1 Jon ithik Yisu yôv me Lovak Matheng hevong ku lêklokwang hîmô Yisu kapô, êng me hetak ŋanam Yelodan hêk. Me Lovak Matheng helom yêni be hê long thiliv. 2 Me hîmô long êng hîtôm wak buŋdaluk yi vo Sakdang eyek yêni. Me mî ninjang nôm amî hele be wak takêng hele hîlôk yôv me mîng hema ve la.

3 Me Sakdang henang ethak inda nena, "Betha avanông ong me Wapômbêng Nakandung, êng me nonang vo valu tiêng imbutak îtôm polom."

4 ✝ 4:4 Lo 8:3 Metom Yisu henang viyang nena, "Wapômbêng ya kapua henang nena, ‘Anô mî hîtôm nîmô lêkmala ethak polom yom amî.’ "

5 Yôvêm me Sakdang helom Yisu be hethak be hê dum dêim te. Ketheng oyang me hik pîk bêŋiti sapêng ya melak lông bêŋbêng ining dôhô thô hêndêng yêni hîtôm hêyê wêng. 6 Me henang ethak Yisu nena, "Tem yaŋgêv long takiti êng ining athêng bêng lêk ining lêkmaŋging sapêng êndêng ong vo noyaŋging. Nôm takiti me yînîng be ya leng hiving yaŋgêv êndêng opalê, êng me tem yaŋgêv yom. 7 Be ditu noya vem budum thîvô be nôŋgêv yeng ethak ya me tem yaŋgêv nômkama takiti sapêng êndêng ong."

8 ✝ 4:8 Lo 6:13-14 Me Yisu henang nena, "Bôk ekavu yôv nena, ‘Nôŋgêv yeng êndêng Wapômbêng yong Anômbêng lêk nombong yêni yom ya ku.’ "

9 Yôv me Sakdang hiwa yêni be hê Jelusalem me hetak yêni heva melak matheng ya vôv anông. Me henang ethak inda nena, "Avanông, betha ong me Wapômbêng Nakandung, êng me nôsôv kisi be nu tamu pîk 10 vômbê nena bôk ekavu yôv nena,

" ‘Yêni tem nenang be ya aŋêla embalong ong be eyaŋging ong mavî 11 vo valu te dô nîmbî vemkapô andô.’ " Kapua Yeng 91:11-12

12 ✝ 4:12 Lo 6:16; 1Ko 10:9 Me Yisu henang nena, "Bôk ekavu yôv nena, ‘Dô noyek Wapômbêng yong Anômbêng andô.’ "

13 ✝ 4:13 Hib 2:18; 4:15 Sakdang eyek Yisu vo nembong kambom takêng yôvêm me hetak yêni be hê me heyambing wakma yang vo neyek inda ethak loŋbô.

14 Hethak Lovak Matheng ya lêklokwang me Yisu hele hê Galili hethak loŋbô. Me ya kôkôthing heveng long takêng sapêng. 15 Me hîndông loho hîmô ining melak yeng be avîlanô sapêng êv ya athêng ling.

16 Me Yisu hê Nasalet, long êng me ya long hilumbak bêng îmô. Hêndêng Sabat*4:16 Wapômbêng henang hethak avîlanô Islael nena Sabat nômbêng iti me imbua lovak me dô embong ku andô me êŋgêv yeng ethak yêni. Sabat me loho ning sonda te ya wak ali bahevi be lahavôyi. me hê melak yeng hîtôm ya kombom thak hevong. Hiviyô heva vo nesam Wapômbêng ya ambô. 17 Me anô heyaŋging kapua hêv plopet Aisaia ya kapua hêndêng yêni me hekak be hêpôm ambô bôte henang bêŋiti,

18 "Anômbêng ya Lovak Matheng hîmô hiving ya

vômbê nena yêni da hîtôk*4:18 Hethak ambô Glik îtôk ya ondong me bêng iti. Eŋgathô thing êyômô anô te kwandôk vo nembong ku te. ya vo ya nang ya Ambô Mavî êndêng avîlanô siv.

Me hêv ya be ya halêm vo ya nang ethak ŋa takatu be îmô kalaondong vo ende yêing

lêk ya nang ethak ŋa maleŋing pusip vo injê tak ethak loŋbô

me yaŋgêv ŋa takatu be anô vi êv vovang hêndêng loho vê injêk ining vovang

19 ✝ 4:19 Ais 58:6 me ya nang bêng nena lêk me Anômbêng ya waklavông hik ya la mavî thô." Aisaia 62:1-2

20 Yôv me hik kapua thing me hêv hêndêng ôpatu be heyaŋging kapua me hîlôk hîmô vo nîndông loho. Me avîlanô takatu be îmô melak yeng êyê yêni lêklokwang. 21 Me henang ethak loho nena, "Ambô ti be hêk Wapômbêng ya kapua be lêk olaŋô diti lêk hik anông."

22 ✝ 4:22 Luk 3:23; Jon 6:42 Me loho sapêng esong kambom be enang nena ya ambô me mavî anông. Metom enang nena, "Yêni me Josep nakandung, bêng e?"

23 Me Yisu henang ethak loho nena, "Ya hayala nena môlô tem onang ambô atu be avîlanô thak enang êndêng ya bêŋiti, ‘Dokta, nombong ong da lemvim kôpik imbutak mavî.’ Yoô bôk alaŋô nôm takatu be hovong hêk Kapenaom. Be ditu nombong bêng injêk yong melak ondong imbing."

24 ✝ 4:24 Jon 4:44 Me henang nena, "Ya hanang avanông ethak môlô nena, plopet te hê ya melak ondong me ya avîlanô mî thak iwa yêni thô amî. 25 ✝4:25 1King 17:1,7Metom ya hanang avanông bing ethak môlô nena, hêndêng Elaija ya waklavông me Islael ining avî tôp bêng anông îmô. Me Wapômbêng hevong be ôthîng mî hik hîtôm sondakbêng lô me wata te hiving be bôm bêng ivutak long êng sapêng. 26 ✝4:26 1King 17:8-16Me Wapômbêng mî hêv Elaija be hê hêndêng avî tôp Islael te amî. Metom hêv yêni hê hêndêng avîlanô long bôyang ining avî tôp te atu be hîmô melak lông Salepat hîmô Saidon ining pik.

27 ✝ 4:27 2King 5:1-14 "Me bêng yom, sêmbôk atu be plopet Elisa hîmô me Islael ining avîlanô kômbôk lepla*4:27 Kômbôk lepla me mî palê yom amî me kômbôk lomaloma thak ivutak anô kôpik hiving. Be avîlanô thak êkô ni bidong vo anô lêk kômbôk lepla te amî. bêng anông îmô, metom loho te mî nimbutak mavî amî. Me Elisa hevong anô long bôyang te be ya athêng nena Naiman nang Silia yom hivutak mavî."

28 Me avîlanô takatu be îmô melak yeng elaŋô ambô takêng be leŋing maning kambom. 29 Me iviyôva me êv Yisu vê hêk ining melak lông êng. Me imuthing inda hê hêndêng dum atu be elav melak lông hîmô ya dang vo îthô yêni vôkê îndôk bôŋdang. 30 Metom Yisu hêv i vê hêk loho lîvông me heveng be hê.

31 Yôv me Yisu hîlôk be hê Kapenaom nang Galili. Sabat me hîndông avîlanô. 32 ✝4:32 Mat 7:28-29Avîlanô elaŋô be esong kambom ethak ya ambô atu be hîndông loho vômbê nena, ya ambô êng me lêklokwang anông.

33 Melak yeng êng me anô te atu be gôk lêlêik hîmô hiving yêni be helam kaêk lêkwaê nena, 34 "Aê. Yisu nang Nasalet, hôlêm vo nombong ômbête ethak yoô? Hôlêm vo numbuling yoô mesa? Ya hayala ong. Ong me Wapômbêng ya Anô Matheng."

35 Metom Yisu hethang gôk kambom êng be henang nena, "Ong bonong me notak ôpitu." Me gôk kambom êng hevong be ôpêng hêv yak îlôk pîk hêk loho lîvông me hetak ôpêng be hê me mî hivuling ôpêng amî.

36 Me avîlanô sapêng esong kambom be enang ethak i nena, "Ambô alête tiêng? Yêni henang ethak gôk lêlêik hîtôm anô lêk athêng bêng be ya ambô me lêklokwang anông be gôk lêlêik elaŋô be ele yêing be ê." 37 Be ya kôkôthing takêng hê heveng long bêng êng sapêng.

38 Me Yisu hetak melak yeng be hê Saimon ya melak. Me Saimon yaŋavî hevong kômbôk vovang bêng be hêk. Me loho nang ik Yisu ling vo nêŋgêv yêni livung. 39 Êng me Yisu hê bidong vo avî êng me hesok kômbôk êng me kômbôk êng hetak yêni. Me ketheng oyang me hiviyô be hê me hepesang nôm vo loho.

40 Hêndêng wakma wak hê hîlôk me Sabat yandang me avîlanô iwa ŋa lêk kômbôk lomaloma êyô vo Yisu. Me hetak bang hêyô hêk ŋa êng tomtom me sapêng ivutak mavî. 41 ✝4:41 Mat 8:29; Mak 3:11-12Me hevong be gôk kambom etak avîlanô bêng anông be ele yêing be elam nena, "Ong Wapômbêng Nakandung." Gôk kambom takêng eyala nena yêni me Mesaya, be ditu hethang loho lêklokwang be loho bonong.

42 Lêkbôk momaŋaning me Yisu hetak long êng me hê long thiliv. Me avîlanô ethalo yêni hele be êpôm yêni. Me loho vong vo embalong yêni long vo dô netak loho bini bôyang andô. 43 Metom henang nena, "Tem yana vo ya nang Ambô Mavî ethak Wapômbêng ya lêkliŋyak bêng êndêng avîlanô melak yang imbing, vômbê nena hethak ondong iti yom me Wapômbêng hêv ya be ya halêm." 44 ✝4:44 Mat 4:23Êng me hê Judia ining melak yeng tomtom me henang Wapômbêng ya ambô hêndêng loho.