1 Coríntios 16:13,14 | Versão YNS

Ngim bàköŋà ntɔn Ikööŋ a Yɛlusàlɛm

1 Ntɔn ndaa a an’kab bàköŋà ntɔn aŋin’kyɛɛl, bɛ sye làläb nswɛɛŋ kàpɛ mɛ akà Ikööŋ a Ngalàtyà. 2 Kà ilä atàtwɛb kyà mpɔsà wanswà, wɛy mbuur mbuur usi ukɔl u ndwà ande undiir kàkwe nde muyee ntɔn mukɔɔn adil ngyeel amɛ mukɔŋ an’kab. 3 Utaaŋ in’yàkal mɛ akun, mɛ in’yàtɔm baar làyàsɔɔl bɛ anà in’kaan ntɔn musyen an’kab abɛ u Yɛlusàlɛm. 4 Isàkal naa yà ubwaŋ sye naa mɛ ŋakwo in’kyen, ba bàsàkyà anà mɛ.

An’kyän a Pɔl muyilyaaŋ

5 Mɛ in’yàyà akà bɛ musoonà Masɛdwan, ntɔn mɛ in’yàlyaaŋ kwo. 6 Taaŋ lumwɛy mɛ in’yàkal ndam a ilä itàkal paŋà a mpyee lanswà apà bɛ, ntɔn bɛ lan’pɛ indiir byan’kwo mɛ mulab mbwo amɛ. 7 Mbalà ayi mɛ in’kwen anki, mukàlaman taaŋ alyaaŋ mɛ mpɛl, mɛ in’kwen mubwaay anà bɛ ndam a ilä, isàkal naa Mwol an’pà mbwo.

8 Wɛɛ mɛ in’yàbwaay u Ɛfɛsɔ tii kà un’kyɔm a Pantɛkɔt, 9 ntɔn mbwo a kölàköl yan’dubà ntɔn mɛ mukyer isal a ngwal, itàkal naa ayiiŋ bà mbɔɔn.

10 Isàkal naa Tumàtɛ kan’yà, làkyer naa nde ukäl anà duu uboo a bɛ, ntɔn nde afàkyer isal a Mwol asànaa mɛ. 11 Abun, wɛy mbuur ukɔ̈ɔ̈n un’bɛy. Lun’pɛ byàŋàkwo ntɔn nde uyàfurà apà mɛ, ntɔn mɛ anà atɔŋ ibà mukun’dilà.

12 Ntɔn un’tɔŋ abi Apɔlɔs, mɛ kun’lɛɛl muyà akà bɛ anà atɔŋ bumwɛy, wɛɛ nde ukwen anki akà ikikye muyà apanà, nde asàyà mpal usàman nde mbwo.

Nswɛɛŋ anà mbɔr a ntsüü

13 Làkäl kà igyɛɛŋ, làkäl aŋàtsim unsà làkwikilà, làkäl anà un’kanà, làkäl ngwal. 14 Làkyer indiir abɛ byanswà unsà ukwen.

15 Atɔŋ, nswɛɛŋ yumwɛy ayi: bɛ làkyàyöb naa Sɛràfan anà ywar ande bà baar atàtwɛb mubuul mpem kà Akayi. Ba bàpɛ mɔ̈ɔ̈ aba musyääl aŋin’kyɛɛl. 16 Lakyey, baar atub abà anà mbuur wanswà akääbà isal aba anà mpay aba.

17 Mɛ in’we anà un’sak muman Sɛràfan, Fɔrtünatüs anà Akayiküs. Ba bàfwe nkɔ̈ɔ̈n abɛ, 18 ntɔn ba bàlɛɛl mɛ anà bɛ. Làyöb mukan baar atub abà.

19 Ikööŋ a Azi byàmàlapà mbɔr. Akilas anà Priskà, anà Ikööŋ ifàköŋ u ndwà aba bàmàlatöm mbɔr mbɔɔn unsà Mwol. 20 Atɔŋ banswà bàmàlapà mbɔr.

Làpɛɛl mbɔr bɛ a bɛ unsà ndüür a in’kyɛɛl.

21 Mbɔr ayi yà kɔɔ amɛ ŋakwo, mɛ Pɔl.

22 Isàkal naa mbuur ukwen anki Mwol, wɛy nde ukäl aŋàküül!

Mwol abi, yà!

23 Wɛy kab a ngway a Mwol Yɛsu làkäl anà bɛ.

24 Mɛ bɛ banswà in’kyàlakwen amu Yɛsu Klistɔ.

Bíblia Online

1 Coríntios 16

Veja também

O que é o Espírito Santo e qual é o seu papel na vida cristã?

Oração para pedir a Deus que aumente a fé quando o coração está cheio de dúvida