1 Nkye yubwaŋ muswaŋ ngaal? Ŋaa, ndöŋ yatɛy! Wɛɛ apanà, wɛy mɛ in’tɛn ntɔn ndaa kan’swɛŋ Mwol u imanmii anà u imɛɛy. 2 Mɛ in’yöb mbuur mwɛy amu Klistɔ awà, yan’lyaŋ mbul kwem aŋinà, bun’syeen tii u du làtär, nkye yàkäl amu ndür ande? mɛ in’yöb anki, nkye yàkäl u nsà a ndür ande? mɛ in’yöb anki, Nzam ayöb ya. 3 Ndandaa, mɛ in’yöb naa mbuur awà, - nkye yàkäl amu ndür ande? nkye yàkäl anki amu ndür ande? mɛ in’yöb anki, Nzam ayöb ya, - 4 bun’syen tii u paladisɔ, waa kàwem ndaa mpa bàfàbuul, ndaa mpa bàpɛ mbuur mbwo muywel ya. 5 Ntɔn mbuur atub awunà mɛ in’swaŋ ngaal, wɛɛ ntɔn mɛ, mɛ ngaal amɛ in’yàswaŋ nà unsà gyɔ̈ɔ̈là amɛ. 6 Yàlàkal naa mɛ in’kwen muswaŋ ngaal, mɛ kàlàkal anki ŋukɔŋ, ntɔn mɛ kàlàtɛn ndandaa. Wɛɛ mɛ an’tɔn mukyer abun, ntɔn mukɔɔn aman amu mɛ an’kyän aŋàsöön amà bàfàman ba itàkal bàfàwem ba akà mɛ. 7 Apan sye, ntɔn mɛ in’kɔ̈ɔ̈n ayɔl a uyɔl ntɔn kàwɛl mɛ imɛɛy kyan’söön ubwaŋ, ban’si itoor u ndür, asànaa un’kyeey a Satanà bàsɔ̈ɔ̈l mukan’düb anà mukan’dübà mbwo mukyey uyɔl. 8 Mɛ kàbɔ̈ɔ̈n Mwol mbalà tär ntɔn mukan’lwom itoor aki. 9 Wɛɛ nde kan’fuur naa: « Kab a ngway amɛ lan’kwo akà ngye, ntɔn ngwal amɛ ifàmɛnà yàŋàkwo unsà gyɔ̈ɔ̈là. » Abun, unsà un’sak wanswà, mɛ in’yàswaŋ ngaal amɛ unsà gyɔ̈ɔ̈là amɛ, ntɔn ngwal a Klistɔ ikäl amu mɛ. 10 Kyakin un’sak amɛ wamu gyɔ̈ɔ̈là, amu in’tswe, amu in’siinà, amu nkwaaŋ anà amu bɔɔmà aŋàdiir ntɔn Klistɔ. Ntɔn umpal in’wà mɛ unsà gyɔ̈ɔ̈là, apan sye in’wà mɛ anà ngwal.

11 Le mɛ an’bulà ŋukɔŋ! Bɛ lan’siinà a ngwal, bɛ baar làlan’tɛɛl imbäl. Ntɔn, itàkal naa mɛ in’wà undiir a bunàbun, mɛ kin’wà anki u ngyɛl a antööm abà bàfàmɛnà naa ba bà udu. 12 Idiim abyà ifàswaŋ naa mbuur wà ntööm byàmɛnà uboo abɛ: nkääŋ a mpem unsà ndɛb yanswà, idiim, impà anà isal a ngwal. 13 Undiir nà bɛ mpa làwɛl asànaa ikööŋ byumwɛy, nà mɛ mukɔɔn akal buur ntɔn bɛ? Lan’dwääl nkul ntɔn nkɔ̈ɔ̈n a balàbal ayi! 14 Le, mɛ in’wà tsütsü muyà akà bɛ mbalà yàtär, anà mɛ in’yàkal anki buur abɛ: ntɔn mɛ in’lɛŋà anki indiir abɛ, wɛɛ bɛ ŋakwo. Kà buur a baan anki musà indiir ukɔl ntɔn aböör, wɛɛ aböör ntɔn baan. 15 Ntɔn mɛ, mɛ in’pà indiir amɛ byanswà anà mɛ ŋakwo wanswà ntɔn bɛ. Isàkal naa mɛ in’fàlakwen mbɔɔn, nkye mɛ bàyan’kwen ikikye? 16 Itàkal naa mɛ kàkäl anki buur ntɔn bɛ, wɛɛ bàtɛn naa mɛ in’wà ikur baar, waa mɛ kàlakör u mbwo a impeenà. 17 Aben, nkye mɛ kàkyer alapfiy u mbwo a umwɛy uboo a baar kàlatööm mɛ? 18 Mɛ kàlɔ̈m akà Titɔ muyà akà bɛ, anà mɛ kàtöm mbwo mwɛy anà nde un’tɔŋ awà làyöb bɛ. Nkye Titɔ kàkyer alapfiy? Nkye nde anà mɛ, bi kàkäl anki an’kyän an’mwɛy, anà mulab mbwo mwɛy? 19 Fà itaan, nkye bɛ làsii naa bi ifàtwey balàbal bi ŋakwo kusà a bɛ? Ŋaa, bi ifàyäm kusà a Nzam, amu Klistɔ. Indiir abi byanswà, nkwen amɛ, byà ntɔn làkwikilà abɛ làyɛl. 20 Abun, bɔɔmà amɛ bà naa, umpal in’yàyà mɛ, mɛ in’kɔ̈ɔ̈n ayàlaman asànaa in’kwen mɛ, naa bɛ sye làkɔ̈ɔ̈n akan’man asànaa làkwen bɛ. Mɛ in’manà bɔɔmà naa mɛ in’yàtaan uboo a bɛ: an’sye, un’köl, nkyɛl, isür, ntwee, itetɛɛn, in’tswe anà lingwoomà. 21 Mɛ imanà bɔɔmà naa in’yàfàyà mɛ, Nzam amɛ ayàmɛɛy nswɛn kusà abɛ, anà mɛ in’lel ntɔn bàmbɔɔn abà bàkyer man’be kusà anà mpa bàbuul mpem u ŋingyääy, u ndaa a nswɛn anà unsà induumà bàkyer ba.