James 2:14-26

Michan’ ngak Got nge ngongol

14 Pi walageg ni girdi’en Kristus! Mang e ra fel’ rogon be’ riy nra ga’ar, "Mmich Got u wun’ug", ni fa’anra der m’ug ko ngongol rok ni aram rogon? Gur rayag e re mich rok nem ni nge thapeg fa’anem ngak Got? 15 Susun e errogon ma bay pi walagey ni girdi’en Kristus ni pumo’on ara ppin ni kar gafgowgad ko mad ma de gaman e ggan rorad. 16 Ere mang e ra fel’ riy ngorad ni fa’anra lungum ngorad, "Nge ayuwegmed Got! Mpired ni dabi yib e ulum ngomed ma bfel’ rogomed ko abich!" — ni fa’anra da mpi’ ngorad e tin ni nge yog ngorad? 17 Ere ba’aray rogon e michan’ ngak Got: fa’anra kemus ni go’ michan’ ngak Got ma de cheag e ngongol ngay, ma aram e ba yam’ fare mich.

18 Machane bayi ga’ar be’, "I gur e bmich Got u wun’um me gag e gu be rin’ e ngongol riy." Machane fulweg rog ngom e, "Mu dag ngog rogon nrayog ni nge mich Got u wun’um nde cheag e ngongol rom ngay, mu gu dag ngom e michan’ rog ngak Got ko ngongol rog." 19 Mog, mmich u wun’um nri ta’reb e Got ni bay? Bfel’! Ku errogon e pi mo’onyan’ nib mich u wun’rad — ma yad ma da’da’ ko marus. 20 Ri gab balyang! Gab adag ni ngan dag ngom ni michan’ ngak Got nde cheag e ngongol ngay e bm’ayfan?*2:20 bm’ayfan; boch e babyor e bay riy ni byam’. 21 I di’in e ga’ rodad i Abraham me mat’aw ngak Got? I mat’aw ngak Got u daken e ngongol rok ko fa ngiyal’nem ni pi’ Isak ni fak ni ba maligach u daken e altar. 22 Damur guy? Michan’ rok ngak Got nge ngongol ni rin’ e peth nge maruwel u ta’bang; me yan i aw e michan’ rok ngak Got nike fel’ rogon u daken e ngongol ni rin’. 23 Me yib i m’ug nib riyul’ fa gin’en ni bay u lan e babyor nib thothup ni be ga’ar, "I Abraham e i par nib mich Got u wan’, ma bochan e michan’ rok ngak Got me matha’eg Got ngak nike mang be’ nib mat’aw." Me pining Got Abraham ni ga’ar "Abraham ni fager rog." 24 Ere kam guyed nma mat’aw be’ ngak Got u daken e ngongol rok, ma gathi kemus nu daken e michan’ rok ngak Got.

25 Taareb rogon ko fare pin i Rahab nma chuway’ ngak. I mat’aw ngak Got ni bochan e ngongol rok ni fa’ani fek fapi cha’ nu Israel nga naun rok, ni fapi cha’ nrabad ni mol’og me ayuwegrad ngar chuwgad ngar sulod u yugub pa’ e kanawo’. 26 Ni bod rogon e dowef nra dariy e pogofan riy ma ba yam’, ere ku errogon e michan’ ngak Got nra de cheag e ngongol ngay ma ba yam’ fare michan’.