1 Dabi awan’um ngak e girdi’ ni kireb, ma dab mu guy rogon ni ngam mang tafger rorad. 2 K’ar oloboch e kemus e tin yad ma leamnag; gubin ngiyal’ ni yad ra pithig langrad me nge gafgow be’.

3 Tabinaw e ni toy nga daken e def ni gonop nge tamilangan’. 4 Ra bay e llowan’ riy, ma pi senggil e bay e pin’en nib t’uf ma ba tolang puluwon maba gamog riy.

5 Kabfel’ ni ngan gonop ko bin nge gel gelngiy, arrogon, kab ga’ fan e llowan’ ko gelngiy ni nge gel. 6 Thingar mu tanom ni bfel’ rogon u m’on ni ngam man ko mael, ma feni fel’ rogon e fanow ni ka ni tay ngom, aram feni fel rogon ni ga ra gel.

7 Thin ko gonop e yigub to’ar rok be’ nib pinat ni nge nangfan. Dariy ban’en nrayag ni yog u nap’an ni yira puruy’nag ban’en nib ga’fan.

8 Fa’anra urngin ngiyal’ ma ga be tanomnag e kireb, ma bayi par nga langay nge wear thim ni gur be’ ni ga ba tak’ar oloboch. 9 Demturug ban’en nra t’ar be’ nib balyang liben mab denen. Ma fananikay e girdi’ be’ ni dariy ban’en nma rin’ ya go’ moning.

10 Fa’anra ga ba me’waer u nap’an ni aw e gafgow nib tomgin, ma rriyul ni ga ba me’waer.

11 Dab mu satuntun ni ngam ayweg be’ ni ngan thang e fan rok nde mat’aw ni ngan li’. 12 Rayag ni ngamog ndariy rogom ngay, machane Got e ma nang ma ir e be guy lanin’um nge fan ni ga ma rin’ ban’en. Ma fal’eg i yaliyem; ere manang. Ma ra pi’ puluwom ni rogon e n’en ni ga ma rin’.

13 Fakag, mu koy e honey; yab manigil. Rribod feni athibthib e honey ni kabay u tafen u daken blothem, 14 ere nge mich u wun’um ni erfeni fel’ e gonop nga lanin’uy. Mu yagnag e gonop ngom me par e yafos rom ni bfel’ rogon iyan.

15 Dab mbod be’ nib kireb nma guy rogon ni nge mro’ro’ ko girdi’ ni yul’yul’ ara fek e tabnaw rorad u pa’rad. 16 Demturug urngin yay nra paraw e girdi’ nib yul’yul’, ma gubin yay ma kuyad ra sak’iy; machane riya’ e ma thang mit e pi’in kireb.

17 Dabi felan’um ko ngiyal’ nra mada’nag e to’ogor rom e riya’, ma dab mu girig ko ngiyal ni yad ra dol’. 18 Fa’anra ga be girig ma ra nang SOMOL, ma dabi m’agan’ ngay; ma aram e sana dabi gechignag fa’anem.

19 Dab mu pag nge wagagaynag e pi’in kireb lanin’um; ma dabi awan’um ngorad. 20 Be’ nib kireb e dariy rogon nga bang, dariy ban’en nike par ni be lagan’ ngay.

21 Fakag, mu digow ngak SOMOL ma ga tayfan e pilung. Ma dab mu’un nga ban’en nma rin’ e pi’in nma togopluw ngorow; 22 Pi girdi’ nem e rayag ni ba tomgin e riya’ nga pulworad. Mog gamnang e re riya’ nra pi’ Got ara fare pilung?

23 Pi’in gonop e ku u rogned e pin’ey:

Ba kireb ni ngi i lanyan’ e pi’in ma puf oloboch. 24 Fa’an yad ra duwgiliy ni de buch e rok be’ nib kireb, ma bayi buch wa’athrad me dabuyrad gubin e girdi’. 25 Ma pi tapuf oloboch ni yad ma gechignag e en nib kireb, e ra fel’ rograd me fel’ bugwarad.

26 Ba fulweg nib yul’yul’ e pow ko bin riyul’ e fager.

27 Dab mu toy e naun rom ngam sunmiy reb e tabnaw nge mada’ ko ngiyal’ ni ka mu fal’eg rogon yung i flang rom, nike pagan’um nrayag ni ngam par rom.

28 Dab mu micheg ban’en nib togopluw ngak be’ ni dariy tapgin, ara mog ban’en ni de riyul’ u murung’agen. 29 Dab mu ga’ar, "Bay gu rin’ ngak ni bod nike rin’ ngog! Rug ra sulweg taban ngak!"

30 Gu wan u daken fa yung i flang nge milay’ ko grape rok be’ nib gamead ma ba pinat. 31 Ma ke sug ko pan ni bay e rchangal riy ma ke mathrow ko pan. Ma yoror riy ni malang e ke puth nga but’. 32 Mug guy e ran’ey mu gu tafnenag rogon, ma aram mu gu fil ban’en riy: 33 Mu par ngu’um somolmol, ma ga pi’ nga daken ngam mol. Mag uchmiy pa’am ngam toffan buchu’uw, 34 machane nap’an ni kag be mol, ma gafgow e bayi og ngom ni bod ba mororo’ ni bay talin e cham rok.