1 Pedro 3:1 | Versão YNS | Bíblia Online

Akaar anà adim aba

1 Bɛ akaar sye, làkäl anà unkyeey akà adim abɛ, ntɔn isàkal naa bye anà abaal bumwɛy uboo aba làkwikilà latɛy unsà ndaa a Nzam, waa ba bàsà làkwikilà u mɔ̈ɔ̈ aba ntɔn nkääl aŋàbwaŋ yà akyay aba, 2 unsà nkääl aŋàpɔŋà anà yà làzir abɛ. 3 Wɛy ntwɛn abɛ ikɔ̈ɔ̈n akal nà u nsà mpɛl asànaa: ntswee aŋàtɔŋ, an’yak a wɔl anà ipfɛy a ntal, 4 wɛɛ, wɛy ntwɛn abɛ ikäl yàŋàyee uboo a mpem, ntwɛn ikɔ̈ɔ̈n mbɔ̈ɔ̈n yà dweelà a làbɔ̈ɔ̈n anà làduu, yà ntal a kölàköl u mii a Nzam. 5 Kyakin mbalà yumwɛy, yayi yàkäl mbwäär a akaar in’kyɛɛl abà bàsi làkyän amu Nzam, abà bàkäl anà unkyeey akà adim aba, 6 asànaa Saal kàsi nde làbɔ̈ɔ̈n akà Abàlam anà kun’bel nde naa mwol ande, nde mbuur làbà bɛ baan ande bakaar, mukyer ndaa aŋàbwaŋ anà mukɔɔn akal unsà bɔɔmà.

7 Bɛ adim sye, làkäl anà nkääl a un’tüüb unsà ngwem anà làyöb nsöön a bwääl alye a akaar. Lasi akyay abe làzir, ntɔn ba, asànaa bɛ, ba bà aŋakwal a kab a ngway a mɔ̈ɔ̈, waa akà ndaa mwɛy ikɔ̈ɔ̈n asà lingyoomà uboo a ngyamàkà abɛ.

Nkyeer a ubwaŋ

8 Mumay, làkäl an’kyän an’mwɛy ma, làkal anà ngweem a ngyɛb, làkwen bɛ a bɛ, làkäl anà nsyääm anà làbɔ̈ɔ̈n. 9 Twon làfuur ube udu a ube, itàkal in’tswe udu a in’tswe, wɛɛ làsaak, ntɔn bàlabel ntɔn nsaak, ntɔn muwal kwal a nsaak. 10 Kyakin,

« Wɛy mbuur akwen mɔ̈ɔ̈ anà ilä aŋàbwaŋ,

ukäl unsà igyɛɛŋ mutɛn ndaa a mbe anà mutà loor,

11 uwɛy ube anà ukyer ubwaŋ,

uleŋ duu anà ukäl uboo a la unsà muküünà.

12 Ntɔn mii a Mwol myà udu a baar a balàbal,

anà an’tsü ande mà ipɔl ntɔn muwem ngyamàkà aba,

wɛɛ ntabwey a Mwol ifàpà ngö akà baar bàfàkyer ube. »

13 Nà asàlakyer ube, isàkal naa bɛ làbà ngwal mukyer ndaa aŋàbwaŋ? 14 Itàkal naa bɛ làbà muman mpay ntɔn làfàkyer bɛ ndaa a balàbal, làyöb naa bɛ làbà unsà un’sak. Twon lan’man bɔɔmà a baar bumwɛy anà twon lan’kal udu udu. 15 Wɛɛ làpɛ làkoo akà Klistɔ taaŋ lanswà asànaa Mwol uboo a mpem abɛ. Làkäl ngwal taaŋ lanswà mufuur ndaa aŋàbwaŋ akà baar banswà bàkwen muyöb làkyän alye anà bɛ. 16 Wɛɛ ya ikäl abà unsà duu anà làzir. Làkäl anà an’kyän aŋàbwaŋ ntɔn baar bàfàlatwee, anà bàfàman naa nkääl a Klistɔ uboo abɛ yatɛy, waa ba bàsàman nswɛn. 17 Isàkal naa ba bà ukwen a Nzam, yan’söön ubwaŋ muman mpay ntɔn ubwaŋ làfàkyer bɛ, akwànaa mukyer ube. 18 Kyakin, Klistɔ nde ŋakwo, kàmɛn mpay mbalà mwɛy ya, ntɔn man’be a baar, nde mbuur akɔ̈ɔ̈n man’be, waa kàlakweel, bɛ baar a man’be, ntɔn mukàlapà akà Nzam. Nde bun’dwä unsà ndür ande yà imbuur, wɛɛ bun’fuur u mɔ̈ɔ̈ unsà ngwal a Dweelà In’kyɛɛl. 19 Kyakin kàkyen nde mukàlɔŋ itàkal naa an’dweelà màkäl uboo a bɔlokà, 20 akà baar bàtön mukyey, umpal kàkäŋ Nzam mpem - kà ilä kàtöŋà Nɔwà an’swà amà bàbilà baar ntal ikikye, banswà bàkäl baar naan mpa bàkü uboo a an’dà. 21 Kya kyàkäl idiim a ndüümà akyà ifàlatswà mɔ̈ɔ̈ papanà: kya kà kyà ntɔn mpööŋ a làbiin a ndür anki, wɛɛ ntɔn unkyeey akà Nzam unsà an’kyän aŋàbwaŋ, nde afàlatswà mɔ̈ɔ̈ u mbwo a ngwiiyà a Yɛsu Klistɔ, 22 awà kàkyen du, wà u kɔɔ a ibaal a Nzam, anà bàpɛ sye akà nde muyaal udu a akyeey, aŋikɔ̈b anà aŋangwal.

Bíblia Online

1 Pedro 3

Veja também

Oração para pedir a Deus que aumente a fé quando o coração está cheio de dúvida

7 atitudes que agradam a Deus segundo a Bíblia