Mateus 26

Ŋa bêŋbêng ethalo auk vo iŋgik Yisu vônô

1 Wakma Yisu henang ambô nômbêng êng yôv me henang ethak ya ŋa hîndông nena, 2 ✝26:2 Etak Ijip 12:1-27; Mat 20:18"Môlôyala nena wak yi hêk denang vo nêyô Waklavông Hêv Lîlîng*26:2 Hêndêng Waklavông Hêv Lîlîng me ŋa Juda leŋing êv sêmbôk be Wapômbêng ya aŋêla hik avîlanô Ijip ning sêik mung sapêng vônô. Metom loho ŋa Juda me aŋêla hêv lîlîng be hele be hê me mî hik loho ning sêik te vônô amî.. Hêndêng waklavông êng me tem etak Anô Ya Nakandung îndôk ŋakyo baheŋing vo iŋgik yêni vônô ethak alovalasing."

3 Yôv me ŋa bêŋbêng îmbôk da lêk avaka ethak tom hîlôk kwandôk bêng hîmbôk da, ôpatu be ya athêng nena Kaiapas ya melak popatîng. 4 Me ethalo loŋdaŋlê vo embalong Yisu menang oyang be iŋgik yêni vônô. 5 Metom loho nang nena, "Dô aômbong nôm ti êndêng Waklavông Hêv Lîlîng îndôk avîlanô maleŋing andô, endekeme loho leŋing maning be embong vovak."

Avî te heŋgathô nôm uv mavî hêyô hîmô Yisu kwandôk

6 Hêndêng wakma êng me Yisu hêyô Betani be hîmô Saimon ôpsêmbôk be hiwa kômbôk lepla ya melak. 7 ✝26:7 Luk 7:37-38Me Yisu heyang nôm îmô me avî te hêyô hethak melak kapô. Avî êng hiwa kolopak kêkêlô te lêk nôm uv mavî hîmô kapô be ya vuli me bêng anông be heŋgathô hêyô hîmô Yisu kwandôk.

8 Yisu ya ŋa hîndông êyê nôm êng me leŋing maning be enang nena, "Bisête be hivuling nôm uv mavî ti be heŋgathô itup hê oyang? 9 Hîtôm nêŋgêv vo anô yang êŋgêv vuli me nimbua valuseleng bêng be nêŋgêv êndêng avîlanô siv."

10 Yisu helaŋô loho ning ambô êng me henang nena, "Bisête be môlô êv malêing hêndêng avî tiêng? Yêni hevong nôm mavî anông hêndêng ya. 11 ✝26:11 Lo 15:11Avîlanô siv tem îmô imbing môlô îtôm wak nômbêng iti sapêng. Metom tem mî ya mô imbing môlô vambô amî. 12 Avî ti heŋgathô nôm uv mavî hêyô hîmô ya vo hepesang ya leŋving kôpik vo endav ya. 13 Ondaŋô! Ya hanang avanông ethak môlô nena pîk nômbêng atu be enang Ambô Mavî heveng me tem enang ethak nôm atu be avî ti lêk hevong iving vo avîlanô leŋing êŋgêv ya kôkôthing."

Judas hevak ambô vo nêŋgêv Yisu êndêng ŋa bêŋbêng

14 Yôv me Judas Iskaliot, Yisu ya ŋa hîndông lauming be lahavôyi takatu te, hê hêndêng ŋa bêŋbêng îmbôk da 15 ✝26:15 Sek 11:12; Mat 27:3me henang nena, "Tem ya hatak Yisu îndôk môlô bahemim, metom tem môlôŋgêv ômbête êndêng ya?" Êng me loho iwa valuseleng silva hîtôm 30 thô be êv hêndêng yêni. 16 Tomêng me Judas hethalo loŋdaŋlê vo netak Yisu îndôk loho baheŋing.

Yisu heyang Waklavông Hêv Lîlîng ya nôm hiving ya ŋa hîndông

17 ✝ 26:17 Etak Ijip 12:14-20 Waklavông Eyang Polom Yis Mî ya wak ali mung hêyô. Me Yisu ya ŋa hîndông ê hêndêng inda me enang ik yêni ling nena, "Lemêv tem yoôna melak alê vo yoô pôpêk nôm leŋing êŋgêv Waklavông Hêv Lîlîng îndôk?" 18 Me henang nena, "Môlô nu melak lông kapô me tem utung anô te me onang ethak yêni nena, ‘Kîdôŋga henang nena ya wakma atu me lêk bidong. Be yêni lêk ya ŋa hîndông tem êlêm yong melak vo injang nôm leŋing êŋgêv Waklavông Hêv Lîlîng.’ " 19 Me ya ŋa hîndông evong hîtôm henang be loho ê me epesang nôm Waklavông Hêv Lîlîng.

20 Yathiŋdang momaŋaning hêyô me Yisu heyang nôm hîmô hiving ya ŋa hîndông lauming be lahavôyi takatu 21 loho eyang nôm îmô denang me henang nena, "Ya hanang avanông ethak môlô nena môlô te tem netak ya îndôk ŋakyo baheŋing." 22 Me loho kapôlôŋing malêing kambom be loho tomtom enang nena, "Anômbêng, betha ya mî mesa?" 23 ✝26:23 Sng 41:9Êng me Yisu henang viyang nena, "Ôpatu be hetak bang hîlôk belev hiving ya ditu tem netak ya îndôk ŋakyo baheŋing. 24 Anô Ya Nakandung teni îtôm bôk ekavu yôv hethak yêni. Metom alitakna. Malêing bêng vo ôpatu be tem netak Anô Ya Nakandung îndôk ŋakyo baheŋing. Betha talêmbô bôk nembathu yêni amî, êng me tem mavî vo inda!"

25 Me Judas, ôpatu be tem netak Yisu îndôk ŋakyo baheŋing, henang ik ling nena, "Kîdôŋga, betha ya mesa?" Me Yisu henang nena, "Hîtôm ditu honang."

Yisu hêv polom lêk waing hêndêng ya ŋa hîndông

26 Loho eyang nôm hîmô me Yisu hiwa polom te be henang la mavî hêndêng Wapômbêng. Yôvêm me hekavli be hêv hêndêng ya ŋa hîndông me henang nena, "Môlômbua be oŋgwang. Diti me yînîng vathiap." 27 Yôvêm me hiwa keyek lêk waing be henang la mavî hêndêng Wapômbêng. Me hêv hêndêng loho be henang nena, "Môlô sapêng unum îndôk keyek iti. 28 ✝26:28 Etak Ijip 24:8; Jer 31:31-34; Sek 9:11; 1Ko 10:16Diti me yînîng lêkma atu be tem neŋgathô vo nembak tava imbing Wapômbêng lêk avîlanô pîk iti vo nêŋgêv avîlanô bêng anông ining kambom vê.