Êxodo 11

Nɗaktak ngga ngba̱pchi, uyen ugəshi

1 UYawe là ûMusa pa̱, <<Mi ga mɓa ká̱ nɗaktak kà̱ɗi pa̱ nzəng ka̱ apal aFirona ká̱ mbin aMasar. Kà̱ nva̱ng nva̱ ta te, uza̱ i re wó ó ga. Awalang va̱ uza̱ i re wó pa̱ ó ga te, uza̱ i ɓàk wó ó fa ka̱ ta̱. 2 Ǹyangmata̱ nak ka̱ chwang oIsa̱rila là oza̱ pa̱, onunggwan ká̱ ochar á ɓəp iya̱m ìsham iga aazurfa ká̱ azənariya ka̱ atak oMasar, onəm oga nggɓa̱k oza̱.>> 3 UYawe nak nchə̀r oza̱ bà̱l kà̱ mpyal oga aMasar. UMusa yà unəm uchumchum kà̱ mbin aMasar kà̱ ìwu okpari áFirona ká̱ onəm kpa.

4 Te uMusa là pa̱, <<Iya̱m va ta̱ uYawe là, <Ká̱ ishimshe ìzwam te, mi watar ka̱ ashe mbin aMasar, 5 kang nza̱ uyennunggwan nggo amar agəshi ka̱ ashe mbin aMasar i kú. I ɓàn ka̱ apal ayen ununggwan ugəshi áFirona, i ga i chu uyen ugəshi àyen uchar uzwal uva̱ ka̱ apal akò, ká̱ nza̱ amar ágəshi nggo aga iya̱m nkang. 6 Te mí fe ayə́ng aga aɗor kà̱ nkpaktak mbin aMasar ava nna mmá ká̱ ya chit ka̱t, ka̱t te pa̱ nna mí ga ǹyiya lap ka̱t. 7 Kang ka̱ atak nkpaktak oIsa̱rila te, ìva ìro ìswak unəm ka̱t, ka̱t te iya̱m nkang ka̱t, ka̱kul na o nyi pa̱ uYawe nyám nva̱n chit kà̱ ishimshe oga aMasar ká̱ oIsa̱rila. 8 Nkpaktak okpari ɓu va̱ ta̱, oza̱ i fə́ng i kuchi kà̱ mpyal mi, i là pa̱, <<O fa mmaɓu ká̱ nkpaktak onəm va̱ i yar nva̱ng ɓu,>> kà̱ nva̱ng nva̱ ta te, mi ga.> >> Te ìgwak shì uMusa fa re atak áFirona.

9 UYawe là ûMusa pa̱, <<UFirona i yà ká̱ nggwong achwang ká̱ wó ka̱t, ka̱kul pa̱ na ń nəm oga iya̱m iga nɗaktak ka̱ ashe mbin aMasar.>> 10 UMusa ká̱ uHaruna nəm nkpaktak oga iya̱m iga nɗaktak va̱ ta̱ kà̱ mpyal áFirona, te uYawe nak ìgwak áFirona twat, te uza̱ re oIsa̱rila pa̱ á fa ka̱ ashe mbin wò ka̱t.