2 Coríntios 2

1 Ntɔn, akà mɛ, mɛ an’tsülà abà: Mɛ in’yàfurà anki akà bɛ unsà ngyɛb. 2 Isàkal naa mɛ amàlasà u ngyɛb, nà afàsampà un’sak? Nkye kà mbuur awà kàpɛ mɛ ngyɛb anki? 3 Akin isin a ndaa a un’kaan amɛ, mutiin naa u ngyeel amɛ, mɛ in’kɔ̈ɔ̈n aman ngyɛb akà baar bàlan’pà un’sak. Ndandaa, mɛ an’kyey, ntɔn bɛ, naa un’sak amɛ wà wàbɛ banswà sye. 4 Abun, uboo a mpay aŋàdiir, anà u mpem a ngyɛb anà nsaaŋ mbɔɔn, mɛ kàlasöön kà ntɔn mukàlapà ngyɛb anki, wɛ ntɔn bɛ làyöb naa ukwen nà mɛ in’we abà ntɔn bɛ.

Ndwääl a nkul a mbuur kan’kyer ube

5 Isàkal naa mbuur kàkäl isin a ngyɛb, nde kà mɛ usi anki u ngyɛb, wɛɛ bɛ banswà, taaŋ lumwɛy ndam, mukɔɔn asweey. 6 Ntɔn mbuur atub awà, ubwaŋ pɛl làkäl là baar mbɔɔn, 7 lalan, apanà, lun’dwääl nkul anà lun’pɛ ngwal, manà nde ubilà u ngyɛb aŋàdiir. 8 Kyakin sye mɛ amàlalɔm, muswaŋ ukwen abɛ akà ande, 9 ntɔn, kàlasöön mɛ sye, mɛ kàkwen mukàlasi naa nkye unkyeey abɛ unsà indiir byanswà wàŋàkwo. 10 Mbuur lan’dwääl bɛ nkul, mbuur in’dwääl mɛ sye nkul! Isàkal naa mɛ kàdwääl nkul, ikäl sye naa mɛ kàkäl anà ipöl mukyer abun, mɛ kàkyer ntɔn bɛ, kusà a Klistɔ, 11 ntɔn Satanà mukɔɔn akikur, ntɔn bi ikyàyöb an’kyän ande.

Nkyɛɛr a Pɔl u Tɔlɔwas

12 Utaaŋ kàkɔlà mɛ Tɔlɔwas ntɔn mukyään Làsaŋ Aŋàbwaŋ là Klistɔ, itàkal naa Mwol kan’duub mbwo a kölàköl, 13 mpem amɛ yàkäl anki a duu, ntɔn mɛ un’tɔŋ amɛ Titɔ kun’mɛn anki. Abun laa kàsawɛy mɛ, waa kàkyen Masɛdwan. 14 Wɛy an’tɔɔn màkäl akà Nzam afisyen taaŋ lanswà unsà iböŋ ande u mbwo a Klistɔ anà u mbwo abi, afàtsul may a usɔŋ a ngyööb ande u mper yanswà. 15 Ntɔn bi ibà ntɔn Nzam, usɔŋ aŋàbwaŋ a Klistɔ, ntɔn baar bàfàwà mɔ̈ɔ̈ anà ntɔn baar bàfàdiimà, 16 ntɔn bamwɛy usɔŋ a ukwà bàfàsyen kukwà, ntɔn bumwɛy, usɔŋ a mɔ̈ɔ̈ bàfàsyen u mɔ̈ɔ̈. Abun, nà kan’kwo unsà isal atub aki? 17 Abun, bi kibà anki asànaa baar bumwɛy bàfàyälà ndaa a Nzam, wɛɛ unsà ndandaa, kikɔb a Nzam, kusa a Nzam, unsà Klistɔ waa bi iyäämà.