok ni bay u bet; nriyul’ nike chuw fare mo’onyan’ rok.

Jesus ni chuweg e biling rok be’ nib mo’on me yal’uweg e thin u l’ugun

31 Me chuw Jesus u to’oben yu Tyre me yan u Sidon ko lipath nu Galile, ni yan u lan fa gi nug ni Ragag e Binaw fithingan. 32 Me fek boch e girdi’ be’ nib mo’on i yib ngak nib biling ma ba tagan e thin u l’ugun, miyad wenig ngak Jesus ni nge tay pa’ nga daken. 33 Me fek Jesus fa’anem ni go ir nga orel ko fapi girdi’ ni aram urngirad, me tay l’agruw bugul i pa’ ngalan tel, me thuw me math nga bolowthen. 34 Me sap Jesus nga lanelang, me pag e pogofan rok, me ga’ar ngak fare mo’on, "Ephphatha," ni fan e re bugithin ney e, "Mmab!"

35 Ka chingiyal’ nem me mab tel fa’anem nl’agruw raba’, me fel’ rogon bolowthen, ma aram me non nike fel’ e thin u l’ugun. 36 Me ri tay Jesus chiylen ngorad ni yad gubin ndab rogned ku be’ e n’en nike rin’; machane gelngin ni ta’chiylen ngorad, e aram gelngin ni ur weliyed i yan. 37 Ma urngin e girdi’ nrung’aged e yigo’o ra gin gad ngay me lungurad, "Urngin ban’en ni be rin’ ma bfel’! Mus ko pi’in biling ma ke gol nagrad kar rung’aged ban’en, nge pi’in nib tagan e thin u l’ugunrad nike yal’uweg e thin u l’ugunrad!"