1 Lan’yööl, asànaa mɛ ŋakwo in’fàyööl mɛ Klistɔ.

2 Mɛ amàlakan: bɛ làfàyɔbà mɛ unsà indiir byanswà anà mulab nswɛɛŋ asànaa kàlalɔŋ mɛ. 3 Apanà, mɛ in’kwen naa bɛ làyöb abà: Klistɔ wà mfum a mbuur wanswà, baal wà mfum a un’kaar, Nzam wà mfum a Klistɔ. 4 Baal wanswà afàyamà, itàkal afàtà ngɔɔm, un’tswe wàŋàfwee, nde afàpà nswɛn akà mfum ande. 5 Wɛɛ un’kaar wanswà afàyamà, itàkal afàtà ngɔɔm, un’tswe wà ipɔl, nde afàpà nswɛn akà mfum ande, ntɔn yà asànaa ntswee ande yàŋàkɔɔl. 6 Isàkal naa un’kaar ufwee anki un’tswe, wɛy bun’kɔɔl ntswe! Wɛɛ, isàkal naa yà nswɛn ntɔn un’kaar bun’tsül itàkal bun’kɔɔl ntswe, wɛy nde ubwäär itàmbalà! 7 Abun, baal ufwe anki un’tswe ande, nde wà ifà anà làkoo a Nzam, wɛɛ un’kaar wà làkoo a baal. 8 Ntɔn, kà baal anki bàtwey amu un’kaar, wɛɛ un’kaar bàtwey amu baal. 9 Baal bun’kyer anki ntɔn un’kaar, wɛɛ un’kaar bun’kyer ntɔn baal. 10 Lalan, un’kaar akyer abwaar isii a ikɔ̈b kà un’tswe ande, ntɔn akyeey. 11 Apan, un’kaar ukaabà anki anà baal, baal sye ifà imwɛy akà un’kaar, uboo a Mwol. 12 Ntɔn, isàkal naa un’kaar bun’twey amu baal, baal sye un’kaar kàmubɔr, yanswà yan’fà akà Nzam.

13 Làtsül bɛ ŋakwo, nkye yubwaŋ naa un’kaar uyamà Nzam ukɔɔn afwe un’tswe? 14 Nkye mɛɛn ŋakwo ifàlalɔŋ anki naa làkoo latɛy akà baal mukal anà ntswe a bwɛlàbwɛl? 15 Kyekà yà làkoo akà un’kaar, ntɔn ntswe bun’pɛ musyääl asànaa itàmbalà. 16 Wɛɛ isàkal naa mbuur akwen mutɔn nkääl ayi, bi ifà aki kyatɛy, itàkal kà Ikööŋ a Nzam sye.

17 Ntɔn ndaa ilääb yi, mɛ alakan anki, ntɔn nköŋ làfàsà bɛ, ya ifàlakyer anki ubwaŋ, wɛɛ ube. 18 Musɛmà, mɛ an’wem naa ye anà nkaabà uboo a bɛ umpal làfàsà bɛ nköŋ, mɛ an’kyey ikikye naa yà ndandaa: 19 yàkäl ubwaŋ naa nkaabà ikäl uboo a bɛ, ntɔn muyöb naa bànà abà aŋàlàkwikilà a ndandaa. 20 Wɛɛ umpal làfàkal bɛ u nköŋ, bɛ kà isaa a Mwol anki làfàdyà. 21 Ntɔn, utaaŋ adyà, mbuur mbuur afàdüül muwal isaa aŋàsöön ukɔɔn ayɔbà bumwɛy. Abun, umwɛy we anà ngyal, umpal wumwɛy wàmuyɔr. 22 Nkye bɛ ndwà yatɛy ntɔn mudyà anà munwà? Itàkal naa, nkye bɛ làbɛyà Ikööŋ a Nzam anà làkwen mumɛɛy baar bàkɔ̈ɔ̈n undiir nswɛn? Ininà mɛ alakyään? Nkye mɛ in’kyer alasyäŋà? Aay, u ndaa ayi, mɛ alàsyaŋà anki.

23 Ntɔn, le an’lɔɔŋ kàwɛl mɛ akà Mwol anà kàlalɔŋ mɛ: Mwol Yɛsu, u mpib bun’yälà, nde kàwɛl làmpà, 24 ungö mufuur an’tɔɔn, nde kàtsül la, waa kàtɛn naa: « Yi yà ndür amɛ, ayà ntɔn bɛ, làkyerà abà muyɔbà mɛ. » 25 Nde kàkyer abun, nde kàwɛl kɔɔb, ungö udyà mutɛn naa: « Kɔɔb là, là Nkwà akün unsà an’kil amɛ. Làkyer abun taaŋ lanswà làyanwaa bɛ, ntɔn muyɔbà mɛ. » 26 Ntɔn, taaŋ lanswà làdyaa bɛ làmpà alà anà lànwaa bɛ kɔɔb alà, bɛ làwàmukyään nkweel a Mwol, tii mpal usyefurà nde.

27 Lalan, mbuur wanswà asàdyà làmpà itàkal asànwà kɔɔb a Mwol ukɔɔn akal wàŋàpɔŋà, nde asàkal wàŋàlɛl kusà a ndür anà an’kil a Mwol. 28 Wɛy mbuur mbuur uler mpem ande ŋakwo kusà mudyà làmpà alà anà munwà kɔɔb alà. 29 Ntɔn mbuur adyaa anà anwaa ukɔɔn asà ndür nsɔ̈ɔ̈l, wàmudyà anà wàmunwà mbar ande ŋakwo. 30 Kyakin, uboo a bɛ bàŋukyal anà aŋatoo bà mbɔɔn, anà ndam yumwɛy yàkyàkwà. 31 Isàkal naa bi kan’syebà bi ŋakwo, bi nsaŋ bàlitsüül anki. 32 Wɛɛ Mwol afitsüül nsaŋ ntɔn mukifuur u mbwo, ntɔn bàkɔɔn akitsüül mbar mbwo mwɛy anà mɛɛn.

33 Kyakin, atɔŋ amɛ, utaaŋ làfàtüüb bɛ ntɔn mudyà, làdil bamwɛy anà bumwɛy. 34 Isàkal naa mbuur we anà ngyal, wɛy nde udi u ndwà ande, ntɔn nköŋ abɛ ikɔ̈ɔ̈n akàlatwääl ntaaŋàmbar. Ntɔn indiir byumwɛy, mɛ insàlɔ̈ɔ̈n utaaŋ in’sàyà mɛ.