1 Askávai vanaói. "Earo vaná uva koĩ ivo. Ẽ paparo aa vesoya. 2 Meã wetsa enõ txiwásho niá vimisma ivoro ẽ papã shatemtsãwa. Askámaĩnõ meã ravé vimiyasmẽkĩ vosta amíska, ãtsapái ave vimikaĩónõ iinã. 3 Askámaĩnõ matõ chinãro ma yoí ikitáya, vosta ikitáya keskáse, ẽ vana mã anõ akásho. 4 Ea txiwásho shokostsoma. Ea matomẽse txiwásho ẽ nioskatsa. Uva meã ãwẽ kaya txiwámashoro, arí vimisma chinãtsoma. Mato askásevi aa ikítõ ikí, enõ mã txiwámaro, mato vimiotĩpásevi.*15.4 "Vimikaĩa", ãwẽ yoãro yora onis akĩ take akí, nokẽ chinã tekía aká.

5 Aská earo uva kaya, matoro ẽ meãrasĩ. Yora enõ txiwásho nii, ea anõ txiwásho nii nõ avévakĩro, vimivaĩkatsa. Aaro awesáma, eamaro mato akátĩpá. 6 Askámaĩnõ, enõ txiwásho niámaro, iwi meã shatevaíki atõ õtxia shanatõ ikatsai. Aská ivorasĩro kãtxinivaíki kooamtsãwavo. 7 Aská enõ txiwásho ẽ vana anõ akí mã shokoro katseki ea mã yokáa ivorasĩ Yové Koĩni mato inãkatsa. 8 Mã askái vimi ãtsaa oĩinã, ẽ papa yorã oĩtati ivo shovikatsa, anõsho ẽ ‘shokõkenavotserã’, ikĩ chinãsho mato oĩkatsavo. 9 Ẽ papa enõ noíatõsevi ikĩ mato ẽ noívaĩvaĩa. Enõ noíi istsoma.

10 Aská ẽ papã esé vana askásevi, ea toĩsho anõ noí niátõ ikí ẽ esé vana mã toĩa ivoro enõ noí mã iskatsa. 11 Neskái ẽ vanaro ẽ metsá mã aya shokoti. Aaivo matõ metsáro anose kesoa ikatsai.

12 Aská rama ‘neskátsoma’, ikĩ vana mato ẽ eneshoá. Ea matomẽ ẽ noíatõsevi ikí marímamẽ noínanãótsoma. 13 Yora wetsa anõpai yoramẽ ãwẽ noíro neská, ãwẽ avé takéa anõsho vopiya. 14 Ẽ mato yonoa ivorasĩ mã anõ akáro evé takésho mã shokokatsa. 15 ‘Ẽ yonoarasĩní’ ikĩ ea mato aneotĩpá. Aaro awesáma, yora yonótáyaro ãwẽ ivõ chinã tanatĩpá. Askásho ‘evé takéyavó’, ikĩ mato ẽ anea, ẽ papã vana katsése ẽ nĩkãvaĩvaĩarasĩ mato ẽ yoãshovaivainasho.

16 Aská matomarívi ea kavẽya. Eã mato ẽ kavẽchnárvi, enéimai mã vimivaĩnõ iinã. Anõsho katsése enõsho mã yokak imaĩnõ ẽ papã mato ashõkatsa. 17 ‘Neskátsoma’, iinã mato tanamaónõ. Noínanãi shokotsoma.

18 Aská naa mai shavapashõ yorã mato ichnamaĩnõ, ea atõ ichnatikiripari chinãtsoma. 19 Naa mai shavapashõ mato ivoshoro matomẽ noíkeãaivo askámẽkĩ matoro atonamarívi. Earvi mato kavẽchnáya. Askáshovísi mato ichnakatsavo. 20 Mato ẽ yoãshovaivaina ivokiri chinãtsoma. ‘Mee ishõyaro ãwẽ ivo tavakésmarvi’, ẽ ivaitĩ. Askáinã ea atõ meskoatõsevi akĩ mato askásevi aokatsavo. Ẽ vanakiri nĩkãsho atõ ikítõsevi ikĩ mato askásevi aokatsavo. 21 Enõsho mato aská akatsaivo, ea yonoya tanamasho. 22 Eã oshõ aská ivo vana ato ẽ yoãshoámaro ichná atomẽ neema ikenkeãaivo. Askámaĩnõ ramaro atõ ichnárasĩ neea ivo anõ ato pashati yama. 23 Aská, ea ichnayaro ẽ papa ichnayasevi. 24 Yové aká wetsa akátĩpá ivo ashõ ato ẽ oĩmáma ivoro, ichná atomẽ neema ikenkeãaivo. Askámẽkĩ ẽ yové akárasĩ oĩsmẽinã ẽ papanĩ ashõ noke ranĩki asaivo. 25 Aaro awesáma, esé vana neea yoãna ivo keská ave nokónõ iinã ikí, ‘ẽ awe awe inõma ea ranĩaivo’, ikí neea keskái.

26 Askámaĩnõ txipo mato vesoshokatsaya ẽ papamẽsho oá ivo mato ẽ yonoshokatsai. Aaro yosin ikiya anõpa ivo. Ẽ papamẽsho oshõ meki tsakaki ea yoãi okatsai. 27 Askámaĩnõ matõro ea mã askásevi aokatsa, meki tsakaki ea yoãki, txitavianamãshóse evé mã shokonimtásho", ato akĩ.