Mateus 2

Ŋa lêkauk ethak môtôp ê êyê Yisu

1 Malia bôk hevathu Yisu yôv hêk Betlehem nang Judia. Waklavông êng me Helot hîmô hîtôm king. Hêndêng wakma êng me ŋa lêkauk ethak môtôp nang long wak ethak êlêm Jelusalem 2 ✝2:2 Nam 24:17me enang ik ling nena, "Sêik lêkmuk atu be hivutak hîtôm ŋa Juda ning king, talêmbô hevathu hêk êsê? Yoô yê ya môtôp hivutak long wak ethak be yoô lêm vo aŋgêv yeng ethak yêni."

3 Me king Helot lêk avîlanô Jelusalem sapêng elaŋô ambô êng be leŋing malêing. 4 Tomêng me Helot helam ŋa bêŋbêng îmbôk da lêk kîdôŋga ambô balambung sapêng ethak tom. Me henang ik loho ling nena, "Mesaya atu tem embathu injêk êsê?" 5 Me loho nang viyang nena, "Tem embathu injêk Betlehem nang Judia hîtôm Wapômbêng bôk henang be plopet te bôk hekavu nena,

6 ✝ 2:6 Jon 7:42 " ‘Ong Betlehem atu be hômô Juda ning pîk,

anômbêng te tem nimbutak nang ong be neyaŋging yînîng avîlanô Islael

îtôm boksipsip ining alang,

be ditu ong mî melak lông oyang te hîmô Juda ning pîk lîvông amî. Mî anông!’ "

7 Yôv me Helot helam ŋa lêkauk takatu menang oyang êlêm vo nendaŋô nena aŋgête ditu môtôp êng hivutak. 8 Helaŋô yôv me hêv loho be ê Betlehem me henang nena, "Môlô nu me othalo sêik kasek êng katôyang. Be môlô tung yêni me ondelêm onang ethak ya vo yanaŋgêv yeng ethak inda imbing."

9 Loholaŋô king ya ambô yôv me loho ê. Me êyê môtôp atu be hivutak long wak ethak me himung be hê hele be hêyô heva long atu be sêik kasek êng hêk ya viling. 10 Wakma loho yê môtôp atu me loho leŋing mavî bêng anông. 11 ✝2:11 Sng 72:10-15; Ais 60:6Be ditu loho vutak êyô melak kapô be ê me êyê sêik kasek atu lo talêmbô Malia. Êng me eya veŋiŋbudum thîvô me ikum be êv yeng ethak yêni. Me ik ining alepa kê be êv nômkama mavî mavî îtôm ining leŋing mavî hêndêng yêni. Êv gol lêk paola be sanda. 12 Me êyê navîng te nena Wapômbêng henang ethak loho vo dô endeni êyô vo Helot ethak loŋbô andô. Êng me elom loŋdaŋlê yang be ê ning long hethak loŋbô.