1 Pi thin ney e thin rok Agur ni fak Jakeh:

"Demoy Got rog, demoy Got rog,

ma dakriy gelngig.

2 Da kugbod ba girdi’ kug bod ba gamanman;

dakriy e nangan’ rog ni bod e girdi’.

3 Dariy reb e gonop ni yag ngog,

ma dariy ban’en ni gumnang u murung’agen Got.

4 Gur bay be’ ni ka’a yan nga tharmiy kesul nga but’?

Gur bay be’ nike kol e nifeng nga pa’?

Gur bay be’ nike bachiy e day ngalan bang i mad

fa ke duwgiliy e gin ni yan i mus e fayleng riy?

Mini’ e cha’nir ni fa’anra gamnang? Mini’ be’ ni fak?

5 "I Got e der ma thilyeg e tin ke micheg. Ir e bod rogon bangi shield ngak urngin e pi’in yad ma gaweg e ayuw rok. 6 Fa’anra mog nike yog ban’en ni dawri yog, ma bay i yal’uwegnem me dag ni gur be’ ni ga ba sasalap l’ugun."

7 Got, gu be ning ngom, ni ngam pi’ ngog l’agruw i ban’en u m’on ni nggum’; 8 Mu aywegeg nga dab ug sasalap l’ugun, ma dabri fel’ rogog ma dab rug gafgow. Ere mu pi’ ngog chi urngin e ggan nib t’uf rog. 9 Ya fa’anra yug ra yo’or ngog, mrayag ni gog ni dariy angim ngog. Ma fa’anra gu ba gafgow, ma rayag ni gu moro’ro’ nggu m’aynag fan e Got rog.

10 Dab mu thibthibnag ba sib ko masta rok, ya ra buch wa’atham ngam gafgow.

11 Bay boch e girdi’ nma togopluw ngak e chitamngin ma darir pininged e magaer ko chitiningrad.

12 Bay boch e girdi’ ni yad ma leamnag ni yad bmachalbog ma krimusmus farad alit.

13 Bay boch e girdi’ ni yad ma leamnag nriyad bmanigil — rib sororad u wan’rad!

14 Bay boch e girdi’ ni kemang i tay ngorad ni yad ma gafgownag e pi’in gafgow nge pi’in nib t’uf e ayuw rorad ni bochan e nge yag gubin ban’en ngorad.

15 Chogow e bay l’agruw i ppin ni fak, ni yow l’agruw ntunguy fithingrow ni "Pi’ ngog!"

Bay aningeg i ban’en ni dariy e ngiyal’ ni yad ra gaman:

16 fayleng ko yam’,

le’engin be’ nder diyen,

but’ nike mlik nike t’uf e n’uw riy,

nge ba nifiy ni be daramram ni dabyag i taleg.

17 En nma moningnag e chitmangin ara fanenikay e chitiningin nike pilibthir, e kabfel’ nra luf e arche’ ni raven lanmit me languy e arche’ ni vulture downgin.

18 Aningeg ban’en nikaygi mo’maw’ ngog ni nggu nangfan:

19 ba arche’ ni eagle ni be changeg u lanelang,

porchoyog ni be yan u daken ba war,

bbarkow ni be pir’eg wo’en u maday,

be’ nib mo’on nge be’ ni bpin ni yow ba’adagew yow.

20 Ba’aray rogon e ngongol rok le’engin be’ nde yul’yul’: ma iling, me maluk me ga’ar, "Machane dariy ban’en nib kireb ni ku gu rin’!"

21 Bay aningeg i ban’en ni dabyag ni nge kadan’ e fayleng riy:

22 ba sib ni mang pilung,

be’ nib balyang ma bay rok urngin ni ba’adag ni nge kay,

23 be’ ni bpin ni dabuy daken ni un ko mabgol,

nge be’ ni bpin nib sib ni fek lon e re pin ni masta rok.

24 Bay aningeg i gamanman u fayleng ni yad ba achichig, machane riyad ba llowan’:

25 Apurgog: yad ba me’waer, machane yad ma kunuy garad u nap’an e yal’.

26 Mmit e boro’ nma par u thilin e war: e yad me’waer, machane yad ma ngongliy taferad u fithik’ e war.

27 Asamning ni locust: e dariy e pilung rorad, ma yad ma yutha’ nib yaram.

28 Adburru’: e rayag ni mu kol ngalan pa’am, ma kiyma piri’egrad u lan e naun ko pilung.

29 Bay aningeg i ban’en ni yira yaliy ma ba gamog ya’an nma yan:

30 layon, ni yad e th’abi gel u fithik’ e gamanman ma dariy ban’en ni marus ngay;

31 kaming ni pumo’on, dirra’ nib yowlop

nge pilung ni yan u p’eowchen e girdi’ rok.

32 Fa’anra gab balyang nike tolngan’um ma kam tanownag ban’en nib kireb, ma ngam tal ngam leam! 33 Ga ra gurfiy e milik me yib ni butter. Ga ra tuguy p’ethungun be’ me yib e racha’ riy. Ma fa’anra mu k’aring e damumuw, ma ga ra aw nga fithik’ e oloboch.