2 Coríntios 8:9 | Versão YNS

Mbwiiy a indiir ntɔn Ikööŋ a Yuday

1 Atɔŋ, bi ikwen naa bɛ làyöb kab a ngway alà kàpɛ Nzam akà Ikööŋ a Masɛdwan. 2 Itàkal naa ba bàkäl u mpay mbɔɔn, wɛɛ un’sak aba kàkäl mbɔɔn, lalan bàpɛ ba indiir aŋàsöönà, itàkal naa ba bàŋàlàmbwà aŋàdiir. 3 Mɛ in’wà mbäl: asànaa bään aba, itàkal aŋàsöönà, u mpem aba wanswà, 4 unsà mbɔ̈ɔ̈n yanswà, ba bilɔ̈ɔ̈m, asànaa kab a ngway, mubilà unsà isal mutɔm mbaay akà aŋin’kyɛɛl a Yuday. 5 Ba bàpɛ yàŋàlyaŋ an’kyän abi: ba bàpɛɛl ba ŋakwo, kusà akà Mwol, ungö akà bi, u mbwo a ukwen a Nzam. 6 Kyakin kàlɛɛl bi Titɔ mumay akà bɛ isal a nkääb aki, asànaa kàsɛmà nde kya. 7 Wɛɛ, ntɔn bɛ làbà aŋàyɔl mbɔɔn a indiir byanswà, làkwikilà, kab a ndaa, ngyööb anà mbämà yà ifà ifà anà yukwen làwɛl bɛ akà bi, làkäl sye bàŋàyɔl a nkääb ayi. 8 Mɛ kà nswɛɛŋ anki alapaa: wɛɛ alàyäämà mɛ mbämà a baar asin, mɛ amàlapà ipöl mumɛɛy naa ukwen abɛ bà ndandaa. 9 Ntɔn bɛ làkyayöb kab a ngway a Mwol abi Yɛsu Klistɔ: nde mbuur kàkäl ŋun’naaŋ, nde kàbulà ŋàlàmbwà, ntɔn bɛ, ntɔn, u mbwo a làmbwà ande, bɛ làbulà aŋin’naaŋ.

10 An’kyän amɛ ntɔn nkääb amà: yubwaŋ naa bɛ làsi muküünà, ntɔn bɛ làbà bàtàtwɛb, kà ntɔn mukyer mpɛl anki, wɛɛ sye ntɔn muwal an’kyän mukyer isal a nkääb aki sɛmà mbul kàlyaŋ. 11 Wɛɛ apà, làmaay, mukyer wa, abun nswaal abɛ yàŋàbwaŋ ikäl balàbal sye mumay unsà ukwen abɛ. 12 Isàkal naa an’kyän mà ndandaa ubwaŋ, Nzam afàkyey kab alà paa, ukɔɔn aler undiir mpa awà paa!

13 An’kyän abi kà mupfiy anki ntɔn un’sak a baar bumwɛy, wɛɛ ntɔn nsöön ikɔ̈ɔ̈n akal uboo a bɛ. 14 Apanà làbà bɛ anà un’naaŋ, bɛ lan’kwo mubay baar ban’kɔɔn wa. Ntɔn sye, ilä làsàkɔɔn bɛ wa anà ba bàsàkal anà wa, ba bàsàlabay. Abun, nsöön isàkal anki uboo a bɛ. 15 Kyakin bàsön naa:

« Mbuur kàbwe mbɔɔn kàwɛl anki byàŋàsöön,

mbuur kàbwe ikikye, undiir kàkɔ̈ɔ̈n anki. »

Titɔ anà atɔŋ ande

16 Mɛ an’fuur an’tɔɔn akà Nzam awà kan’sà u mpem a Titɔ un’kanà nsil awà amu bi ntɔn bɛ. 17 Titɔ kàkyey ndɔ̈ɔ̈m abi, unsà un’kanà wanswà, waa kàkyen mper akà bɛ unsà ukwen ande ŋakwo. 18 Mbwo mwɛy anà nde, bi ban’tɔm un’tɔŋ awà bàfàkan Ikööŋ byanswà ntɔn isal ande unsà Làsaŋ Aŋàbwaŋ. 19 Yà sye naa, Ikööŋ byun’sɔ̈ɔ̈l mukal un’baay abi u nkyeen uboo a nkääb ayi, isal ifàkyer bi ntɔn làkoo a Mwol ŋakwo anà muswaŋ an’kyän abi màŋàbwaŋ.

20 Bi ikal kigyɛɛŋ mutiin an’pɛl unsà nsyääl a un’kàbɔ a ngim ibà bi anà buur awa. 21 Ntɔn bi, bi ileŋà mukyer ubwaŋ, kusà a Mwol mpɛl anki, wɛɛ kusà a baar sye.

22 Mbwo mwɛy anà ba, bi ban’tɔm un’tɔŋ abi, awà ifàkyey bi un’kanà ande mbalà mbɔɔn, anà kan’fàswaŋ wa aŋàsöönà, ntɔn nde kan’sà kam akà bɛ. 23 Abun, Titɔ wà mbuur afàtüüb anà mɛ unsà làkwikilà anà un’baay amɛ unsà isal apà bɛ. Ntɔn atɔŋ bumwɛy ban’tüüb mbwo anà nde, ba bà antööm a Ikööŋ, ba bàfàsal ntɔn làkoo a Klistɔ. 24 Kusà a Ikööŋ, làswɛŋ naa bɛ làbye anà ukwen, naa bi kàkäl anà ibɔŋ muswaŋ ngaal kusà a ba.

Bíblia Online

2 Coríntios 8

Veja também

Oração para pedir a Deus que aumente a fé quando o coração está cheio de dúvida

7 atitudes que agradam a Deus segundo a Bíblia