1 Matmat te, Inan là nnap ka̱ okəka okəka yi ka̱ asa̱l pa̱ ɗongɗong pa̱ kyák ka̱ atak nnap-nlà onəm oga nka̱m nre ka̱tətak. 2 Ǹyangmata̱ ka̱ ashe nra ngga nkur va̱ ta̱ ji wo te, uza̱ là nnap ayi ka̱ atak aYen wò. Uwa uza̱ nak na ta̱l uyen uga ngwur akup ká̱ iya̱m pa̱ kpaktak. Ka̱ atak a wà kpa uza̱ nəm apambin ká̱ apaɓur. 3 UYen uwa ichumchum Inan va ka̱ ngghan mí yiya. Uwa kpa ka̱ nnap nnəm nva pa̱ səlak nji Inan. Uwa ka̱ nnak nkpaktak iya̱m i yà ka̱ atak ichumchum nnap-nlà ngga nfa ka̱ anunung. Ka̱ nva̱ngva̱ uza̱ gba̱l ka̱ nnal nnap-mɓá̱ngɓa̱ng yi ayi chit te, uza̱ le ɓa ga apaɓur təm ka̱wo ari Inan uwa ji pa̱ kpaktak. 4 A nak te, uza̱ ji oma̱leka ji pa̱ makmak ká̱ ichumchum. Wa nva aɗin va̱ uza̱ ka̱ te, a ji ajo oza̱ ji pa̱ makmak a.

5 Umaleka uro ya uva Inan là apir nnap-nlà va̱ ta̱ á na ka̱t. Nna pa̱,

<<Mmaɓu na uYen mi.

Nda n ta̱l uPo ɓu chit.>>

Uza̱ là iya̱m va̱ ta̱ ûma̱leka ro ka̱t kpa. Nna pa̱,

<<Mi ta̱l uPupon.

Uza̱ nnyi te, i ta̱l uYen mi.>>

6 Inan won pa̱ o re nre ká̱ uYen wò ugəshi ka̱ ashe apambin va̱ ta̱ te, uza̱ là pa̱,

<<Re nkpaktak oma̱leka a wop na.>>

7 Oma̱leka jiwo te, iya̱m va ta̱ uza̱ là ka̱ apal ishi oza̱. Uza̱ là pa̱,

<<Uza̱ i nak oma̱leka wò i tong wa ayə́r.

Onəm oga nnəm inunok nnyi te, uza̱ i nak i tong wa apər.>>

8 Iya̱m va ta̱ Inan là ka̱ apal ishi aYen wò jiwo. Uza̱ là pa̱,

<<ÁPonzhi-Inan, iponzhi ɓu pak chit təm mbyet mbyet.

Iponzhi ɓu va u kpán idari dari te, iponzhi iga nva̱n nnandər.

9 Iya̱m inəna̱n na u ma̱n.

Iya̱m ina te, u ma̱n ka̱ ka̱t, u yiyang.

Ka̱kul nva̱ ta te, Inan va̱ Inan ɓu te,

Uza̱ nak ɓu chit ishi ka̱ apal ishi nlwàk ɓu pa̱ kpaktak.

Atak nsat va̱ ta̱ i ɓa ka̱ nchang ìgwak aɓu pa̱ makmak.>>

10 Uza̱ là kpa pa̱,

<<ÁPonzhi-Inan, ka̱ mɓəɓan na byet te, mmaɓu na u nəm apambin.

Apaɓur pa̱ kpaktak iya̱m va mmaɓu na u nəm kpa.

11 Oza̱ i kukur. Mmaɓu ji ɓu te, u təm chit mbyet mbyet.

Nkpaktak oza̱ i gbəgbak wa ilukwán.

12 Ɓu chəndər oza̱ wa nkup iya̱m iga ndan izər.

Mi i ga̱ɓa̱n oza̱ ga̱ɓa̱n wa ntur ìlukwan i le mí pá ikak.

Mmaɓu ji ɓu te, ɓu təm ntəm ɓu.

U təm chit mbyet mbyet, ngwal ukak ro yà ka̱ ashe ɓu ka̱t.

Izun ɓu yà ka̱ nkur ka̱t.>>

13 Uro yà ka̱ ashe oma̱leka va uza̱ là nnap-nlà va̱ ta̱ á na ka̱t. Nna pa̱,

<<Təm ka̱wo ari mi na ń nak onəm oga nyang ɓu oza̱ a ta̱l itok iga nnak ashar ɓu a.>>

14 O nyi ka̱t ɗò? Nna pa̱ nkpaktak oma̱leka pa te, oza̱ oga aruhu aga nnəm inok va ma re nre ka̱ pa̱ a nakshi ka̱ onəm oga ngwur *akup ká̱ irirì iga mbyet mbyet a?