IMƐƐY 19

Un’syeen a mpoonà udu a mpoonà a pɛɛl

11 Apan, mɛ kàmɛn du làŋàdubà, mpoonà a pɛl kàyàmɛnà. Mbuur kàläär udu awa bàfun’bel « Lää » anà « Ndandaa ». Nde afàtsul nsaŋ anà afànwaan unsà balàbal. 12 Mii ande myà asànaa làlɛm a mbaa. Nde we anà mpà a imwol mbɔɔn udu a un’tswe anà ikɔb aŋàsɔn akyà uyöb nde mpɛl. 13 Nde wàŋàbwaar kàzak aŋànwɛmà unsà an’kil. Ikɔb ande « Ndaa a Nzam ». 14 In’lwaŋ a aŋità a du myàyun’labà udu a mpoonà a pɛɛl, myaŋàbwaar ipfɛy a in’kà a ntsür kyà pɛɛl anà kyà tsɛk tsɛk. 15 Kɔm aŋàsye làtoo u mun ande ntɔn mukam in’sɛŋ. Nde asàkal un’kyɛɛŋ aba anà un’aŋ wà ishabà, anà nde asàbwɛɛr rɛzɛ uboo a mpfwee ipölà vin a un’fur a nkyɛl a Nzam Aŋangwal. 16 Udu a kàzak ande anà udu a ipɛl ande bàsön ikɔb ki: « Mfum a amfum anà Mwol a amwol ».

17 Apan, mɛ kàmɛn un’kyeey aŋàmbar uboo a taaŋ. Nde kasi in’kwɛŋ u ndaa a ngwal akà nɛn yanswà yàyafumà u dudu: « Làyi, làköŋ ntɔn un’kyɔm a kölàköl wà Nzam! 18 Abun, yàladi in’twaŋ a amfum, in’twaŋ a amfum a aŋità, in’twaŋ a aŋangwal, in’twaŋ a mpoonà anà myà baar bàfàsyen ya, in’twaŋ a baar banswà, baar a nsaay anà asɔ, ambɛy anà andweer. »

19 Ungö apan, mɛ kàmɛn ntsür, amfum a mɛɛn anà in’lwaaŋ a ità aba, bàŋàköŋ ntɔn munwaan a mbuur afàlaar udu a mpoonà anà un’lwaaŋ a ità ande. 20 Ntsür bàkyer un’kɔr anà ŋangɔɔm ande wàloor kàkyer idiim ibaŋ kusà ande ntɔn mubwiy ndwaŋ baar abà bàwɛl inyɛm a ntsür anà bàkömà itɛk awa. Ntsür anà ŋangɔɔm a loor batɔɔm bàmɔ̈ɔ̈ u yaaŋ a mbaa. 21 Baar bumwɛy bàkyer adwa a kɔm alà làtoo u mun a mbuur kàkäl udu a mpoonà. Nɛn yanswà yàyüür a in’twaŋ aba.