2 Coríntios 11

Pɔl anà antööm a loor

1 Aa! Mɛ amàlabɔɔn mukaŋ mpem ntɔn undiir akamɛnà asànaa kikɔŋ amɛ! Ndandaa, làkäŋ mpem ntɔn mɛ! 2 Mɛ in’we anà un’köl ntɔn bɛ, un’köl kan’fà akà Nzam, ntɔn mɛ kàlatɛɛl ntüün a baal mwɛy mpɛl, ntɔn mukàlaswaŋ akà Klistɔ asànaa un’kaar mpa aŋàtàyöb baal, wàŋàpɔŋà. 3 Wɛɛ, mɛ in’we anà bɔɔmà muman naa an’kyän abɛ itäy anà ukwen abɛ ntɔn Klistɔ bàdiimà, asànaa ntäy kàkür nde Ɛva u mbwo a impeenà ande. 4 Kyakin, bɛ làkyer akyeyà ubwaŋàbwaŋ naa mbuur mwɛy uyàlakyään Yɛsu a nsöön a Nde akwà kàlakyään bi. Bɛ làfàkyey sye muwal dweelà anà làsaŋ a nsöön a Dweelà anà Làsaŋ Aŋàbwaŋ làwɛl bɛ akà bi.

5 Kyekà, mɛ in’sii naa mɛ kin’wà kimbuur anki kusà a antööm akwà bàfàkyey naa ba bà baar a baar. 6 Isàkal naa mɛ in’kwo anki unsà tweey, wɛɛ mɛ in’we anà ngyööb. Bi bàkyàlaswaŋ yanswà ubwaŋàbwaŋ amu indiir byanswà.

7 Nkye mɛ kàkyer man’be mutyà mɛ ŋakwo ntɔn bɛ làlär, umpal kàlakyään mɛ a ngway Làsaŋ Aŋàbwaŋ a Nzam? 8 Mɛ kàmay un’naaŋ a Ikööŋ byumwɛy, muwal làfur akà ba ntɔn musyääl bɛ. 9 Umpal kàkäl mɛ akà bɛ, anà kàkäl mɛ anà ngyal a undiir, mɛ kàpɛ anki buur amɛ kan’kɔɔ a mbuur mwɛy, ntɔn atɔŋ bàfü Masɛdwan ban’pɛ undiir wanswà kàkäl mɛ awà mfun. Unsà ya yanswà, mɛ kàkäl kigyɛɛŋ mukɔɔn akal buur ntɔn bɛ, mɛ in’yàlalà abun ubwaŋàbwaŋ. 10 U mbwo a ndandaa a Klistɔ ayà amu mɛ, mɛ an’kyey naa: kà mbuur mwɛy watɛy kan’duum ndaa a làkoo ayi kitiir a Akayi. 11 Ntɔn nkye? Ntɔn mɛ bɛ kàlakwen anki? Nzam akyàyöb!

12 Abun, mɛ in’yàlalà mukyer asànaa in’kakyerà mɛ apanà, ntɔn mudübà mbwo akà baar bàleŋà mbwo mukyey uyɔl naa ba bà asànaa bi! 13 Ntɔn baar aban bà antööm a loor, baar a isal a loor bàŋàyee ungö a antööm a Klistɔ. 14 Wa kundiir a ubem anki: Satanà ŋakwo afàyee amu un’kyeey a pɛɛlà. 15 Abun, kundiir a kölàköl anki ntɔn asyääl ande bàyee uboo a asyääl a balàbal. Ntsüü aba isàkal asànaa isal aba.

Mpay kàmɛn Pɔl.

16 Mɛ an’fàfuur, mbuur twon an’si naa mɛ in’wà ŋukɔŋ. Itàkal abwɛy, làkyey naa mɛ in’käl ŋukɔŋ, ntɔn mɛ sye in’kyey ndam a uyɔl. 17 Ayà in’kwen mɛ mutɛn, kasànaa ukwen Mwol anki, wɛɛ asànaa ŋukɔŋ, ntɔn ya yà ntɔn muswaŋ ngaal. 18 Ntɔn bàmbɔɔn bàfàswaŋ ngaal unsà ndaa a imbuur, mɛ sye in’swaŋ ngaal. 19 Bɛ aŋan’yeerà, bɛ làfàkyey baar bàkɔ̈ɔ̈n an’yeerà ukɔɔn apeen. 20 Abun, bɛ làfàkaŋ mpem naa bàlabuul asɔ, bàlamɛɛy ntaan, bàlapfiy, bàlasaal, bàlakäm mbar u ntabwey. 21 Mɛ in’wà u nswɛn mutɛn naa: bi kàswɛŋ naa bi ibà aŋagyɔ̈ɔ̈là.

Kyekà, mbuur usàkyer kyääl mutɛn, - mɛ in’tɛn asànaa ŋukɔŋ - mɛ sye in’kyer kyääl mutɛn. 22 Nkye ba bà Bɛbɛlyɔ? Anà mɛ sye. Nkye ba bà Bisàlɛl? Anà mɛ sye. Nkye ba bikyee a Abàlam? Anà mɛ sye. 23 Nkye ba basyääl a Klistɔ? Mɛ in’tɛn asànaa ŋukɔŋ, mɛ in’wà aŋàsöön ba! Ntɔn, mɛ kàmɛn mpay aŋàsöönà, mɛ kàbilà bɔlokà mbalà mbɔɔn, mɛ ban’düb aŋàsöönà mbɔɔn, mbalà mbɔɔn mɛ kàbweey a igɔnsà a ukwà. 24 Ayudà ban’käm iki an’kwem an’tär aŋiwà mbalà tyeen, 25 an’füm mbalà tär, in’kul mbalà mwɛy, mɛ kàminà kan’dà mbalà tär, mɛ kàkyer mwäänà mwɛy anà mpib mwɛy uboo a ngyäl. 26 Mbalà mbɔɔn mɛ kàkäl u nkyeen kin’kɔl, mɛ kàbweey a igɔnsà mbɔɔn: igɔnsà a ngyäl, igɔnsà a baar abɛ, igɔnsà a atɔŋ a itoo amɛ, igɔnsà a baar mpa abà Ayudà, igɔnsà uboo a an’bul, igɔnsà u nsye a ipɔl, igɔnsà udu a ngyäl anà igɔnsà uboo a atɔŋ a loor, 27 amu yɔ̈ɔ̈n anà mpay mbɔɔn, mbalà mbɔɔn ukɔɔn twaal, amu ngyal anà mfyää, mbalà mbɔɔn amu nkin a isaa, amu mpye anà làmbwà. 28 Ukɔɔn aler indiir byumwɛy, buur amɛ bilä a ilä bà nkyɛɛr ntɔn ikööŋ byanswà. 29 Nà awe anà gyɔ̈ɔ̈là, waa mɛ in’kɔ̈ɔ̈n gyɔ̈ɔ̈là? Nà kan’bwà u man’be, waa mɛ in’kɔ̈ɔ̈n akyɛɛr?

30 Isàkal naa mɛ in’swaŋ ngaal, mɛ ngaal in’swaŋ unsà gyɔ̈ɔ̈là amɛ. 31 Nzam, Taar a Mwol Yɛsu, awàŋasaak ntɔn mbul a in’tye, akyàyöb naa mɛ loor in’taa anki. 32 Mpal kàkäl mɛ u Damas, kuvernɔ̈ɔ̈r kàkäl un’kyeey a mfum Arɛtas kàsi aseey u minàmbwo a bul ntɔn mukan’kɔr. 33 Wɛɛ, u mbwo a mun a nɛl a ibää a làpaŋ, laa ban’tyeey ba uboo a un’tɛr, waa mɛ kàsɔrà kan’kɔɔ ande.