1 En nib t’uf e llowan’ rok e ba’adag ni nganog ngak e kireb rok. Ba aliliy e en ni dabun ni ngan yal’uweg.

2 I SOMOL e bfel’ u wan’ e girdi’ nib manigil, machane ma gechignag e pi’in yad ma t’arliben e kireb.

3 Ngongol ni kireb e der ma yororiyey, machane pi’in mat’aw e yad ba muduwgil u but’.

4 Le’engin be’ nib manigil e ba churwa’ nib uf e en ni figirngin ngay; ma le’engin be’ nma tamra’nag figirngin e bod e m’ar ni kanser ko yil rok.

5 Girdi’ ni yul’yul’ e gimew ra puruy’ ni bfel’; ma be’ nib kireb e kemus ni ba’adag ni ngi i ban nigem.

6 Thin ko girdi ni kireb e ma thang e pogofan, ma thin ko pi’in mat’aw e ma ayuweg e pi’in ke man e lang ngorad.

7 Pi’in kireb e yad ra machda’nag e gafgow ni nge yib ngorad me math owcharad, ma pi tabnaw rok e pi’in mat’aw e yug ra i par.

8 Fa’anra ga ba tamilngan’, ma yira pining e sorok ngom; ma fa’anra ga ba pinat, mra changar e girdi’ ngom nga but’.

9 Bmanigil ni ngam par ni gathi gur be’ ni bu uw rogom ni ga be maruwel ni fan ko par rom, ko bin ngu’um dake gur be’ nib ga’fam ma ga be yim’ ko bilig.

10 Girdi’ nib mat’aw e ma chothowliy e gamanman rok, ma pi’in kireb e yad ma gafgownag e tirorad e gamanman.

11 Be’ ni girdi’en e milay’ e bo’or gan, ma rib pinat e en ma adbey tayim rok ko maruwel ni dariy gam’ingin.

12 Kemus nn’en ni ba’adag e girdi’ ni kireb e ngu’ur gayed e tin kireb ni ngar rin’ed, ma pi’in nib mat’aw e yad be par ni yad bmudugil u but’.

13 Pi’in kireb e yad be aw ko thin rorad, ma girdi’ ni yul’yul’ e yad ma pithigedyad ko oloboch.

14 Tow’ath rom e be yan u rogon e thin rom nge wok rom; puluwon e maruwel rom e ra yib ngom.

15 Girdi’ nib pinat e gubin ngiyal ni yad ma leamnag nib sororad. Ma girdi’ nib gonop e ma motoyil ko fanow.

16 Nap’an nra puwan’ be’ nib balyang, ma rib gagyel u daken. Ma pi’in nib tamilangan’ e ma sabalbalyang ko thin ni kireb.

17 Nap’an ni ga ra weliy e tin riyul’, min rin’ e tin ba yal’uw, machane malulfith l’ugun e ma soregney ko n’en nde yal’uw.

18 Marog thin e rayag ni nge maad’ad nga laniyan’ be’ nib to’ar ni bod bangi saydon, machane thin nnog nib gonop e rayag ni gol nigey.

19 Ban e ba ngoch e yafos rok, machane riyul’ e ma par ni manemus.

20 Pi’in yad ma t’arliben e kireb e yad ra gin ko kireb, machane pi’in yad ma maruweliy e fel’ e yad ra pir’eg e felfelan’.

21 Dariy ban’en nib kireb nma buch rok e pi’in nib mat’aw, machane pi’in kireb e dariy ban’en rorad, go’ oloboch.

22 I SOMOL e ba fananikay e sasalap l’ugun, machane ma felan’ ngak e pi’in yad ma tay e thin rorad u gil’.

23 Girdi’ nib tamilngan’ e yad ma th’ab gulungrad ko n’en ni yad manang, ma pi’in pinat e yad ma gagyelnag farad manan’.

24 Maruwel nib gel e ra pi’ gelngim; ma fanam gamead e ra mang nagem ba sib.

25 Magfan’ e rayag ni iring e felfelan’ rom, machane thin ni bfel’ e ra ba’udeg lanin’um.

26 Be’ nib mat’aw e ba powo’ ko fager rok, machane kanawo’ rok e en nib kireb e be waliyrad nga wuru’ e wo’.

27 Fa’anra ga ba gamead ma dabiyag ngom e tin ga be nameg, machane fa’an ga ra maruwel nib gel ma rayag ngom e tin gab adag.

28 Mat’aw e ir e kanawo’ ko yafos; ma kireb lanyan’ e ir e kanawo’ ko yam’.