1 ኮርቶ አያናስ አምማኖን፦ «ኦርፎስታኪ ነያሲ እሳ እሳ አሱኒ ሜያ ኤሽቱ ዳግሲፋ አያናሶንናዋ ኪናስ አሱክና ዞኑስቴሴሬ ሀይማኖትቤሲሶን ሞርሞሶነዋ» ይፋዋ። 2 ኤስ ኤፋቴና አስሱሲ ኮርአ ታነ ፌ አሱ ኣፌ ኡሲ፤ ኤሻኖን ዎል ሌሴፌ ካባሲክ ኪቹ ብታክ ኪቼርነ ፋሮን ታቻ ካኑቤስ ፋና አሱኒ ሜያክጝዋ። 3 ኤስ ኤፌቴና አሱኒ ሜያ ኤጵነ ግሩነ አሲን ካለቱ ፌሴፌዋ። አማነፌ ባሶናዋ ፉቶሶን አርሴፌ ባሶና ባሮን ጋላቴሴት ሙሶነክ ሀኦስ ቴስና ሙሶን፦ «ሙትታ» ይት ካለፌ። 4 ሀኦስ ቴስና ሙስ ዙቴራ ማአርዋ። ጋላታክ ኤጴቴሴፋቴነ ሀእቶኒ ዉዛ እሳንነ ኣፋዋ። 5 ሀኦሲ ካማክናዋ ሺጶክና ካይማ ስናናዋ።

6 ሀን አሩሶን አማኝኒ ሜያክ አስሳታነ የሱስ ክርስቶስኒ ማአ ዎስትኛ ስናታዋ። ኤስ ፉቶኒ ካማሲክ ዞኑስቴፋታነ ድችኔሶን አምማኖን ቤሱታዋ። 7 ሀኦሶን ሺጶ ስንኖይ ሀን ዳስታኪ ቶቾስታን ዎክዋ። ሀኦሶን ሺጶክ ቴትኔስ ዶስቶናክ ዛጉዋ። 8 አቱ ችማናክ ዛግፋ አሱሲክ ቴትኔስ ዶስቶናክ ዛጉ ኬእፋናስ ጋሮኖንጝዋ። ስኑንታኖ ሀኦሶን ሺጶክ ቴትኔስ ዶስቶናክ ዛጉስ ሀሽቲ ባሪክናዋ ዮኒ ካሲክና አብድባ ፋር ስንና ቦርአ ዙታምባሴ አሲክ ኬእአርዋ። 9 ሀን ካማስ አሱ ዙቴሬ ኤጴቶናክ ሾልሱ ደይ ፉቶ ዎላዋ። 10 እንኖ አሱ ዙታምባሴ አሲን አርክሮን ደይ አማነፌ ባሶትን ዙትራ ፋቱኒ ሀየዋ ሀኦሲክ አብድ ዛግኒር ስንና ቦርአ ዎስቶክ ሆፕፌኒ ደይ ካቤፌኒዋ። 11 ሀን ዉዛሲክቶኖን አጃጆ ደይ አስሱ። 12 ናኦ አሱ ስንታ ቦርአ ኦኑ ኔን ካሹናታ። ስኑንታኖ ዎላክ፥ ፎክ፥ ኬሽታናክ፥ አማኖክናዋ ኮርቶክና አማነሴፌ ሜያክ ቤሶ ስጝዋ። 13 ታ ዮና ካባኔን ኮርቶ ማፃፋሶን አሱኒ ሜያክ ፌሬቱክ፤ ማኮክናዋ አሱክና ችምማ። 14 ኔክ ራጅ ማክቴና ዎኖኔንናዋ ቤቴክርስታኒሲ ኩርኡኒ ሜና ነይስታ ኩሹቤሲሶን ታእሬ ሺጴሴቴ ዎኖት ኔክ እምቴ ሀኦሲ ኦቱምኒ እማኖን ዳጎታታዋ። 15 ነ ድቻሶን አሱኒ ሜያ ዙቴሬ ብዮነክ ኤስ ዉዛስታ ችምማ። ኤስ ዉዛሲክቶኖን ዎስቶታ ፌሹክ አቱኔሶን ዙትራ ባሶክ እምማ። 16 ነ ቴታሲክናዋ አሲፋታ አሱሲክና አሩዋ። ኤስ ዉዛሲክቶታ ችምማ። ኤስ ባሮን ዛጋታነ ቴትኔሶንናዋ ኦደፌ ባሶትንና ፉኦታዋ።