Atos 16

Pɔl anà Silasi u bɔlokà

16 Ilä mwɛy bi kàkäl mukyà ikal a ngyamàkà, un’syääl mwɛy wà un’kaar kàkäl anà bwoo a nkwee, nde kàyi akà bi. Nde kàfakɔlà myee anà kàfakyäänà baar ndaa iyàyà kusà. Isal ande aki kyàpɛɛ bweel mbɔɔn akà ankum ande. 17 Nde kàsɛmà muyilab Pɔl anà bi. Nde kàyikuubà in’kwɛŋ, waa kàtɛɛnà naa: « Baar làman bɛ bà, ba bà asyääl a Nzam a Dudu! Ba bàmuyàlakyään mbwo a mɔ̈ɔ̈! » 18 Nde kàfakyerà abà ilä mbɔɔn. Ya yàpɛ Pɔl làkyämun, lalan kàbulà nde, waa kàswɛŋ dweelà alan naa: « Kà ikɔb a Yɛsu Klistɔ, mɛ amaswaŋ, too uboo a un’kaar wà. » La waa làtoo taaŋ nsil alan. 19 Mpal bàmɛn ankum ande naa undiir kàfapaa ba ubwaŋ kan’too, ba bàkör Pɔl anà Silasi, waa basyen kà un’syäl kusà a antɛɛn. 20 Ba baswɛŋ akà amfum a antɛɛn, waa bàtɛn naa: « Baar bà, bàmuyitwaal lingyoomà uboo a bul abi. Ba Bayudà, 21 ba bàyikyään nkääl a ingyey mpa ban’kwo bi mulab ntɔn bi ibà baar a Lɔmà. » 22 Un’sɛŋ a baar kàmbarà u nkyɛl ntɔn mutɔn ba, antɛɛn batöm mukasɔl ipfɛy, waa baswɛŋ naa bapɛ an’füm. 23 Ungö mukadüb iki mbɔɔn, ba batɔɔm u bɔlokà, waa bàswɛŋ un’leer a bɔlokà mukasey ubwaŋàbwaŋ. 24 Pa kàwɛl nde nswɛɛŋ ayi, nde kasi u bɔlokà làboboo, waa kabäm ibiŋ a in’te kà in’kɔl aba. 25 Tsütsü a boboo a mpib, Pɔl anà Silasi bàkäl muyamà anà mutɔl an’diim musyäŋà Nzam. Baar a bɔlokà bumwɛy bàkäl muweemà ba. 26 Kà imbürà, mɛɛn màni a ngwal, an’sin an’ta a bɔlokà màkyer atɛɛr, apan ibeenà byanswà waa byàdubà, in’siŋ a baar a bɔlokà banswà waa myàtsuŋà. 27 Umpal kàwiyà un’leer a bɔlokà u twaal anà kàmɛn nde naa ibeenà a bɔlokà byàŋàdubà, nde kàtwey kɔm ande ntɔn mudwa mɔ̈ɔ̈ ande, ntɔn nde kàsii naa baar a bɔlokà ban’tiin. 28 Wɛɛ Pɔl kàtɛn u ndaa a ngwal naa: « Twɔn an’dwa mɔ̈ɔ̈ angye, bi banswà ibà paa! » 29 Un’leer a bɔlokà kàlɔ̈m mwinà, kàbilà uboo a ndwà u ntiin, waa kàbü a matɛɛr kà in’kɔl a Pɔl anà Silasi. 30 Apan, nde katwey u nsà, waa kàtɛn naa: « Amwol, ininà mɛ in’kyer muwal mɔ̈ɔ̈? » 31 Ba bun’fuur naa: « Sà làkwikilà akà Mwol Yɛsu, waa ngye ayàwà mɔ̈ɔ̈, ngye anà ndwà angye yanswà. » 32 Abun, ba bun’kyään ndaa a Mwol, anà baar banswà bàkäl u ndwà ande. 33 Taaŋ nsil alan u mpib, nde kasyen mukàsɔŋ iwà aba. Ungö apan nde kàwɛl ndüümà, nde anà baar ande banswà. 34 Nde kasyen u ndwà ande, kàyöŋà mɛsà, waa kàsäŋà anà ndwà ande yanswà ntɔn kàsi nde làkwikilà amu Nzam. 35 Mpal làyaanà taaŋ, antɛɛn bàtöm asyääl ntɔn mutɛn a un’leer a bɔlokà naa: « Awɛy baar ban. » 36 Un’leer a bɔlokà kàkyään Pɔl ndaa ayi, waa kàtɛn naa: « Amfum antɛɛn ban’tɔm ndaa naa bàlatwey u bɔlokà. Apanà, làtoo anà làkyen unsà duu. » 37 Wɛɛ Pɔl kàtɛn naa: « Ungö mukikam an’füm u mii a baar ukɔɔn akifuul un’lɔɔn, bi Alɔmà, ba bitɔɔm u bɔlokà. Apanà waa ba bitɔɔm u nsà u nku! Ya ikal anki abwɛy! Wɛy ba ŋakwo bàyitwey! » 38 Asyääl bàkàkyään ndaa ayi akà amfum a antɛɛn. Mpal bàwem ba naa ba bàkäl Alɔmà, bɔɔmà waa lawɛl. 39 Ba waa bàyi, babɔ̈ɔ̈n, batwey anà balɔ̈ɔ̈m mutoo u bul. 40 Mpal bàtoo ba u bɔlokà, ba bàkàbilà u ndwà a Lidi. Ungö mubwey anà atɔŋ, ba bapɛ ngwal, waa bàkyen.