Mateus 26

Jesus nt’ar liyben

1 Fa’ani mu’ Jesus i machibnag urngin e pin’ey, me ga’ar ngak pi gachalpen, 2 "Gimed manang faram ni ka l’agruw e rran me taw ko madnom ni Paluk’af, ma en ni Fak e Girdi’ e bay ni pi’ ngan richibiy ko kuruth."

3 Ma aram me mu’ulung e pi tolang ko prist nge pi’in yad ba ilal rok piyu Israel ngalan e naun rok Kaifas, ni ir fare Prist ni Th’abi Ga’, 4 miyad puruy’nag rogon ni ngan kol Jesus ni dabi nang be’ ngan li’ ngem’. 5 Me lungurad, "Thingar dab da rin’ed ko ngiyal’ ni yibe madnom riy, ya ra yib e girdi’ ngodad ncham."

Jesus nliyef u Bethany

6 Ma nap’an ni bay Jesus u lan yu Bethany u tafen Simon ni be’ nib daraw, 7 me yib be’ ni bpin nike fek ba melor nni ngongliy ko malang ni alabaster nib sug ko florida nib tolang puluwon, me pu’og nga daken lolugen Jesus ni ka be abich Jesus. 8 Me guy pi gachalpen Jesus e n’en ke rin’ fare pin miyad damumuw. Miyad fith ni lungurad, "Mangfan ni kan adbey e re florida nem ni urngin? 9 Fa’an mang e n’en ma kan pi’ e re florida nem ni chuway’ nib tolang puluwon mi ni fek e salpiy riy ngan wereg u pa’ e pi’in gafgow!" 10 Me nang Jesus e n’en ni yad be yog me ga’ar ngorad, "Mangfan ni gimed be kirebnag laniyan’ e re pin ney? Ya ren’ey nike rin’ ngog e ban’en nrib fel’. 11 Ya gubin ngiyal’ ma bay e pi’in gafgow romed, machane gag e gathi gubin ngiyal’ ni bay ug par romed. 12 Ya n’en nike rin’ e ke pu’og e re florida ney nga dakenag ni aram e ke ngongliy rogon e dowef rog ni ngan k’eyag. 13 Ere mu ted fanmediyan ko re bugithin ni ba’aray! Demturug e gin’en ni yira machibnag e re thin rok Got ney riy u gubin yang u roy u fayleng, ma yira weliy murung’agen e tin nike rin’ e re pin ney, ni fan e nge puguran e re pin ney ngan’uy."

Judas ni ta’reban’ ngak e pi tolang ko prist ni nge yagnag Jesus

14 Ma bagayad fa ragag nge l’agruw i gachalpen Jesus — ni fa’anem ni Judas Iskariot fithingan — e yan ngak e pi tolang ko prist 15 me ga’ar, "Fa’anra gu yagnag Jesus ngomed ma mang e gimed ra pi’ ngog?" Ma aram miyad theeg guyey e salpiy ni wasey nib silber ngar pi’ed ngak. 16 Ma ka aram e ngiyal’ ni guy Judas rogon e ngiyal’ nra bung rogon ni nge yagnag Jesus.

Jesus ni kay e ggan ko paluk’af ni yad pi gachalpen

17 Fa’ani taw ko chirofen ni som’on ko madnom ni ngan kay e flowa nda ntay e is ngay me yib pi gachalpen Jesus miyad fith ngak ni lungurad, "U uw e ga ba’adag ni nggu ngongliyed rogon e ggan riy ni ngam koy ko blayal’ ni ggan ko Paluk’af?" 18 Me ga’ar ngorad, "Mmarod ngak be’ nib mo’on ni bay u lan e binaw nge lungumed ngak, ‘Ke ga’ar fare Tamchib, Ke taw ko awa rog; ma pi gachalpeg nge gag e nggu madnom niged e madnom ni Paluk’af u tabinaw rom.’ " 19 Me rin’ pi gachalpen e tin keyog Jesus ngorad, mranod ra ngongliyed rogon e ggan ni blayal’ ko Paluk’af.

20 Ma nap’an ni aw e lumor me par Jesus nge fa ragag nge l’agruw i gachalpen nga tebel ni ngar abichgad. 21 Ma nap’an ni yad be abich me ga’ar Jesus ngorad, "Nggog ngomed, ni bay bigimed ni bayi yag nigeg." 22 Me ri taganan’ fa pi’in gachalpen miyad tabab i fith ni tata’a bagayad ni be lungurad, "Somol, gathi gag e ga be yogneg fa?" 23 Me fulweg Jesus ni ga’ar, "En ni kug lthegew e flowa romow ngalan e plet nta’reb rogon e bayi yag nigeg. 24 Ya en ni Fak e Girdi’ e bay yim’ ni bod rogon nike yog e babyor nib thothup murung’agen, machane kari gafgow e re mo’on nem ni ir e bay yagnag e en ni Fak e Girdi’! Ya fa’an manga da ni gargelnag ma kabfel’!" 25 Me fith Judas ni ir e yagnag Jesus ni ga’ar, "Tamchib, gathi gag e ga be yogneg fa?"

Me fulweg Jesus ni ga’ar, "I gur e kamog."

Abich rok Somol ko blayal’

26 Ma nap’an ni yad be abich, me fek Jesus e flowa, me pining e magaer riy ngak Got, me t’et’ar, me pi’ ngak pi gachalpen me ga’ar, "Mfeked ngam ked; ya ireray dowag."

27 Me fek fare kap, me pining e magaer riy ngak Got, nge mu’ me pi’ ngorad me ga’ar, "Mu unumed ni gimed gubin, 28 ya ireray racha’eg ni ir e bayi micheg e m’ag u thilin Got nge girdi’, ni racha’eg ni bayi map’ nga but’ ni fan ngak bo’or e girdi’ ni fan e nge n’ag Got fan e denen.