1 Atɔŋ, isàkal naa umwɛy uboo a bɛ kan’kyer ibii, wɛy bɛ aŋin’kyɛɛl lun’suub unsà làbɔ̈ɔ̈n lanswà. Kal kà igyɛɛŋ: nkye ngye sye akwe anki abü unsà ndɛb? 2 Làsɛɛn buur abɛ bɛ a bɛ, abun bɛ làsàkwey un’kɔɔn a Klistɔ. 3 Ntɔn, mbuur usàsi naa nde wà mbuur a mfun, kyekà nde wà ipfal, nde kan’kur nde ŋakwo. 4 Wɛy mbuur mbuur usyeebà isal ande ŋakwo. Isàkal naa nde aswaŋ ngaal ntɔn kya, nde ya aswaŋ ntɔn nde mpɛl, wɛɛ kà ntɔn mbuur asin anki. 5 Ntɔn mbuur mbuur asàtööm buur ande, nde ŋakwo.

6 Wɛy mbuur awà ban’lɔŋ Ndaa, upɛ ndam a indiir ande byanswà akà un’lɔɔŋ ande.

7 Twon lan’kur bɛ ŋakwo: Nzam ufàkyey anki naa bun’sɛ. Mbuur wanswà asàbwo indiir kàkön nde. 8 Mbuur afàkɔn ntɔn ndür ande ŋakwo, asàbwo sye bya ifàbɔr ndür: mbɔ̈ɔ̈n. Mbuur afàkɔn ntɔn Dweelà, asàbwo bya ufàbɔr Dweelà: mɔ̈ɔ̈ a mbul a in’tye. 9 Wɛy bi ikyer ubwaŋ ukɔɔn ayɔn, ntɔn, utaaŋ aŋàbwaŋ, bi ikyer asàbwo, isàkal naa bi iyɔ̈n anki. 10 Abun, ibà bi pà anà taaŋ, wɛy bi ikyer ndaa aŋàbwaŋ ntɔn baar banswà, sin sin baar ibà bi anà ba làkwikilà làmwɛy.

11 Làler isɔn an’köl an’köl bi, mɛ amàlasöön kà an’kɔɔ amɛ ŋakwo. 12 Bye anà baar bàfàkyey uyɔl unsà ndür, ba bà baar bàfàkwen mukàlasiinà a ngwal ntɔn bàlakyɛy. Ba bàkwen anki naa bamɛɛy nkwaaŋ ntɔn kulunsi a Klistɔ. 13 Ntɔn baar nsil aban bàfàkyey naa bakyɛy, ba un’kɔɔn bàfàsyääl anki. Ba bàfàkwen naa bàlakyɛy ntɔn ba bàswɛŋ ngaal ntɔn ndür abɛ. 14 Akà mɛ, ŋaa, ngaal amɛ yà unsà kulunsi a Mwol abi Yɛsu Klistɔ. Ntɔn amu la, mɛɛn màŋàbɛɛrà u kulunsi ntɔn mɛ, asànaa mɛ ntɔn mɛɛn. 15 Kyakin, ndaa a ngwal kà nkyɛɛy anki, itàkal ukɔɔn nkyɛɛy: wɛɛ ndaa a ngwal yà mukal ikyeer akün. 16 Akà baar banswà bàfàsyääl nswɛɛŋ, wɛy duu anà ubwaŋ a Nzam màkäl anà ba, anà udu a Isàlɛl a Nzam.

17 Fà apanà, wɛy mbuur mwɛy ukɔ̈ɔ̈n akamɛɛy an’kyeey, ntɔn mɛ in’we anà inyɛm a Yɛsu u ndür amɛ.

18 Wɛy kab a ngway a Mwol abi Yɛsu Klistɔ làkäl anà dweelà abɛ atɔŋ banswà. Wöwöö.