1 Ga be turguy e kireb nga daken be’ u fithik’ e leam nib kireb? Demturug ko gur mini’, ma dakuriy e tawey rom. Ya gara turguy e kireb nga daken boch e girdi’ u fithik’ e leam nib kireb, ma ka gabe rin’ e pin’en ni yad be rin’, ma aram e gur e ka ga be turguy e gechig rom. 2 Gadad manang nib mat’aw Got ni fa’anra turguy e gechig rok e pi’in yad be ngongliy e pin’ey. 3 Machane gur ma ka gabe rin’ e pin’ey ni ir e gabe turguy e kireb riy nga daken boch e girdi’ u fithik’ e leam nib kireb! Ere gabe finey ma gara thay ko gechig rok Got? 4 Sana dariyfan u wun’um feni gol Got, nge feni k’adan’, nge feni gumaen’. Bmuduwgil ni ga manang ni Got e ba gol yabe guy rogon ni nge pow’iyem ngam kolngan’um ko kireb ni ga be rin’ ma ga turguy u wun’um ni ngam pi’ keru’um ngay. 5 Machane kam gelnag lanin’um kam par. Aram e fin ga be ga’nag e gechig rom ko Chirofen ni bayi m’ug e damumuw rok Got nge gechig nike turguy nib mat’aw. 6 Ya bayi be’ me pi’ Got puluwon nrogon e tin nike rin’ fa’anem. 7 Boch e girdi’ e kar pired ni yad be rin’ e tin ni bfel’ ni yad be nameg e fla’ab rok Got, nge tayfan ni bayi tay Got ngorad, nge reb e tamilang ndab ku nim’ riy: ireram e picha’ ni bayi pi’ Got e yafos ndariy n’umngin nap’an ngorad. 8 Ma boch e girdi’ e kemus ni yad e yad be fineyrad, ma kar n’iged e tin nib mat’aw yad be rin’ e tin nib kireb: yad e bayi pu’og Got e gechig nge damumuw rok nga dakenrad. 9 Bay e gafgow nge amith nra yib ngak urngin e pi’in yad be rin’ e tin nib kireb, ni piyu Israel e yad ra m’on nga fini migid e pi’in gathi yad piyu Israel. 10 Machane Got e ra pi’ e fla’ab, mra tayfan, ma ra pi’ e gapas ngak urngin e pi’in yad be rin’ e tin ni bfel’, ni piyu Israel e yad ra m’on, me migid e pi’in gathi yad piyu Israel. 11 Yi Got e ta’reb rogon e ngongol nma tay ngak urngin e girdi’.

12 Pi’in gathi yad piyu Israel e dariy rorad fare Motochiyel rok Moses: yad be denen kar pired ni yad bmalog ni bochan e de moy Got rorad, ni yugu aram rogon ndariy fare Motochiyel rorad. Ma piyu Israel e bay e re Motochiyel nem rorad; ma yad be denen kemang e re Motochiyel nem e be turguy e gechig rorad. 13 Ya gathi ma mat’aw e girdi’ ngak Got ni bochan e kar rung’aged e re Motochiyel nem, machane fa’anra ur rin’ed e tin ni be yog e re Motochiyel nem. 14 Pi’in gathi yad piyu Israel e dariy e re Motochiyel nem rorad; machane ngiyal’ ni yad ra ngongliy e tin ni be yog e re Motochiyel nem ni yad e sum u lanin’rad ni ngar ngongliyed, e aram e kar manged ba motochiyel ngorad, ni yugu aram rogon ndariy fare Motochiyel rok Moses rorad. 15 Ya ngongol rorad e be m’ug riy ni tin ni be yog fare Motochiyel ni ngan rin’ e yad manang u lanin’rad. Ya ku errogon lanin’rad ni be dag ni ren’ey e ba riyul’, ni bochan e yu ngiyal’ e ma yog e leam rorad ngorad nib tagan e tin ni kar ngongliyed, ma yu ngiyal’ e ma yog ngorad nib mat’aw e tin ni kar ngongliyed. 16 Ireray rogon e Chirofen ni bayi pufthinnag Got u daken Jesus Kristus urngin e tin nib mith ni be leamnag e girdi’, ni bod rogon ni be yog e Thin Ni Bfel’ ni yib rok Got, ni ir e gu be machibnag.

17 Me gur? Ga be yognem ni gur be’ u Israel; ni re Motochiyel nem e gabe toer ngay ma gabe uf yabe lungum e gur girdi’en Got; 18 ga manang e tin ni ba’adag Got ni ngam rin’, ma ke fil e Motochiyel ngom rogon ni ngam nang e tin nib mat’aw: 19 ma gabe finey ni gur e ga be pow’iy e pi’in yad bmalmit, me gur e tamilang ngak e pi’in yad be par u fithik’ e lumor, 20 me gur e gabe fonownag e pi’in yad bbalyang, me gur e sensey ko pi’in bitir. Ma ke muduwgil u wun’um nu fithik’ e re Motochiyel nem e bay urngin e llowan’ riy nge tin riyul’. 21 Gabe machibnag boch e girdi’ — mangfan ndab mmachibnigem? Gabe machibnag ni be lungum, "Dab ni moro’ro’ " — me gur ga ma moro’ro’ fa? 22 Be lungum, "Dab mu pirew be’ ni gathi mabgol rom" — me gur gimew be par be’ ni gathi mabgol rom fa? Ri dabum e liyos nma meybil boch e girdi’ ngay — ma gama moro’ro’ u lan e pi Tempel ni yad bay riy fa? 23 Ga be af nga murung’agen e motochiyel rok Got ni bay rom — ma ga be girengiy e tamra’ nga daken Got ni bochan e ga be th’ab e motochiyel rok fa? 24 Ya be ga’ar e babyor nib thothup, "Pi’in gathi yad piyu Israel e yad be yog e thin nib kireb nga fithingan Got ni bochan e ngongol romed piyu Israel."

25 Maad’ad ni kan tay ngom e ra yib fan ni fa’anra um fol ko re Motochiyel nem; machane fa’anra dab mu fol riy, ma dariyfan ni kan maad’ad ngom. 26 Ma be’, ni gathi be’ u Israel, ni be’ ndawor ni maad’adnag, ma be fol ko tin ni be yog fare Motochiyel, e gathi ra tay Got e cha’nem ni susun e be’ ni kan maad’ad ngak? 27 Ere pi’in gathi yad piyu Israel e bay ra turguyed e kireb nga dakenmed piyu Israel; ni bochan e kari yoloy e re Motochiyel nem kan pi’ ngomed, ma kan maad’ad ngomed, machane kigimed be th’ab e re Motochiyel nem, machane yad e dawor ni maad’ad ngorad, ma yad be fol ko re Motochiyel nem. 28 Mini’ e cha’ nriyul’ ni be’ u Israel, ma riyul’ ni kan maad’ad ngak? Gathi cha’ ni be’ u Israel ko pow ni bay u wuru’ i downgin, ni maad’ad ni kan tay ngak e kan tay nga downgin. 29 Machane cha’ nriyul’ ni ir be’ u Israel e cha’ ni ir be’ u Israel u fithik’ i laniyan’, ni aram e cha’ ni kan maad’ad nga laniyan’, ni fare Kan ni Thothup rok Got e ke yodoromnag, machane gathi fare Motochiyel ni kan yoloy. Be’ nike yodorom e Got e bay yog e sorok ngak, ma gathi girdi’ e nge yog e sorok ngak.