Ndür mwɛy, itiir mbɔɔn
12 Ndür yà mwɛy, itàkal naa itiir byà mbɔɔn. Wɛɛ itiir a ndür byanswà, itàkal naa bya byà mbɔɔn, bya ikyerà ndür mwɛy mpɛl. Abà, ya sye yà asànaa Klistɔ. 13 Ntɔn, bi banswà kàwɛl ndüümà unsà Dweelà mwɛy mpɛl amu ndür mwɛy mpɛl, itàkal Ayudà itàkal Angɛlɛki, asɔ itàkal baar a nsaay, bi banswà kànü unsà Dweelà mwɛy awunà.
14 Abun, ndür kà yàŋàkyer anki itiir mwɛy mpɛl, wɛɛ yà itiir mbɔɔn. 15 Isàkal naa làkɔl lan’tɛn naa: « Asànaa mɛ kà in’wà kɔɔ anki, mɛ uboo a ndür watɛy », nkye la làkyer ayàlwomà mukal itiir a ndür? 16 Isàkal naa tsü lan’tɛn naa: « Asànaa mɛ kà dii anki, mɛ kà in’wà uboo a ndür anki », nkye la làkyer ayàlwomà mukal itiir a ndür? 17 Yàlàkal naa ndür yanswà ikäl dii, ngweem ilàkal ken? Yàlàkal naa ya yanswà ikäl tsü, usɔŋ bàliweemà ken? 18 Wɛɛ Nzam kàsi itiir itiir unsà ndür, asànaa kàkwen nde. 19 Yàlàkal naa byanswà ikäl itiir mwɛy mpɛl, ndür yàlàkal ken? 20 Apà, itiir byà mbɔɔn, wɛɛ ndür yà mwɛy mpɛl.
21 Dii taaŋ atɛn tɛy a kɔɔ naa: « Mɛ mfun a ngye yatɛy », itàkal un’tswe utɛn a in’kɔl naa: « Mɛ mfun abɛ yatɛy. » 22 Kyekà, itàkal itiir a ndür ifàmɛnà naa bya byà gyɔ̈ɔ̈là gyɔ̈ɔ̈là, bya byà mfun, 23 abyà ifàman bi naa ndöŋ a mbɔɔn byatɛy u ndür, akà bya bi ifàpà nsyäŋà aŋàsöönà. Abyà ifàman bi naa bya ntwɛn yatɛy, bi bya ifàlɔ̈ɔ̈n ubwaŋàbwaŋ, 24 kyekà, itiir abye anà ntwɛn, byàfàkal anki anà mfun mulɔɔn bya. Wɛɛ Nzam ndür kàboom naa nsyäŋà mbɔɔn ikäl akà itiir abyà ifàmɛnà naa bya ndöŋ byatɛy: 25 ntɔn nkaabà ikɔ̈ɔ̈n akal u ndür, wɛɛ itiir byanswà ikäl ngyal mwɛy bamwɛy anà bumwɛy. 26 Isàkal naa itiir imwɛy kyà anà usaay, itiir byanswà byan’kab usaay aban. Isàkal naa itiir imwɛy bàmusyäŋà, itiir byanswà byan’saŋ anà nde.
27 Kyekà, bɛ làbà ndür a Klistɔ, umwɛy umwɛy wà itiir a ndür ande.
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)