1 Ungö a mbul kwem aŋinà, mɛ kàfàbeenà Yɛlusàlɛm anà Banabas, mɛ kàsyen sye anà Titɔ. 2 Kyekà, mɛ kàbeenà ntɔn imɛɛy kàwɛl mɛ, anà mɛ ba kasam Làsaŋ Aŋàbwaŋ in’fàlɔɔŋ mɛ akà baar mpa aba Ayudà. Mɛ la sye kàyisaamà u mpey akà andweer a Ikööŋ, manà naa isal kàkyer mɛ anà in’yàkyer mɛ apanà ikɔ̈ɔ̈n akal ndöŋ. 3 Wɛɛ ya yàmɛnà naa itàkal Titɔ, un’gɛlɛki kàyisalà anà mɛ, bun’siinà anki a ngwal muwal nkyɛɛy, 4 itàkal abwɛy, atɔŋ abɛ abà bàyàbilà uboboo abi, bàtwääl ipaay unsà nsaay abi yan’fà akà Yɛsu Klistɔ, ba bàkwen mukibuul asɔ a un’kɔɔn. 5 Wɛɛ bi, bi kàkyey anki isɔ a baar aban akà ikikye, itàkal mutüüb anà ba u kitaaŋ, ntɔn ndandaa a Làsaŋ Aŋàbwaŋ yàkäl ipepey ntɔn bɛ.

6 Baar bàkäl asànaa bàntal, bàkäl kaben, mɛ kwo watɛy. Ntɔn Nzam ufàler anki ntabwey a baar. Wɛɛ akà mɛ, ba sye ban’swɛŋ anki akà undiir mwɛy a ngwal. 7 Kyekà, ba bàkyàman naa mɛ ban’pɛ buur a Làsaŋ Aŋàbwaŋ ntɔn baar mpa abàŋàkyɛy, asànaa bàpɛ akà Petɔlà ntɔn baar aŋàkyɛy. 8 Ntɔn mbuur kàkyer naa Petɔlà ukäl ntööm ntɔn baar aŋàkyɛy, mbuur nsil sye wa kàkyer naa mɛ in’käl ntööm ntɔn baar mpa abà Ayudà. 9 Umpal bàyɔ̈b Zyak, Petɔlà anà Ywan abà bàkäl asànaa an’ta a Ikööŋ, naa kab a ngway alà bàpɛ akà mɛ, ba bipɛ an’kɔɔ, mɛ anà Banabas, muswaŋ un’tüüb uboo a ba anà bi, ntɔn bi ikyen akà baar mpa abà Ayudà, wɛ ba bàkyen akà baar aŋàkyɛy. 10 Yàlɔ̈m naa bi ikyer undiir mwɛy mpɛl: muyɔbà aŋàlàmbwà. Mɛ wa sye kàkyàkyer agyägyä.

11 Wɛɛ mpal kàyi Petɔlà kà Antyɔsha, mɛ kàtön ndaa ande u mii a baar, ntɔn nde kàkäl anà ikwàndwà. 12 Ntɔn, kusà a ngyeel a baar abà kàtöm Zyak, nde kàdyee ikal imwɛy anà baar mpa abà Ayudà. Wɛɛ mpal bàyàkɔlà ba, nde kàkaabà anà baar mpa abà Ayudà, waa kàkäl u mpey, ntɔn nde kàmɛn bɔɔmà a Ayudà aban. 13 Ayudà bumwɛy bàbilà uboo a pfürà ande, kyakin Banabas nde ŋakwo sye kàbilà uboo a pfürà alà. 14 Wɛɛ mpal kàmɛn mɛ naa nkääl aba yàkäl anki balàbal anà Làsaŋ Aŋàbwaŋ, mɛ kàtɛn a Petɔlà u mii a baar banswà naa: « Isàkal naa ngye mbuur awà Un’yudà, nkääl angye yà asànaa yà baar mpa abà Ayudà, kà yà Ayudà anki, aben ngye akaswaŋà baar mpa abà Ayudà naa ba bàkäl nkääl mwɛy ya anà Ayudà? »

15 Bi, bi ibà Ayudà fà mböör, wɛɛ bi kà ibà baar mpa abà Ayudà anki, baar a man’be bà. 16 Mpalàbà, bi kan’yöb naa akà mbuur a balàbal mwɛy watɛy naa ntɔn nde afàlab isal a un’kɔɔn, wɛɛ unsà làkwikilà amu Yɛsu Klistɔ mpɛl. Bi, bi sye kàsi làkwikilà amu Yɛsu Klistɔ, ntɔn bi ikäl bàbalàbal unsà làkwikilà amu Klistɔ, wɛɛ kà unsà isal a un’kɔɔn anki. Ntɔn, akà mbuur mwɛy usàkal anki balàbal unsà isal a un’kɔɔn. 17 Wɛɛ, isàkal naa bi kàleŋà mukal bàbalàbal amu Klistɔ, bi sye bàmɛnà naa bi ibà baar a man’be. Nkye Klistɔ kàlàkal un’syääl a man’be? Ikwo anki akà ikikye. 18 Kyakin, isàkal naa mɛ an’fàtɔŋ ya akwà kàbwaab mɛ, abun, ikaswaŋà naa mɛ in’wà un’bɛɛy a un’kɔɔn. 19 Ntɔn yà u mbwo a un’kɔɔn wa mɛ kàkü unsà un’kɔɔn, ntɔn mɛ in’käl anà mɔ̈ɔ̈ amu Nzam. Mɛ, mɛ in’wà aŋàbɛɛrà u kulunsi anà Klistɔ, 20 mɛ in’we anà mɔ̈ɔ̈, wɛɛ kà mɛ anki, Klistɔ awe anà mɔ̈ɔ̈ amu mɛ. Ntɔn mɔ̈ɔ̈ amɛ wà imbuur, wa wà unsà làkwikilà, làkwikilà amu Mwan a Nzam awà kan’kwen anà kàpɛ mɔ̈ɔ̈ ande ntɔn mɛ. 21 Mɛ in’piy anki kab a ngway a Nzam bwà. Ntɔn, kya isàkal naa yà unsà mbwo a un’kɔɔn mbuur kan’kwo mukal wàbalàbal umii a Nzam, abun Klistɔ kàkü wà bunàbun.