2 Timóteo 4:7 | Versão YNS

1 Mɛ amàlɔ̈ɔ̈m u mii a Nzam anà u mii a Klistɔ Yɛsu awà asàyà mutsul mbar a baar a mɔ̈ɔ̈ anà akü, kà ikɔb a mɛɛy ande anà kyà Imwol ande, 2 kyään Ndaa unsà muküünà, itàkal utaaŋ aŋàbwaŋ, itàkal utaaŋ a làbe, tɔn, ŋan, lɛɛl, anà lɔŋ unsà nkääŋ a mpem yanswà. 3 Ntɔn taaŋ mwɛy làkyer asàyà, alà mpa bàsàkwen baar amwɛy muwem an’lɔɔŋ a ndandaa, wɛɛ ba bàsàlab ilään a ndür aba ŋàkwo anà bàsawalà alɔɔŋ mbɔɔn abà bàsakyäänà ndaa ayà ikwen an’tsü aba muwem. 4 Ba basàdübà an’tsü aba akà ndandaa, waa bàsàbulà ntsü akà nsim a bunàbun. 5 Wɛɛ ngye, kaar duu unsà indiir byanswà, bäm mpem unsà mpay, kyer isal angye kyà un’paylàsaŋ, kyer ubwaŋàbwaŋ isal angye kyànswà.

Taaŋ amɛ làkyà lan’kwo

6 Wɛɛ akà mɛ, mɛ bàkyan’kab itaan asànaa ibɔɔn, taaŋ amɛ làkyà lan’kwo. 7 Mɛ kànwään ngwiy aŋàbwaŋ, mɛ kàmay ntiin amɛ, mɛ akyàkaar làkwikilà. 8 Sɛmà apanà ndä a iböŋ amɛ yàmukandilà: ndä usan’pà Mwol, ntɛɛn a balàbal, Ilä kya, kà nà mɛ mpɛl anki, wɛɛ sye anà baar banswà bàsàkwen mɛɛy ande.

Nswɛɛŋ a ntsüü

9 Sà ngwal muyan’man làgyägyä. 10 Ntɔn Dɛmas kàkyan’tiin, kàkyàkwen ubwaŋ a mɛɛn aŋàbà. Nde kàkyen Tɛsalonikà. Kresɛns kàkyen Ngalàtyà, Titɔ kàkyen Dalmàtyà. 11 Lukà mpɛl awà anà mɛ. Un’wɛl Malakɔ, yà anà nde, ntɔn nde wà ndöŋ mbɔɔn ntɔn isal. 12 Mɛ kàtɔ̈m Tishik u Ɛfɛsɔ. 13 Mpal ayàyà ngye, ntwääl kàzak a mpye kàsàwɛy mɛ u Tɔlàwas kà an’kɔɔ a Karpɔs, anà in’kaan, sin sin myà ibaan a ntsür.

14 Wɛɛ, Alɛksandre, un’tsül a ngöl, kan’kyeer indiir ibe mbɔɔn. Mwol asun’fuur asànaa ayà nsyääl ande. 15 Ngye sye kal kà igyɛɛŋ anà nde, ntɔn nde kàkyer atɔn a ngwal an’lɔɔŋ abi.

16 Umpal kàsi mɛ un’lɔn amɛ wàtàtwɛb, akà mbuur mwɛy kan’bay anki, baar banswà bàkyer an’tɔn. Wɛy bàkɔ̈ɔ̈n alääb ya. 17 Mɛ, mɛ Mwol kan’bay, waa kan’pɛ ngwal, ntɔn mukyään Ndaa ubwaŋàbwaŋ, waa baar mpa abà Ayuda banswà bàkyer awem ya. Nde kàn’tsü mɔ̈ɔ̈ u mun a ntaamà. 18 Mwol asàkyer an’tswà mɔ̈ɔ̈ kusà a nkyeer ambe yanswà, waa usan’biil unsà ubwaŋ banswà uboo a Imwol ande kyà du. Wɛy làkoo làkäl anà nde u mbul a in’tye! Wöwöö!

Mbɔr a ntsüü

19 Apɛ Piskil anà Akilas mbɔr, anà ndwà a Ɔnɛsfɔr sye. 20 Elastɛ kàsàsaal u Kɔlintɔ. Mɛ Tɔlɔfim kàsun’wɛy u Milɛ anà ukyal. 21 Sà ngwal muyà kusà a paŋà a mpye.

Öbulus, Pudɛns, Linüs, Kɔlɔdyà anà atɔŋ banswà bàmatööm mbɔr.

22 Wɛy Mwol ukäl anà dweelà angye!

Wɛy kab angway a Nzam làkäl anà bɛ!

Bíblia Online

2 Timóteo 4

Veja também

Oração para pedir a Deus que aumente a fé quando o coração está cheio de dúvida

7 atitudes que agradam a Deus segundo a Bíblia