1 Gonop e toy e naun rok ni medlip e rumog riy. 2 I yog ngan li ba gamanman ni fan ko mur, me aruy e spice ko wayin, me ngongliy rogon e tebel. 3 Me l’oeg e ppin ni tapigpig rok ngranod ko gin th’abi tolang u lan fachi binaw ngar ponggad: 4 "Mired e ngaray, e girdi’ ni gelan’!" Me ga’ar ko en ni balyang, 5 "Moy, ngam koy e ggan rog ma ga unum e wayin ni ku gu aruy. 6 Mu chuw u fithik’ e pi girdi’ nir ni gelan’, ma ga par ni dab mum’. Mu lek kanawo’en e llowan’."

7 Fa’an ga ra yal’uweg be’ nib ufanthin’, ma kemus ni gur e ra kireban’um ngom. Fa’an ga ra puwan’ ngak be’ nib kireb e leam rok, me gur e ga ra maad’ad. 8 Dariy e ngiyal’ ni ngam yal’uweg be’ nib ufanthin; ya ra fananikayem riy. Machane fa’an ga ra yal’uweg be’ nib gonop, ma ra adag dakenam. 9 Demturug e n’en ni ga ra yog ngak be’ nib gonop ma ra gel boch e gonop rok. Ma demturug e n’en ni ga ra yog ngak be’ nib mat’aw ma ra puthuy ko tin manang.

10 Ra ngam gonop ma som’on e thangri yib madgun SOMOL u lanin’um. Fa’anra gamnang Fa’anem nib Thothup, ma aram e ba tamilang lanin’um. 11 Gonop e ra puthuy boch e duw ko yafos rom. 12 Fa’anra bay e gonop rom me gur e ra yib e fel’ riy ngom, ma fa’an ga ra siyeg me gur e ga ra gafgow. 13 Pinat e bod be’ ni bpin ni mada’ laman ngalang ni dariy ban’en ni manang ni der tamra’. 14 Ma par u taga’ mab ko naun rok fa daken e chiya’ ko gin th’abi tolang ko binaw, 15 ngi i tolul ko girdi’ ni be yan ni tirorad e yad be nameg ni be ga’ar: 16 "Mired e ngaray, gimed e girdi’ nib manan’!" Me ga’ar ngak be’ nib balyang’, 17 "Rib athibthib e ran ni ka ni iring. Rib fel’ lamean e flowa ni ka ni iring." 18 K’on fare pin nib pinat e darir nanged ni girdi’ ni yad mayan ko naun rok e yad ma yim’, ni pi’in ka ra thapgad ngaram e yad bay e chiney u ar u lan e fayleng ko yam’.