Matiwos 22

Kitun Kabuni Chowaasik Mamuste Mamsu

23 Es wono: «Kitun kabu aafa» yisefe Sedukawini meya Yesusniki yeesere ekka yit mamussete: 24 «Assinynyano! Muse: ‹Isa asu nawuba koonunoy kitifaanane aybaas es asuson ephphe es kiti aybaasik zalba fu’owowa› yiwa. 25 Naafun ayna ayna innoki feeseter. Baassossin arkiis asu ephaat nawa koonunoy kiti. Es bari boor’a ate aybaas es asuson ephi. 26 Esiisimato dey hepsaas keezsaas hamma naafunsa kar’ananneen es asuson ephaat kitisete. 27 Zuuttambesiise kitisetenneen orfo asus dey kiti. 28 Ese naafunobesiise asuson ephetewa, kitun kabuni wono naafuniisasin aafferikinso asu sinanari?»

29 Yesus wolgire: «Korto matsafaasikitononnawa Ha’oosi hugnanonna aane arifeti sinna boor’a daagefetiwa. 30 Kitun kabsefe kabaasik asuni meya samak faase Ha’oosi wosiyane feertu sinonetano asu aafa ephosone wuza dey aafa girusone wuza. 31 Sinuntano kitun kabuni chowaasik Ha’oos nittok makena baron aane feretuwetinoso? 32 Ekkatu yiwa: ‹Ta Abrahamni Ha’o, Isaaqni Ha’o, Yaqobni Ha’owa› Es bari boor’a bar hayewni meeni Ha’otano kituni meeni Ha’otawa.» 33 Daraas dey es baron odesere assubaasik diinqesete.