Filipenses 4:4 | Versão YNS

1 Abwɛy, atɔŋ amɛ bà nkween, mɛ in’we anà ngyal mbɔɔn mukàlaman! Bɛ làbà un’sak anà mbaan amɛ! Abun, atɔŋ amɛ, làtsim ubɔɔ a mɔ̈ɔ̈ abɛ anà Mwol.

Ndɛɛl

2 Mɛ an’lɛɛl Ivodi anà mɛ an’lɛɛl Sɛntisha mukal an’kyän an’mwɛy unsà Mwol. 3 Anà ngye sye, un’baay amɛ wàndandaa, mɛ amalɔm mukabay, ntɔn ba bànwään mbwo mwɛy anà mɛ ntɔn Làsaŋ Aŋàbwaŋ, sye, anà Klɛma anà abaay amɛ bumwɛy, ikɔb aba byà ubɔɔ a un’kaan a mɔ̈ɔ̈. 4 Taaŋ lanswà, làkäl kà un’sak unsà Mwol. Mɛ an’fàfuur: làkäl kà un’sak! 5 Wɛy baar banswà bàyöb ubwaŋ angye. Mwol wà tsütsü. 6 Twon lan’kyɛɛr a bunàbun, wɛɛ unsà ipöl kyanswà, u mbwo a ngyamàkà anà u mbwo a ndɔ̈ɔ̈m anà an’tɔɔn, làswɛŋ ngyal abɛ akà Nzam. 7 Abun, duu a Nzam alà lan’lyaaŋ un’yɛnà wanswà, làyàkaar mpem abɛ anà an’kyän abɛ amu Klistɔ Yɛsu. 8 Atɔŋ, mumay, làsi an’kyän abɛ unsà indiir a ndandaa, byà ibyääl, byàbalàbal, byàŋàpɔŋà, byà ukwen, byàŋàsyäŋà, byàŋàbwaŋ, anà byàlàkoo. 9 Indiir làlɔŋàkà bɛ, làwɛl bɛ anà làwem bɛ akà mɛ, làsyääl bya. Waa Nzam a duu uyàkal anà bɛ.

Pɔl kan’fuur an’tɔɔn akà Afilipo

10 Mɛ kàmɛn un’sak mbɔɔn unsà Mwol ntɔn làfàsà bɛ an’kyän abɛ amu mɛ: Inye, bɛ làkäl anà an’kyän amà, wɛɛ bɛ làkäl anki anà ipöl muswaŋ ma. 11 Mɛ in’tɛɛnà anki abwɛy naa ntɔn mɛ an’kwà nkyääŋ a indiir, ntɔn mɛ kàlɔŋàkà mukal anà un’sak a indiir in’wà mɛ abyà. 12 Mɛ in’kyàyöb mukal u làmbwà anà mukal unsà indiir mbɔɔn. Mɛ kàlɔŋàkà mukal aŋàyuur anà mukal u ngyal, mukal unsà indiir mbɔɔn asànaa u ngyal. 13 Mɛ an’kwo mukyer indiir byanswa amu mbuur afan’pà ngwal. 14 Apan sye, bɛ làkyer ubwaŋ muwal kab unsà mpay amɛ. 15 Bɛ làkyàyöb, bɛ, Afilipo: u nsɛmà a Làsaŋ Aŋàbwaŋ, umpal kàlwomà mɛ u Masɛdwan, akà Ikööŋ imwɛy kyan’si anki u kab, nà bɛ mpɛl. 16 Ntɔn mpal kàkäl mɛ u Tɛsalɔnikà, mbalà mbɔɔn bɛ lan’tööm indiir kàkäl mɛ abyà mfun. 17 Ikaswaŋà anki naa mɛ in’wàmuleŋ kab, wɛɛ mɛ in’kaleŋà naa bweel abɛ bàbɛy. 18 Abun, mɛ an’kyey naa mɛ kàkyàwal indiir byanswà lan’tööm bɛ. Bya byan’söön mbɔɔn. Apanà mɛ an’yɔl a un’sak ntɔn Epafrɔdit kàman’twääl nde an’kab abɛ: may a usɔŋ aŋàbwaŋ, ibɔɔn kan’kyey Nzam anà kya kyàmupà un’sak. 19 Nzam amɛ akyer ayàkölà ngyal abɛ, asànaa awà un’naaŋ ande unsà làkoo amu Klistɔ Yɛsu. 20 Wɛy làkoo làkäl akà Taaràbi Nzam u mbul a in’tye. Yà abwɛy.

Mbɔr a ntsüü

21 Làpɛ mbɔr akà ŋin’kyɛɛl wanswà amu Klistɔ Yɛsu. Atɔŋ abà anà mɛ bàmalatööm mbɔr. 22 Aŋin’kyɛɛl banswà bàmàlapà mbɔr, sin sin baar a ndwà a Sɛzar. 23 Wɛy kab a ngway a Mwol Yɛsu Klistɔ làkäl anà dweelà abɛ.

Bíblia Online

Filipenses 4

Veja também

Oração para pedir a Deus que aumente a fé quando o coração está cheio de dúvida

7 atitudes que agradam a Deus segundo a Bíblia