1 ኤስ ባሪ ቦርኣ ሳማኪ ቴግቶሶን ሃኦኒር ስና ኮርቶ አይታሳክቶኖ! አማንቶኒሲ ዎሲ ስና ባሪንናዋ ማግኒ ጋኝኜ ሜኒ ጋኛ ስና የሱስኒንና ሳፋሮትዋ። 2 ሙሴ ሀኦሲ ኬያ ዙታምባሴ አሲስታ አማናምቶ ስንናማቶ የሱስ ደይ ባሪን ታትሲ ሀኦሲክ አማናምቶዋ። 3 ኬያሶን ኬርእፌ ባር ኬያስታን ደናሎኖን ኡልፍንባ ፋናማቶ የሱስኒክ ደይ ሙሴኒስታን ደናሎኖን ኡልፍና ሾልሲርዋ። 4 ፉቶሲክ ኬያ እሳርባ እሳርባሲክ ባሮን ኬርአ አሱባ ፌርዋ። ስኑንታኖ ዙታምባሴ አሲን ኬርኣስ ሀኦስዋ። 5 ሀኔንቲ ማክቶኒ ዉዛሲክ ዛላ ስናናክ ሙሴ ሀኦሲ ኬያ ዙታምባሴ አሲስታ ዎስትኛኒማቶ አማናምቶ ስንነ ፌር። 6 ስኑንታኖ ክርስቶስ ሀኦሲ ኬሩክ አማናምቶ ስንናስ ናኒማቶ ስንነዋ። ኤስ ኬያስ ደይ እኖዋ። ባሪ ኬያ ስናኒስ አማነፌኒ ዉዛሴዋ ቴቴፌኒ አብዲሴ አሲን ማእስራ ኤጵፋኒነዋ።

7 ኤስ ባሪ ቦርኣ ኮርቶ አያናስ ማኬፋናሲማቶ፦

«ሀሽ ሀውጙ ካምባሶን ኦደፌት ካባሲክ፤

8 ዛቦሲክ ፋታንቴፌቲ ካባሲክ፤

ማጙክ ታይስታ ካብሴቴይሲማቶ፤

ንብኒትሶን ኤጴቶ ቤያር ዛጉትታ።

9 ኤስ ካባሲክ ዜሞቲ አባንቲሳክቶ ታን ፋታነሴቴ፤

ደይ ታን ቱእኒሴቴ፤

አቼቻስር ዎግጋ ዛግና ባሮን ደይ ብየቴ»

ይፋዋ ሀኦስ።

10 «ኤስ ባሪ ቦርኣ ኤስ ኮኒቶስታ ሃሬን፦

‹ንብቤሲስ ዎንና ዎንና ዳጌቱ ፋፋ፤

ኡጉናሶን ደይ ኣነ አርሶቶ› ይጝዋ።»

11 ደይ፦

« ‹ታ ባሶክ እማናክ ፋ ቤይሳኒ ድማስታ፤

እሳንነ ኣፋ ግርሶነ ዉዛ!› ይራ፤

ግእናሲክ ቴይጝዋ» ይ።

12 አይታሳክቶኖ! ንቶ ጋነያስን ኦኑ ሀየዋ ሀኦስታን ዎክሱኒ ማጙነዋ አማኖኖይ ንብነ ፎኖይናማቶ ቴትኒትሶን ኦድትዋ። 13 ኤስ ባሪስታን ደናሎ ንቶስን ቦርኣሲክ ኤሽቴሬ ንባሶን ኤጳ ቶ ቤያር ዛጉኖይናማቶ፦ «ሀሽ ሀውጙ» ይስቴራ ቴግቴ ዎናስ ፋና ካባሲክ ዎንና ዎንና ሜርኮትዋ። 14 ቴሱስታኪ ፋ አማንቶኒሶን ሀማ ኮእባስታ ካርአና ካባኔን ዛግራ ኤጵፋንነ ክርስቶስኔን አነ ዋራሴርቱ ሲናኒዋ።

15 ኤሲስ ደይ፦

«ሀሽ ሀውጙ ካምባሶን ኦደፌቲ ካባሲክ፤

ኤስ ኑሪፌት ካባሲክ ዛግሴትስነ ፋሮን፤

ንብንትሶን ኤጳ ቶ ቤያር ዛጉትታዋ»

ይስቴራ ማክቴናሲማቶዋ።

16 ኤካ ኤስ ባሶ ካምባሶን ኦደሴቴኔን ኦርፎ ኑሪስ ኦና ኦናንሶ? ኤስ ባሶ ሙሴ ዞንስን ግጵጽኒ ዳስታን ኬሳ ባሶ ዙቴሬቴኖሶ? 17 ሀኦሶን አቼቻስር ዎግጋ ቱማኖን ግእቶናክ ዛግት ፌሴስ ኦና ኦናንሶ? ኤስ ባሶ ቦርአ ዎስቴ ባሶናዋ ዱግኖቤሲስ ዛቦሲ ጋንደራ ፉእቴና ባሶቴኖሶ? 18 ደይ ኤስ አጃጃሞ ቤያ ባሶትን ስንና ሻካናነ፦ «ቤይሳናሲክ ኣፋ ግርሶነዉዛ» ይራ ቴይናስ ኦና ኦናንሶ? 19 ኤሴ ግሩ ችማ ቤየቴስ አማንቶ ቤዮቤሲስታን ካብ ቾዋ ስንባሶንቱ ቢፌኒዋ።