1 Fakag, mog kammicheg ni nge milfan e malfith rok be’ ngom? 2 Gur kamman mu aw ko thin rom, kam aw ko wup ko tinim micheg? 3 Ere, fakag, ka mu par nga tan gelngin fa’nem, machane ba’aray rogon ni ngam mul riy: mu gur nigem ngak, ngam wenig ngak ni nge pagem. 4 Dab mu pagem ngam mmol fa mu tal ngam toffan. 5 Mu chuw u lan fare wup ni bod ba arche’ fa ba gamanman ni deer ni be mil rok ba tamun gamanman.

6 Girdi’ ni gamead e thingar ra filed ban’en u rogon nma par e apurgog. 7 Dariy be’ ni be yog e thin rorad fa ir e pilung rorad, fa be gagiyeg nagrad, 8 machane ra taw ko ngiyal’ ni bay e gowel ma yad ma kunuy e ggan ngar cha’ariyed ni ngar ked ko ngiyal’ nike yib e garbeb. 9 Uw n’umngin nap’an ni ngi i mol e en nib gamead? Mingiyal’ e nge suwon? 10 Be ga’ar, "Nga yug gu fek bochiyang riy; nga yug gu uchumiy pa’ag nruw raba’ nggu mol bochu’uw." 11 Machane ra ka be mol me yib i og e gafgow ngak ni bod ba moro’ro’ ni bay talin e cham rok ni og ngak be’.

12 Girdi’ ni kireb nib ma’fan e go’ sasalap l’ugun e yad be tay i yan. 13 Yad be t’ar owcharad ma yad be fanathin nga pa’rad ni ngar ban niged gur, 14 ma aram n’umngin nap’an ni yad be tanomnag e kireb u lanin’rad nib pig nga bang, miyad be k’ar oloboch u gubin yang. 15 Bochan e ran’ey, ma bayi aw e riya’ ngorad nib tomgin, ngar maad’adgad nib gel.

16-19 Medlip ban’en ni bay ndabun SOMOL ni dabyag ni nge k’adan’ riy:

changar ni ufanthin,

ba yunmon nma lifith e thin,

pa’ef nma thang e pogofan rok e

girdi’ ndawor ra bucheged ban’en,

ba leam nma tanomnag e kireb,

rifrifen ay nma gur ni nge yan i

ngongliy e kireb,

be’ ni ir e mich u ban’en ni go’

malfith e i weliy,

nge be’ nma k’aring e oloboch nga

thilin e pi tafager.

20 Fakag, mu rin’ e n’en ni be yog e chitamam ngom, ma dariy bi’id ni ngam pagtalin e n’en nike fil e chitinam ngom. 21 Mu cha’riy e thin rorow ni gubin ngiyal’, mu michigiy u lan gum’ircha’em. 22 Machib rorow e ri i pow’iyem u nap’an ni ga be milekag, ngi i yororiyem nnep’, me fanow nigem ni rran. 23 Pi fonow rorow e ba magal ni be mat’; chep ni yow be tay ngom e rayag ni nge fil ngom rogon e par. 24 Rayag ni nge tem u orel ko ppin ni kireb, nge pi thin ni darngal rok yug boch e ppin ni yad mmabgol. 25 Dabi unan’um ko pidorang rorad; dab mmul ni bochan e dawol u owcharad ngom. 26 Be’ nib mo’on e rayag ni nge chuwi’iy reb e bpin nma chuway’ ngak ni bod puluwon ba flowa ni loaf, machane par ni yow ra tay be’ ni gathi mabgol rok e ra thay u pa’ gubin e tin bay rok.

27 Gur, rayag ni mu fek e nifiy u daken ngarngorem ni dabi mo’oruf e mad rom? 28 Gur, rayag ni mman u daken e kol nib gowel ni dabi urfiy rifrifen em? 29 Ri aram feni ga’ riya’en ni ngam pirew le’engin be’. Cha’ nra rin’ e ra gafgow. 30 Girdi’ e darir dabuyed ba moro’ro’ ni k’iy me iring e ggan; 31 ma fa’an nni kol, ma thangri pi’ puluwon ni medlip yay — thangri pi’ gubin ban’en ni bay u pa’. 32 Machane re mo’on nra pirew be’ ni gathi mabgol rok e ba manan’. Ya ir e be gafgownag ir. 33 Bay i ma’fan ma yibe li’; ma bayi par ni dakriy rogon ngabang. 34 Be’ nib mo’on nib mabgol e dariy ba damumuw nra tay ni bod gelngin e ngiyal’ nike talyeg; falbiyen nra tay riy e dariy folen. 35 Dabi fanay reb e bayul; ma dariy urngin e tow’ath nra gapaseg e damumuw rok.