Atos 26

Un’lɔɔn a Pɔl kusà a Angilipà

1 Angilipà kàtɛn a Pɔl naa: « Bàmapà mbwo musà un’lɔɔn angye. » Apan nde kàsen kɔɔ ntɔn musà un’lɔɔn ande: 2 « Mfum Angilipà, mɛ an’man un’sak mbɔɔn musà un’lɔɔn kusà a ngye ŋàbawà ntɔn indiir byanswà bàman’füün Ayudà, 3 sin sin ngye akyàyöb ubwaŋàbwaŋ nkääl a Ayudà anà nsyeel a mbaaŋ aba. Kyakin mɛ amalɔm mukan’wem anà igyɛɛŋ unsà nkääŋ a mpem yanswà.

4 « Ntɔn mɔ̈ɔ̈ amɛ, sɛmà imbɛy, Ayudà banswà bàkyàyöb wa, ntɔn mɛ kàkäl u Yɛlusàlɛm uboo a un’sɛŋ amɛ. 5 Ba ŋakwo bàkyàyöb fà itaan, ba ban’kwo bàtɛ imbäl, kya ba bàsàkwen, naa mɛ in’wà umwɛy uboo a Ikööŋ a Amfarisi ifàlab inzaam abi pànsi pànsi. 6 Apanà, mɛ bàman’füün ntɔn làkyän amɛ unsà ilää kàpɛ Nzam akà andweer abi. 7 In’sɛŋ abi myanswà myàkwem aŋiyweel myàfàsyääl Nzam uboo a muküünà mpib anà mwäänà ntɔn muman nkölà a ilää aki. Ɔɔ Mfum, ntɔn làkyän alà, Ayudà waa bàman’füün! 8 Ntɔn nkye mpa làkyeyà bɛ naa Nzam afàwiy akü? 9 Mɛ ŋakwo, mɛ kàyweerà naa yubwaŋ munwan a ngwal yanswà anà ikɔb a Yɛsu Nazɔrye. 10 Undiir nsil awà mɛ kàkyer u Yɛlusàlɛm. Mɛ kàbiil baar in’kyɛɛl mbɔɔn u bɔlokà mpal kàwɛl mɛ ikɔ̈b akà andweer a angaŋ, mɛ sye kàkyer akyeyà naa badwä. 11 Mɛ kàyibilà mbalà mbɔɔn u ndwà a nköŋ a Ayudà yanswà ntɔn mukapà ntaaŋàmbar anà mukasiinà a ngwal yanswà ba mubɛy làkwikilà aba. Uboo a nkyɛl amɛ yanswà, akà ba, mɛ ba kàyalabà tii kà an’bul a ingyey. »

Pɔl wàmukyään mbuul a mpem ande

12 « Lalan ilä mwɛy mɛ kàkyà Damas anà ikɔ̈b aŋàkwo anà isal ban’pɛ amfum a angaŋ. 13 Ɔɔ Mfum, ilä mwɛy ntsü a midi, mɛ kàkäl u mbwo, mɛ anà atɔŋ bàkäl anà mɛ, mpal kàmɛn mɛ un’ŋyäŋ a pɛɛlà wàŋàsöönà taaŋ kan’fà du, waa kan’diŋà. 14 Bi banswà kàbü u mɛɛn, waa mɛ kàwem ndaa mwɛy ikan’kyäänà unsà Ibɛlyɔ naa: "Sɔl, Sɔl, ntɔn nkye ayan’mɛɛy ngye nkwaaŋ? Yà mpay akà ngye mutɔn un’swaaŋ!" 15 Mɛ kàfuur naa: "Mwol, ngye awà nà?" Mwol waa kan’fuur naa: "Mɛ, mɛ in’wà Yɛsu akwà ayimɛɛy ngye nkwaaŋ. 16 Wɛɛ mbarà, tsim kà in’kɔl angye. An’yàmɛnà mɛ akà ngye ntɔn mɛ kàkyasɔɔl kusà mukal un’syääl anà mbäl unsà indiir kàmɛn ngye anà unsà indiir in’yàfamɛɛy mɛ. 17 Mɛ ngye akyasɔɔl uboo a un’sɛŋ wà anà uboo a baar mpa abà Ayudà mper amatɔm mɛ. 18 Mɛ ngye amatɔm ntɔn ngye aduub ba mii, alwom ba u mpib anà atwääl u pɛɛlà anà akà Nzam fà ikɔ̈b a Satanà, ntɔn ba bàwɛl ndwääl a man’be aba anà kwal uboo a aŋin’kyɛɛl u mbwo a làkwikilà amu mɛ." »

Pɔl wàmukyään isal ande

19 « Unsà ayi yanswà, mfum Angilipà, mɛ kàtön anki imanmii kyàfü du ki. 20 Wɛɛ mɛ kàtàlɔŋ baar a Damas, u Yɛlusàlɛm, kà itiir a Yuday kyanswà, anà akà in’sɛŋ mpa abà Ayudà, ntɔn ba bàbuul mpem anà bàpɛ mɔ̈ɔ̈ aba akà Nzam anà muswaŋ nsɔɔmà ayi u nsyääl aba. 21 Undiir awun Ayudà ban’kör ba mpal kàkäl mɛ u ndwà a Nzam, laa bàleŋ ba mukan’dwa. 22 Wɛɛ Nzam laa kan’tii nde, lalan mɛ in’wa mɛ anà mɔ̈ɔ̈ tii ŋàbawà, mɛ in’wàmuyità imbäl kusà a ambɛy anà andweer ndaa bàtɛn aŋangɔɔm anà Mɔsɛ naa ya isàkyer ayà, 23 muyöb naa Klistɔ kàkyer alàman mpay, naa nde, nde alàkal mbuur atàtwɛb mutoo uboo a akü, naa nde akyään pɛɛlà akà un’sɛŋ anà akà baar mpa abà Ayudà. »

Pɔl kan’lɔm Angilipà mubuul mpem

24 Pɔl kàkäl musà un’lɔɔn ande mpal kàsi Fɛstüs in’kwɛŋ naa: « Pɔl, ngye awà ŋun’kɔŋ! Un’yɛnà angye wà mbɔɔn kàmatwääl ukɔŋ! » 25 Wɛɛ Pɔl kun’fuur naa: « Un’byääl Fɛstüs, mɛ kà in’wà ŋukɔŋ anki. Ndaa in’kyäänà mɛ yi yà ndandaa anà yan’kyän aŋàbwaŋ. 26 Ntɔn Mfum awà in’kakyäänà mɛ unsà uyɔl banswà, akyàyöb indiir abi ubwaŋàbwaŋ. Mɛ in’we anà iböŋ muyweer naa undiir mwɛy udiimà nde watɛy, ntɔn ndaa ayi yàlyaaŋ anki kunku, kà ikal aŋàyee. 27 Mfum Angilipà, nkye ngye afàsà làkwikilà akà aŋangɔɔm? Mɛ in’kyàyöb naa ngye awe anà làkwikilà. » 28 Angilipà waa kàtɛn a Pɔl naa: « Le, ngye akwen mukan’buul un’klistɔ! » 29 Nde kàfuur naa: « Mɛ in’kwenà naa itàkal naa taaŋ ikikye, naa taaŋ mbɔɔn, wɛy Nzam ukyer naa kà nà ngye mpɛl anki, wɛɛ sye anà baar banswà bàweemà mɛ ŋàbawà, bɛ làbulà asànaa mɛ ukɔɔn in’siŋ mii. »

30 Mfum waa kàmbarà, anà kuvɛrnɔ̈ɔ̈r, Bɛrnis anà baar banswà bàtɛɛnà nsaŋ. 31 Ba bàkyen nku, waa bàtɛn ba a ba naa: « Mbuur wà undiir mwɛy kan’kyer nde watɛy ntɔn nde uwɛl ukwà itàkal in’siŋ. » 32 Apan, Angilipà kàsam Fɛstüs naa: « Mbuur wà bàkyer alun’wɛy ilàkal naa nde ukɔ̈ɔ̈n alom muman Sɛzar. »