1 ክርስቶስ አሽባሲክ ሻናሶን ኤጴ ቴ ስንና ቦርአ ንቶ ደይ ኤስ ሳፋራሲክ ችምማ ሆሮት። አሽባሲክ ሻናሶን ኤጴቴ አሱ ቦርኣስሲዎስቶኖን ዬትዋ። 2 ሀንኔን ኤካሎክ ሀን ዳስታክ ፉእቴ ፎሲክ አሽኒ ማጙ ኤናንቶሲ ሳፋራኖን ዛጉክ ስኖይናሮን ሀኦሲ ፍቃድኖን ዛጉክዋ። 3 አዛብኒ ሜያ ዛግሴፌይሲማቶ ጋፎ ፎክ፤ እጉክ፤ ኡሼ ዛዎክ፤ ስንኖይ ያሆክ፥ ሆሬ ኡባ ፎንቶኖን ኡሼ ሱሩክናዋ ኢቹ ስና ኮልኦኒ ሺጶክና ዜሞቲ ኣትሴት ነያስ ሆሮናዋ። 4 ኤስ ኢቹ ዉዛሲክቶኖን ዛጉክ ባሶኔን አነ ዎእቶ ቤይንትሲክ ዲንቀሴፌ ደይ ሱንኒትሶን ማጝስሴፌ። 5 ስኑንታኖ ካክ ፌሴ ባሶስታናዋ ክት ባሶስታና ማጝሱ ካርአናክ ሆሬሬ ፌ ባሪክ ዎልጉባሶን እሞነርዋ። 6 ኪት ባሶክነን ምስራቹኒ ካማስ ማክቴናስ ኤስ ባሪ ቦርኣዋ። ኤስ ባሪክ አሽቤሲስታ አሱ ዙታምባሴ አሲስታ ማጝሱ ካቴፋናሲማቶ ባሶስታ ደይ ማጝሱ ካቶኒርዋ። ስኑንታኖ አያናቤሲሲክ ሀኦስ ፋፋና ፎስነ ፋሮን ካክ ፎሶነ። 7 ኤሴ ዙታምባሴ አሲ ኮኣስ ታእሴዋ፤ ጉዝሬ ሺጶ ችማትክ ንባማ ካኑንት ፎጝዋ፤ ቴትንትሶን ሀእስር ስኒት። 8 ኬሽታናሲ ሾዎ ቦርኣሶን ኡካር ስንና ቦርአ ዙታምባሴ አሲስታን ንቶትና ንቶትና ንብንትስን ዎል ኬሽቶት። 9 ኡኙኖይ ንቶትና ንቶትና እርባኒ ኤጳቶት። 10 ሾዎ ቴሳ ሀኦሲ ኦትማኒ እማኖን አማናምቶ ዎስትኛኒማቶ ስንነ እሳርባ እሳርባስ ኤስ ባሪክ እምቴ ሀኦሲ ኦትማክ ኦሚሲክ ዎስቶዎዋ። 11 ንቶስን አስፌ ባር ሀኦሲ ካማኖን አሱዎ፤ ሀኦሲክ ዎስቴፌ ባር ሀኦስ ባሪክ እምና ሁግናሲክ ዎስቶዎ። ኤሲሲክ ሀኦስ የሱስ ክርስቶስኒኪ ካሞ ቾዋ ዙታምባሴ አሲክ ሀኦስ ኡልፍንቶና። ኡልፍናሴዋ ሁግናሴ ኮእባ ፎንቶኖን ባሪክ ስንፋውጝ፥ ኣሚን።

12 እንኖ ሜያነ! ጌኒማቶ ንቶትን ፋታኖኒ ሻና ኤጳ ታፌት ካባሲክ አርቶኖይ እርባ ዉዛ ንቶስታ ካርናርነ ፋሮን ዛግራ ዲንቆትታዋ። 13 ክርስቶስ ኡልፍናባሲክ ዎል ሌ ዬፌና ካባ አካማኖን ግሮትክ ባሳ ሻናሶን ሃኤር ስነት ቦርአ ግሮትዋ። 14 ክርስቶስኒ ሱናሲክ አሱ ንቶትን ሜእፋናነ ኡልፍናኒ አያና ስና ሀኦሲ አያና ንቶስታ ኬሮኒር ስንና ቦርአ ግሮትዋ። 15 ንቶስን ኦኑ ሻናሶን ኤጴቴፌ ባር ካ ዎሪር ወደይ ዊስ ወደይ ማጙ ዉዛ ዎስቴር ወደይ አሱኒ ቾዉስሲ ግሪር ስንነ ሻና ኤጴቶናታዋ። 16 ክርስታና ስንና ቦርአ ሻና ባሳስታ ካርፋናነ ኤስ ባሪክ ሀኦሶን ጋላቶዎቴኖ ኢቾናኣታዋ። 17 ማጝሱ ካቶና ዎናስ ካርእዋ። ኤስ ማጝሱኒ ካቶናስ ደይ ሀኦኒ አሱሳታዋ። ኤኪን ኤስ ማጝሱኒ ካርኣስ እኖኪን ካቡኒር ስንናኔን ምስራቹኒ ካማሲክ አጃጃምቶኖይ አሱኒ ሜኒ ኮኣስ አዉ ስኑንጋሶ? 18 ኮርቶ ማፃፋስ ማኬፋናሲማቶ፦

«ኦኮስኑ ፋሩክ ችማናስ፤

ራኮክ ስንናኔን፤

ኑሪፌ ባሶናዋ፤

ቦርእኛኒ ሜና ኣካ ስኑንጎሶ?»

19 ኤስ ባሪ ቦርኣ አማናምቶ ስንና ቴሲ ባሪ ፍቃድኒማቶ ሻና ኤጲጴ ቴሴፌ ባሶ ዙታምቤሲሴ ካቤሲሶን አማናምቶ ሀኦሲክ አዳራ እማት ማአ ዉዛሶን ዛግት ፎስታን ኦርፎ ዎልሶኔታዋ።