1 ኤስ ባሪ ቦርኣ ሀንኔን ኤካሎክ ፋኩክ ኣነ ችሜኒ ስንና ቦርአ አቴናኒ ካታማሲ እንኖ እንኖ ፎኒክ ማአሪ ስንና እኖክ ቤስቴ። 2 አማንቶኒትሲክ ችምማ የሮትክ ንቶትን ኪቱናክ እንኖ አይ ደይ ሀኦሲ ዎስትኛ ስንነ ክርስቶስኒ ምስራቹኒ ካማሶን ማኮክ እኖክ ዎስቶኒ ዞሞ ስና ጢሞትዮስኒን ዎስኒዋ። 3 ኤሲስ ደይ ንቶስታ ካርአ ሻናሲክ ሾርኮኖይትማቶ ንቶትን ዛጉና። ኤስ ሻናስ እኖክ ሆሬራ እምቴር ስንባሶን ንቶ ቴትንትሲክ አርሴትር። 4 ኤሲስማቶኑ እንኖ ንቶኔን አነ ፋኒ ካባሲክ ሻና እኖስታ ካርአናማቶ ዜምማ ንቶክ ማኬኒዋ። ኤስ ሻናስ አርሴፌትስማቶ እኖስታ ካርእዋ። 5 ኤስ ባሪ ቦርኣ ሀንኔን ኤካሎክ ፋኪያክ ኦዳናክ ኣነ ችሙት ስንና ቦርአ ንቶ አማንቶሲ ቾዋኖን አሩናክ ሾሌፋቱ ጢሞትዮስኒን ንቶኪ ዎስጝዋ። ኤስ ባሪን ንቶኪ ዎስናስ አዉዛክነ ሴጣና ኦማ ኡግናክ ንቶትን ፋትታነ ስናና ደይ እንኖ ዎስቶስ ደይ ኬእኖር ስንና ፉቶኒርዋ ይራ ድጌና ቦርአዋ።

6 ስኑንታኖ ሀሽ ጢሞትዮስ ንቶኪን ዎል ሌ እንኖኪ ዬሬ ንቶ አማንቶሲ ቾዋኖንናዋ ንቶ ኬሽታናሴ አሲክ ግሮኒ ኦዱ እኖክ ማኬ። ኤሲስማቶ ደይ ንቶ ዎንና ዎንና ማአሪክ እኖትን ሳፋሬት ፋሴቲማቶናዋ እንኖ ንቶትን ብያኒክ ካልቴት ፋኒሲማቶ ንቶ ደይ እኖትን ብያቲክ ካልቴት ፋትማቶና እኖክ ማኬ። 7 ኤስ ባሪ ቦርኣ አይኒ ሜያነ! እንኖ ፋኒስ ራክኮሲናዋ ሻናስና ስኒፋናክኑ ንቶ አማንቶሲክ እንኖ ችማ ዳንኒዋ። 8 ንቶ ዳም የሱስኒክ ችምሜ ፎስ እኖክ ካኒዋ። 9 ኤሴ ሀሽ ንቶ ቾዋሲክ ጋላታ እምፌኒ። ንቶ ቦርአ ባሳ ስና ፋ ግራኒሲክ ሀኦኒሶን ጋላቴፌኒ። 10 ዎነዋ ዋልነ አካማ ችማ ሺጶክ ሺጴት ፋኒስ ኣፌ ኣፌ ብያኒክናዋ አማንቶኒትሲ ዮእ ዉዛሶን ቱኑ ችማኒክዋ። 11 ሀሽኑ ሀኦኒሴዋ አባኒስና፤ ዳምኒ የሱስ ቴትባሲክ ንቶኪ ዮኒክ ኡጉኒሶን ካናዎዋ። 12 እንኖ ንቶትን ኬሽቴት ፋኒሲማቶ ዳሚስ ንቶትና ንቶትና ደይ ኦምኒ ሜያክኔን ፋ ኬሽታንኒቲስ ድቻናክናዋ ቱምማ ፉእቶናክና ዛጋዎዋ። 13 ኤስ ባርክ ዳምኒ የሱስ ኮርቶኒ ሜያኔን አነ ዬፌና ካባሲክ ሀኦኒሲ ስናክናዋ አባኒሳ ስናክና ንብኒቲስ ሙዳባ ፎንቶ ኮርቶ ስናናክ ንቶትን ችኑናዋ።