1 Coríntios 6:13 | Versão YNS

Nsaŋ uboo atɔŋ

1 Isàkal naa umwɛy uboo abɛ we anà syee anà un’tɔŋ wumwɛy, aben làkàtsul bɛ la akà antɛɛn mpa abà balàbal, akwànaa akà aŋin’kyɛɛl? 2 Nkye bɛ làyöb anki naa aŋin’kyɛɛl bàsàtsüül mɛɛn nsaŋ? Isàkal naa bɛ làsàtsul nsaŋ a mɛɛn mà, nkye bɛ làkwo anki mutsul binsaŋ a bunàbun bi? 3 Nkye bɛ làyöb anki naa bi isàtsul nsaŋ a akyeey? Waa nsaŋ a mɔ̈ɔ̈ wà isikɔ̈ɔ̈n? 4 Abun, mpal làbà bɛ anà nsaŋ atub ayi, nkye bɛ làfàwal baar a bunàbun uboo a Ikööŋ mutsul ya? 5 Mɛ in’tɛɛnà a nswɛn abɛ. Nkye akà ŋan’yeerà mwɛy uboo a bɛ watɛy mutsul nsaŋ uboo a atɔŋ ande? 6 Wɛɛ, nkye un’tɔŋ akàfüün un’tɔŋ ande akà baar bàkɔ̈ɔ̈n làkwikilà?

7 Kiin mutàkal anà nsaŋ uboo a bɛ, iswaŋà naa bɛ lan’kwà ndwà. Ntɔn nkye mpa làfàkyey bɛ ikwàndwà? Ntɔn nkye mpa làfàkwen bɛ naa bàlapfiy? 8 Wɛɛ bɛ, bɛ làfàkyer ube anà làfàpfiy baar asin. Bɛ ya làfàkyer akà atɔŋ abɛ! 9 Abun, nkye bɛ làyöb anki naa baar mpa abà balàbal bàsàwal anki kwal a Imwol a Nzam? Twon bàlakür: itàkal baar bàfàkyer ndaa a nswɛn, itàkal aŋitɛk, itàkal aŋinswem, itàkal abaal bàfàbulà akaar, itàkal abaal bàfàkal anà abaal, 10 itàkal mbüüb, itàkal aŋàlàmfɛɛl, itàkal ayöör a man, itàkal abweel a in’tswe, itàkal aŋunkaam bàsàwal anki kwal a Imwol a Nzam. 11 Làler indiir bàkäl amwɛy uboo a bɛ. Wɛɛ bɛ bàkyàlasɔŋ, wɛɛ bɛ bàkyàlabuul bàŋin’kyɛɛl, wɛɛ bɛ bàlatwey bàbalàbal kà ikɔb a Mwol Yɛsu Klistɔ anà u mbwo a Dweelà a Nzam abi.

Mpɛɛl a ndür ntɔn làkoo a Mwol

12 « Mɛ in’we anà ikɔ̈b mukyer indiir byanswà », wɛɛ indiir byanswà ndöŋ byatɛy. « Mɛ in’we anà ikɔ̈b mukyer indiir byanswà », wɛɛ mɛ in’kyey anki naa undiir mwɛy kan’yaal. 13 « Isaa byà ntɔn an’bäl, an’bäl mà ntɔn isaa. » Nzam asàdwa amwɛy asànaa wumwɛy. Wɛɛ ndür kà yà ntɔn mukyer ndaa a nswɛn anki, wɛɛ ntɔn Mwol, Mwol wà ntɔn ndür. 14 Kyekà, Nzam, mbuur kàwiiy Mwol, Nde asiwiiy sye unsà ngwal ande.

15 Nkye bɛ làyöb anki naa ndür abɛ yà itiir a ndür a Klistɔ? Apan, nkye mɛ an’kwo in’wɛl itiir a ndür a Klistɔ ntɔn mubuul bya itiir a ndür a ndaa a nswɛn? Akà ikikye! 16 Nkye bɛ làyöb anki naa mbuur usàtüüb anà un’kaar a pasàsɛ, ba ban’bulà ndür mwɛy? Ntɔn bàtɛn naa: « Ba bàbɔ̈ɔ̈l bàsàbulà ndür mwɛy. » 17 Wɛɛ mbuur awà un’tüüb mwɛy anà Mwol, nde sye wà dweelà làmwɛy anà nde.

18 Làtiin ipasàsɛ. Man’be asin asin manswà ukyer mbuur mà u nsà a ndür ande. Wɛɛ mbuur afàkyer ndaa a nswɛn afàkyer man’be u ndür ande ŋakwo. 19 Nkye bɛ làyöb anki naa ndür abɛ yà ndwà a Nzam a Dweelà Inkyɛɛl awà amu bɛ anà kan’fà akà Nzam ntɔn bɛ, anà bɛ làfàkal anki bàbɛ ŋakwo? 20 Wɛɛ bɛ bàkyer alasom a ntal mbɔɔn. Lun’si Nzam làkoo u mbwo a ndür abɛ.

Bíblia Online

1 Coríntios 6

Veja também

Oração para pedir a Deus que aumente a fé quando o coração está cheio de dúvida

7 atitudes que agradam a Deus segundo a Bíblia