22 Akaar, lawem adim abɛ asànaa làfàwem bɛ Mwol. 23 Ntɔn un’dim wà mfum a un’kaar, asànaa Klistɔ awà nde Mfum a Ikööŋ, nde wà un’tswää a mɔ̈ɔ̈ a Ikööŋ akyà ndür ande ŋakwo. 24 Wɛɛ, asànaa Ikööŋ ifàsà kya Klistɔ làkoo, wɛy akaar sye bàwem adim aba unsà ndaa yanswà.

25 Adim, lakwen akyay abɛ asànaa Klistɔ kàkwen nde Ikööŋ anà kàpɛ nde mɔ̈ɔ̈ ande ŋakwo ntɔn kya. 26 Abà, nde kàkwen mubuul kya kyà in’kyɛɛl anà mupöŋ kya u mbwo a an’dà anà u mbwo a Ndaa. 27 Nde kàkwen naa kya ikäl asànaa nde ŋakwo, ntsà, ukɔɔn kitwan, itàkal un’bɔɔ, itàkal too làmwɛy. Nde kàkwen naa Ikööŋ ande ikäl kyà in’kyɛɛl anà ikɔ̈ɔ̈n an’pɛl. 28 Undiiràwun, un’dim akyer akwen un’kyay ande asànaa ndür ande ŋakwo. Mbuur afàkwen un’kyay ande, afàkwen sye nde ŋakwo. 29 Ntɔn, akà mbuur mwɛy watɛy afàyiiŋ ndür ande ŋakwo, wɛɛ nde akyer afàdii anà afàlɔɔn ya ubwaŋàbwaŋ asànaa ufàkyer Klistɔ ntɔn Ikööŋ ande. 30 Nkye bi kà ibà itiir a ndür ande anki? 31 « Kyakin baal asàwɛy taarànde anà ngwän, waa usàkàbääb anà un’kyay ande. Ba bàbɔ̈ɔ̈l bàsàbulà ndür mwɛy. » 32 Ngyee ayi yà yàkölàköl: mɛ, mɛ an’tɛn naa ya yà ntɔn Klistɔ anà Ikööŋ. 33 Itàkal naa abà, wɛy mbuur mbuur uboo a bɛ ukwen un’kyay ande asànaa nde ŋakwo, wɛy un’kaar upɛ un’dim ande làzir.