1 Nkye mɛ kà in’wà mbuur a nsaay anki? Nkye mɛ kà in’wà ntööm anki? Nkye mɛ kun’mɛn anki Yɛsu, Mwol abi? 2 Isàkal naa akà baar bumwɛy mɛ kà in’wà ntööm anki, wɛɛ ntɔn làbà bɛ unsà un’tüüb a Mwol, iswaŋà naa ndandaa mɛ in’wà ntööm.

3 Un’kal amɛ kusà a baar bàfan’pɛl awà: 4 Nkye bi ikwe anki mudyà anà munwà? 5 Nkye bi ikwe anki musyen un’klistɔ a un’kaar, asànaa antööm bumwɛy, atɔŋ a Mwol anà Sɛfas? 6 Nkye mɛ mpɛl anà Banàbà ibye anà mbwo mukɔɔn asal? 7 Nà afàsal isal uboo a ità a ngim ande ŋakwo? Nà afàkɔn un’te a vin, ukɔɔn adyà imbɛŋ a wa? Itàkal naa, nà afàdii böl a ngɔɔmà ukɔɔn anwà an’bɛɛl a böl a ngɔɔmà alan?

8 Nkye unsà imbuur mpɛl mɛ in’tɛɛnà indiir abi? Nkye un’kɔɔn sye ufàtɛn anki abwɛy? 9 Kyekà, unsà un’kɔɔn a Mɔsɛ bàsön naa: « Twon an’bäm mun a ngɔɔmà utaaŋ udyaarà wa imbɛŋ. » Nkye Nzam we anà ngyɛb a ngɔɔmà? 10 Nkye nde utɛɛnà anki ntɔn bi mpɛl? Ɛɛ ya bàsön ntɔn bi, ntɔn mbuur afàlem anà mbuur afàtswà imbɛŋ bàkäl anà làkyän muwal kab aba. 11 Isàkal naa bi kàkön indiir a dweelà ntɔn bɛ, nkye yà ndaa a kölàköl naa bi ibwe indiir a mɛɛn mà uboo a bɛ? 12 Isàkal naa baar bumwɛy bàfàsyääl ikɔ̈b aki udu a bɛ, ntɔn nkye mpa ikal kya kyàŋàsöönà akà bi?

Wɛɛ bi, bi kàsyääl anki ikɔ̈b aki. Bi ifàkaŋ mpem ntɔn indiir byanswà, naa tɛy, bi iyàkal asànaa kyà ntɔn Làsaŋ Aŋàbwaŋ a Klistɔ. 13 Nkye bɛ làyöb anki naa baar bàfàsal isal u ndwà a Nzam, ndwà a Nzam ifadii, naa baar bàfàsal u mɛsà bàfàpà ibɔɔn, ba bye anà kab aba unsà undiir bàfàpà baar? 14 Ifà imwɛy, Mwol kàswɛŋ baar bàfàkyään Làsaŋ Aŋàbwaŋ naa udyà aba bà unsà Làsaŋ Aŋàbwaŋ.

15 Wɛɛ mɛ, mɛ kàsàsyääl anki akà ikɔ̈b mwɛy uboo a bya. Kà ntɔn mulɔm bya anki ntɔn mɛ, waa mɛ an’sɔn un’kaan wà. Ubwaŋ mɛ in’yerakwà! Akà mbuur mwɛy tɛy kan’kwo mulwom làkoo amɛ alà! 16 Akà mɛ, ukyään Làsaŋ Aŋàbwaŋ kà undiir muswaŋ ngaal anki, ntɔn kya isal ban’pɛ a ngwal: ngyɛb akà mɛ isàkal naa mɛ Làsaŋ Aŋàbwaŋ in’kyään anki! 17 Kya ilàkal naa isal aki mɛ ŋakwo kàsɔ̈ɔ̈l, mɛ in’kyer alàwal làfur. Wɛɛ, ntɔn an’kyän amà màfü anki akà mɛ, kyakin mɛ in’wà mukölà buur ban’pɛ. 18 Apan làfur amɛ làken? La là ntɔn mukyään Làsaŋ Aŋàbwaŋ là ngway, ukɔɔn asyääl ikɔ̈b kan’paa Làsaŋ Aŋàbwaŋ alà.

19 Ndandaa, itàkal naa mɛ in’wà nsaay kusà a baar banswà, mɛ kàkyer naa mɛ in’bulà un’sɔ a baar banswà, ntɔn musyen baar mbɔɔn akà Mwol. 20 Mɛ kàkäl uboo a Ayudà asànaa un’yudà, ntɔn muwal Ayudà, uboo a baar abà u ngyɛl a un’kɔɔn asànaa mbuur awà ungyɛl a un’kɔɔn, - wɛɛ mɛ ŋakwo in’wà anki ungyɛl a un’kɔɔn, - ntɔn muwal baar abà ungyɛl a un’kɔɔn, 21 uboo a baar bàkɔ̈ɔ̈n un’kɔɔn asànaa mɛ an’kɔɔn un’kɔɔn, - kyekà mɛ in’kɔ̈ɔ̈n anki un’kɔɔn a Nzam, ntɔn Klistɔ wà un’kɔɔn amɛ, muwal baar bàkɔ̈ɔ̈n un’kɔɔn. 22 Mɛ kàbulà ŋàgyɔ̈ɔ̈là ntɔn aŋàgyɔ̈ɔ̈là, ntɔn muwal aŋàgyɔ̈ɔ̈là. Ntɔn baar banswà mɛ kàbulà indiir byanswà ntɔn mutswà mɔ̈ɔ̈ a amwɛy uboo a ba. 23 Kyekà, indiir abi byanswà, mɛ in’fàkyer ntɔn Làsaŋ Aŋàbwaŋ ntɔn mɛ in’wɛl kab uboo mwo.

24 Nkye bɛ làyöb anki naa aŋantiin, ubɔɔ a iboon, ba banswà bàfàtsumà ntiin, wɛɛ umwɛy mpɛl afàwal undiir a ntal? Làtsumà ntiin ntɔn muböŋ. 25 Aŋan’taam a ngwiy banswà bàfàkaŋ mpem unsà ya yanswà, ba bàfàkyer ntɔn muwal mpà ifàtay, wɛɛ bi, ntɔn mpà mpa ifàtay. 26 Abun, mɛ in’tsumà anki ntiin aŋàdübà mii, mɛ in’kam anki iki a bunàbun. 27 Wɛɛ mɛ infàpà ndür amɛ mpay, mɛ infàbuul ya asànaa un’sɔ. Kya naa tɛy, ungö mukyään làsaŋ akà bumwɛy, mɛ ŋakwo in’kɔ̈ɔ̈n awal iböŋ.