Mpɛɛl a ndür ntɔn làkoo a Mwol
12 « Mɛ in’we anà ikɔ̈b mukyer indiir byanswà », wɛɛ indiir byanswà ndöŋ byatɛy. « Mɛ in’we anà ikɔ̈b mukyer indiir byanswà », wɛɛ mɛ in’kyey anki naa undiir mwɛy kan’yaal. 13 « Isaa byà ntɔn an’bäl, an’bäl mà ntɔn isaa. » Nzam asàdwa amwɛy asànaa wumwɛy. Wɛɛ ndür kà yà ntɔn mukyer ndaa a nswɛn anki, wɛɛ ntɔn Mwol, Mwol wà ntɔn ndür. 14 Kyekà, Nzam, mbuur kàwiiy Mwol, Nde asiwiiy sye unsà ngwal ande.
15 Nkye bɛ làyöb anki naa ndür abɛ yà itiir a ndür a Klistɔ? Apan, nkye mɛ an’kwo in’wɛl itiir a ndür a Klistɔ ntɔn mubuul bya itiir a ndür a ndaa a nswɛn? Akà ikikye! 16 Nkye bɛ làyöb anki naa mbuur usàtüüb anà un’kaar a pasàsɛ, ba ban’bulà ndür mwɛy? Ntɔn bàtɛn naa: « Ba bàbɔ̈ɔ̈l bàsàbulà ndür mwɛy. » 17 Wɛɛ mbuur awà un’tüüb mwɛy anà Mwol, nde sye wà dweelà làmwɛy anà nde.
18 Làtiin ipasàsɛ. Man’be asin asin manswà ukyer mbuur mà u nsà a ndür ande. Wɛɛ mbuur afàkyer ndaa a nswɛn afàkyer man’be u ndür ande ŋakwo. 19 Nkye bɛ làyöb anki naa ndür abɛ yà ndwà a Nzam a Dweelà Inkyɛɛl awà amu bɛ anà kan’fà akà Nzam ntɔn bɛ, anà bɛ làfàkal anki bàbɛ ŋakwo? 20 Wɛɛ bɛ bàkyer alasom a ntal mbɔɔn. Lun’si Nzam làkoo u mbwo a ndür abɛ.