1 Bay ban’en nike fel’ rogon piyu Israel riy ngak e pi’in gathi yad piyu Israel? Ara bay fan ni ngan maad’ad ngak be’? 2 Ri ba ga’ fan, u gubin e kanawo’! Bin som’on e Got e pagfan e thin rok ngak piyu Israel. 3 Ma fa’anra bay boch i yad nde yul’yul’? Gur ma aram e dabki yul’yul’ Got? 4 Rib muduwgil ndanga’! I Got e dabisiy ni nge par nib yul’yul’, ni mus ni fa’anra yan i par ni urngin e girdi’ ma yad be lifith l’ugunrad. Ni bod rogon ni be ga’ar e babyor nib thothup:

"Thangri yib i m’ug ni gab mat’aw ko ngiyal’ ni ga ra welthin;

ma thingar mu gel ko ngiyal’ ni yira pufthinnigem riy."

5 Fa’an mang e ngongol nib kireb ni gadad be ngongliy e ir e be gagiyelnag feni mat’aw Got me ere mang e ku ra dogned? Gur fa’anra gechig nagdad Got ma nga dogned nike ngongliy ban’en nib kireb? (Gu be welthin nrogon e leam nma tay e girdi’.) 6 Ri danga’! Fa’an mang e de mat’aw Got, me ere ra di’in me yag ni pufthinnag e fayleng.

7 Fa’anra sasalap l’ugun rog e be gagiyelnag feni sorok Got ngarogon feni yul’yul’ ko tin nma yog, me ere mangfan ni ku yira gechig nigeg nrogon be’ nib tadenen? 8 Mang ni dabi lungudad, "Marod ngad ngongliyed e tin nib kireb nge yag ni yib e tin ni bfel’?" Bay boch e girdi’ ni karogned e thin nib tagan ni murung’ageg ni bochan e ke lungudad e kugog e re bugithin ney! Bay ni gechig nagrad nrogon ni nge yan i aw.

9 Gur ba sorodad piyu Israel ngak e pi’in gathi yad piyu Israel? Ri danga’! Kug mu’ i weliy nib tamilang faram ni piyu Israel nge pi’in gathi yad piyu Israel e yad gubin ni yad bay u tan gelngin e denen. 10 Ni bod rogon ni be yog e babyor nib thothup ni be ga’ar:

"Dariy ta’abe’ nib mat’aw,

11 dariy ta’abe’ nib tamilangan’,

ara be gayiy Got.

12 Urngin e girdi’ ni kar pi’ed keru’rad ngak Got,

yad gubin ni kar kirebgad.

Dariy be’ ni be rin’ e tin ni bfel’, mus nga ta’abe’ ma dariy.

13 K’angrad e bod ba low ko yam’ nike mab.

Be lobeb e sasalap l’ugun nib kireb u bolowthrad nga but’,

nge thin nib kireb ni be yib u dap’i l’ugunrad nga but’ ni bod rogon e yub rok e porchoyog;

14 l’ugunrad e ba sug ko meybil ni nge buch ban’en rok be’.

15 Yad ba gur ni ngar maad’adgad ku be’ ara ra thanged e pogofan;

16 yungi n’en ni yad be yan riy i yan e yad be pag nga keru’rad e tin kar kireb niged nge girdi’ ni kar gafgow niged.

17 Dar nanged kanawo’en e gapas,

18 ara kar filed rogon ni nge yib madgun Got u wun’rad."

19 Kad nanged e chiney ni urngin ban’en ni bay ko re Motochiyel nem e fan ngak e pi’in yad be par u tan e re Motochiyel nem, ni fan e ngan taleg urngin e tawey rok e girdi’ nge yag nni fek urngin e girdi’ nu fayleng nga tan e pufthin rok Got. 20 Dariy be’ nra i rin’ e tin nike yog e re Motochiyel nem me yan i par nike mat’aw u p’eowchen Got; ya maruwel ko Motochiyel e nge ayuweg be’ nge nang fa’anem nike denen.

21 Me ere chiney e ke dag Got rogon nma mat’awnag e girdi’ ngak ni dariy rogon e motochiyel ngay. Ya fare Motochiyel nge pi profet e kar micheged e re bugithin ney. 22 Got e ma mat’awnag e girdi’ ngak u daken e michan’ rorad ngak Jesus Kristus. I Got e ma rin’ e ren’ey ngak urngin e girdi’ nike mich Kristus u wun’rad, ni ta’reb rogon piyu Israel nge pi’in gathi yad piyu Israel: 23 ya ke denen urngin e girdi’, kar pired ni yad bmal’af rok Got ke mul e fla’ab rok u pa’rad. 24 Machane u daken e tow’ath rok Got ndariy puluwon ni bochan e runguy rok ngak e girdi’, e ir e ke mat’awnag urngin e girdi’ riy ngak u daken Kristus Jesus, ni ir e ke pithigrad rok e denen. 25 I pi’ Got Kristus Jesus ni racha’en ni map’ u kuruth e ir e nge yag ni nge n’ag Got fan e denen ko girdi’ riy, ni yira n’ag u daken e michan’ rorad ngak Kristus. I pi’ Got Kristus ni fan e nge yag ni dag Got rogon nib mat’aw nge rogon nma mat’awnag e girdi’ ngak. Kakrom e gum’an’nag Got ir, ngi i fek owchen ko denen rok e girdi’; 26 machane chiney e ke rin’ ban’en ni fan ko denen nike ngongliy e girdi’ ni nge micheg nma mat’awnag e girdi’ ngak. Ireray kanawo’en nike dag Got ni ir be’ nib mat’aw mra mat’awnag ngak urngin e pi’in nra mich Jesus u wun’rad.

27 Ere mang e kabay ni gomanga gadad ra weliy nib sorodad riy? Dariy! Ma mang tapgin? Bochan e gadad be fol ko Motochiyel? Danga’, machane bochan e ke mich Jesus u wan’dad. 28 Ya kad pir’eged nra mat’awnag Got be’ ngak ni kemus ni fa’anra mich Jesus u wan’ fa’anem, ma gathi bochan e be rin’ fa’anem e tin ni be yog fare Motochiyel. 29 Fe Got e kemus ni piyu Israel e ir e Got rorad? Gathi ku ir e Got rok e pi’in gathi yad piyu Israel? Bmuduwgil ni ir. 30 Ya Got e ri ta’reb ni bay, mra mat’awnag piyu Israel ngak u daken e michan’ rorad ngak Jesus, ma ku errogon e pi’in gathi yad piyu Israel nu daken e michan’ rorad ngak Jesus e ra mat’awnagrad Got riy ngak. 31 Gur fan e ren’ey e aram e ngad n’iged fare Motochiyel ni bochan e ke mich Kristus u wun’dad? Danga’, gathi errogon; ya aram e kad ted e re Motochiyel nem nga tagil’.