1 Coríntios 4:20 | Versão YNS

Antööm a Yɛsu

1 Abun, wɛy bi iwɛl asànaa asyääl a Klistɔ, abye anà buur a an’yee a Nzam. 2 Kyekà, undiir a ntsüü bàlɔɔmà akà baar abye anà buur abà naa ba bàkäl bàlää. 3 Akà mɛ, mɛ undiir in’manà anki naa bɛ làn’tsüül nsaŋ, itàkal naa làbay a nsaŋ a mɛɛn mà. Mɛ in’fàfàtsüül anki nsaŋ mɛ ŋakwo. 4 Ndandaa, an’kyän amɛ mà a duu, wɛɛ wa kà undiir atwey mɛ wàbalàbal anki. Mwol wà mbuur atsüül mɛ nsaŋ. 5 Kyakin, twon lan’tsul nsaŋ kusà a taaŋ alà bàsi, làdil mpal usàyà Mwol. Nde mbuur asàsà u pɛɛlà ndaa aŋàyee u làpib anà asàmɛɛy an’kyän aŋàyee mà mpem a baar. Apan, mbuur mbuur asàwal akà Nzam nsyäŋà yan’kwo akà nde.

6 Ntɔn bɛ, atɔŋ, waa mɛ kàswɛŋ indiir abi ifà asin, musyääl bya akà Apɔlɔs anà akà mɛ ŋakwo, ntɔn u mbaan abi, bɛ làlɔŋàkà muyöb an’kyän amà unsà indiir abi: « Yà ubwaŋ naa bɛ làkɔ̈ɔ̈n asoobà ndel a Ndaa Aŋàsɔn. » Wɛy naa akà mbuur mwɛy ukɔ̈ɔ̈n akyey uyɔl muwɛɛl mbuur mwɛy anà mutɔn wumwɛy. 7 Abun, nà kasɛɛn? Ininà ngye awe awà mpa kàwɛl ngye? Isàkal naa ya yà abwɛy, ntɔn nkye musɛn an’pɛy asànaa ngye wa kàwɛl anki?

8 Bɛ làkyàyuur itaan! Bɛ làbà aŋun’naaŋ fà itaan! Bɛ làsɛmà muyaal ukɔɔn bi! Ndandaa, mɛ in’kwen naa bɛ làsɛmà uyaal, ntɔn bi sye ikwe muyaal mbwo mwɛy anà bɛ! 9 Ntɔn, mɛ in’sii naa bi antööm Nzam kàkisà kà ikal a ngöngö, asànaa baar batsüül mbar a ukwà: bi bàkibuul indiir atääŋ ntɔn mɛɛn, ntɔn akyeey anà ntɔn baar. 10 Bi ibà aŋukɔŋ ntɔn Klistɔ, wɛɛ bɛ, bɛ làbà aŋayeerà amu Klistɔ, bi ibà bàgyɔ̈ɔ̈là, bɛ làbà ngwal, bɛ làbà unsà ibyääl, bi bàkimɛɛy nswɛn. 11 Tii mpal ayi, bi ibye anà ngyal, bi ibye anà mfwää, bi ibà nsàpɔl, bi bipɛ mpay, bi ibà iwɔŋ, 12 bi kan’man mpay musal a an’kɔɔ abi. Bàmukitoo, bi ibàmusaak, bàmukimɛɛy nkwaaŋ, bi kan’tsim, 13 bàmukàyiküür ndaa, bi ibàmulɛɛl. Tii papanà bi kàkyàbulà indiir a mbin a mɛɛn, nkayäl a baar banswà.

14 Mɛ inkàlasöönà anki indiir abi ntɔn mukàlamɛɛy nswɛn, wɛɛ ntɔn mukàlaweey asànaa baan amɛ bànkween. 15 Ntɔn, itàkal naa bɛ làbye anà alɔɔŋ nsaab kwem amu Klistɔ, bɛ làbye anki anà bàtaa mbɔɔn. Ntɔn mɛ in’wà mbuur kàlabör amu Klistɔ Yɛsu u mbwo a Làsaŋ Aŋàbwaŋ. 16 Abun, mɛ amàlalɔɔm, làläb mbaan amɛ. 17 Kyakin, mɛ kàlatööm Tumàtɛ, awà mwan amɛ wànkween anà wàlää unsà Mwol. Nde ayàlayɔɔb in’kɔɔn amɛ myà mɔ̈ɔ̈ amu Klistɔ, asànaa in’fàlɔŋ mɛ mper yanswà, uboo a Ikööŋ byanswà.

18 Kyekà, muyweer naa mɛ in’yàyà anki akà bɛ, amwɛy uboo abɛ bàyööl a uyɔl. 19 Wɛɛ isàkal naa Mwol kan’kwen, itaan a mbɔɔn tɛy mɛ in’kyer ayàyà akà bɛ. Mɛ kà in’yàyöb ntwetweey a aŋuyɔl bà anki, wɛɛ ngwal aba! 20 Ntɔn Imwol a Nzam kà kyà ndaa anki, wɛɛ kyà ngwal. 21 Ininà bɛ làkwen? Nkye mɛ in’yi akà bɛ anà an’füm itàkal anà ukwen unsà dweelà a làbɔ̈ɔ̈n?

1 Coríntios 4

Antööm a Yɛsu

Veja também

O que é o Espírito Santo e qual é o seu papel na vida cristã?

Oração para pedir a Deus que aumente a fé quando o coração está cheio de dúvida