1 Kàkäl anà ŋukyal mwɛy ikɔb ande Lazar, un’si Bɛtanya, bul a Màlatà anà mpääŋ ande Màlye. 2 - Wawà Màlye akwà kàtsüül Mwol may a usɔŋ anà kun’kɔɔm in’kɔl a ntswe ande. Baal ande Lazar kàkäl anà ukyal. - 3 Abun, ampääŋ abà bàbɔ̈ɔ̈l bàtöm mbuur mwɛy mukàkyään Yɛsu naa: « Mwol, mbuur akwà afàkwen ngye we anà ukyal. » 4 Umpal kàwem Yɛsu làsaŋ alà, nde kàtɛn naa: « Abà kà ukyal akun’syen kà ukwà anki, wɛɛ ba bà ntɔn mupà làkoo akà Nzam: u mbwo a ba, Mwan a Nzam ayàwal làkoo. »

5 Kyekà, Yɛsu kàfakwenà Màlatà, anà mpääŋ ande, anà Lazar. 6 Umpal kàwem nde naa Lazar we anà ukyal, nde kàfàkyer ilä byeel kà ikal kàkäl nde. 7 Ungö apan nde kàtɛn a alɔŋki naa: « Tsweenà ifurà Yuday. » 8 Alɔŋki bun’fuur naa: « Un’lɔɔŋ, itaan a mbɔɔn tɛy, amfum a Ayudà bàleŋà mukatà in’kul, waa ngye akwen mufàfurà kwo? » 9 Yɛsu kàfuur naa: « Nkye an’taaŋ kwem aŋiyweel matɛy u mwäänà? Isàkal naa mbuur wàmuyikyà u mwäänà, nde uböl anki kyà, ntɔn lye anà pɛɛlà. 10 Wɛɛ isàkal naa mbuur wàmuyikyà u làpib, nde atɛbà kyà, ntɔn pɛɛlà latɛy. » 11 Ungö kàtɛn nde ndaa ayi, nde kàkwɛy naa: « Un’sam abi Lazar kàn’bɔ̈ɔ̈n, wɛɛ mɛ in’kyer akyà mukun’wiiy. » 12 Apan, alɔŋki bàtɛn a nde naa: « Mwol, isàkal naa nde wàŋàbɔ̈ɔ̈n, nde akyer ayàwà mɔ̈ɔ̈. » 13 Kutɛn aŋàbwaŋ, Yɛsu kàsam ukwà a Lazar, wɛɛ ba bàsii naa twaal a twaal. 14 Apan, Yɛsu kàtɛn a ba ubwaŋàbwaŋ naa: « Lazar kan’kwà. 15 Mɛ in’wà unsà un’sak ntɔn bɛ in’kɔ̈ɔ̈n akal mɛ kwo, ntɔn bɛ lan’si làkwikilà. Wɛɛ tsweenà akà nde. » 16 Apan, Tuma awà bàfàbel naa Didimɔ, kàtɛn a alɔŋki bumwɛy naa: « Tsweenà, kya ikäl naa ukwà, bi sye ikàkwà mbwo mwɛy anà nde! »

17 Mpal kàyàkɔlà Yɛsu, nde kàwem naa Lazar kàkyàkyer ilä inà kà an’dii. 18 Kyekà, Bɛtanya làkäl tsütsü a Yɛlusàlɛm, kà isii a an’kilɔmɛtre an’tär. 19 Ayudà bàyi mbɔɔn muyàlɛɛl Màlye anà Màlatà ntɔn nkweel a baal aba Lazar. 20 Umpal kàwem Màlatà naa Yɛsu wàmuyà, nde kàkàbwey anà nde, wɛɛ Màlye kàsàsal u ndwà wàŋàbwaay. 21 Màlatà kàtɛn a Yɛsu naa: « Mwol, ilàkal naa ngye akäl apà, baal amɛ kàlàkwà anki! 22 Wɛɛ mɛ, mɛ in’kyàyöb, itàkal apanà, naa undiir wanswà ayàlɔm ngye akà Nzam, Nzam akyer ayapà. » 23 Yɛsu kàtɛn a nde naa: « Baal angye akyer ayàwiyà. » 24 Màlatà kàfuur naa: « Mɛ in’kyàyöb naa nde asàkyer awiyà mbwo mwɛy a akü, kà ilä a ntsüü. » 25 Yɛsu kàtɛn a nde naa: « Mɛ, mɛ in’wà ngwiiyà anà mɔ̈ɔ̈. Mbuur wanswà an’sà làkwikilà amu mɛ asàkal anà mɔ̈ɔ̈, itàkal naa nde kan’kwà. 26 Mbuur wanswà awe anà mɔ̈ɔ̈ anà an’sà làkwikilà amu mɛ, nde usàkwà anki akà ikikye. Nkye ngye an’sà làkwikilà? » - 27 Nde kàfuur naa: « Inye, Mwol, mɛ an’sà làkwikilà naa ngye awà Klistɔ, Mwan a Nzam awasàyà pà u mɛɛn. »

28 Apan, Màlatà kàkàbel mpääŋ ande Màlye, waa kun’kyään unsinsi naa: « Un’lɔɔŋ kan’yà, nde sye wàmukabeelà. » 29 Pa kàwem Màlye abà, laa kàmbarà nde, kàkyen u ntiin akà Yɛsu. 30 Kyekà, Yɛsu kàkäl anki aŋàtàbilà uboo a bul, wɛɛ nde kàtàfàkal kà ikal kàkun’taan Màlatà. 31 Ayudà bàkäl anà Màlye u ndwà ntɔn mukun’lɛɛl, mpal bun’mɛn ba kan’barà anà kan’too u ntiin, laa bun’läb ba. Ntɔn ba bàsii naa nde wàmukyà an’dii mukàlel. 32 Umpal kàkɔlà Màlye kà ikal kàkäl Yɛsu, pa kun’mɛn nde, nde kàbü kà in’kɔl ande, waa kàtɛn a nde naa: « Mwol, ilàkal naa ngye akäl apà, baal amɛ kàlàkwà anki. » 33 Utaaŋ kàmɛn Yɛsu Màlatà anà Ayudà bàkäl anà nde bàmulel, mpem ande yàkyer atɛɛr, lingyoomà làkyer un’wal. 34 Nde waa kafuul naa: « Wa bɛ lun’tɔ̈ɔ̈l ken? » Ba bun’fuur naa: « Mwol, yamɛn. » 35 Yɛsu waa kàlel. 36 Abun, Ayudà bàtɛɛnà naa: « Làler naa nde kàfun’kwenà aben! » 37 Wɛɛ amwɛy uboo a ba bàtɛn naa: « Nde mbuur kàkɔɔr ikwàmii, nkye nde kàlàkyer anki sye naa Lazar ukɔ̈ɔ̈n akwà? »

38 Apan, Yɛsu kàfàtɛɛr u mpem ande, waa kàkyen an’dii, ma màkäl mɔɔ aŋàdübà a nkɔŋ. 39 Apan, Yɛsu kàtɛn naa: « Làlwom nkɔŋ yi. » Màlatà, mpääŋ a un’kü, kàtɛn a nde naa: « Mwol, apanà nde ayàkal aŋàfuurà nsɔŋ, ntɔn ŋàbà ilä inà awà nde apà. » 40 Wɛɛ Yɛsu kun’fuur naa: « Nkye mɛ in’tɛn anki a ngye naa isàkal naa ngye awe anà làkwikilà, ngye ayàman làkoo a Nzam? » 41 Abun, ba waa bàlwom nkɔŋ. Apan, Yɛsu kàler u du, waa kàtɛn naa: « Taa, mɛ amafuur an’tɔɔn ntɔn aman’wem ngye. 42 Ndandaa, mɛ in’kyàyöb naa ngye afàkyer an’wem taaŋ lanswà. Wɛɛ an’tɛn mɛ abà, ntɔn baar bàman’diŋà bà bàyöb naa ngye kan’töm. » 43 Ungö mutɛn abà, nde kàbel u ndaa a ngwal naa: « Lazar, yatoo! » 44 Un’kü sye waa kàyàtoo, in’kɔl anà an’kɔɔ myàŋàlàlal a ikaam a ipfɛy anà ntabwey yàŋàfwe a ipfɛy. Yɛsu kàtɛn a baar naa: « Lun’tsuuŋ, lun’wɛy ukyen. »

45 Apan, bàmbɔɔn uboo a Ayudà bàyi akà Màlye anà bàmɛn indiir kàkyer Yɛsu, ba bun’si làkwikilà. 46 Wɛɛ bumwɛy bàkàman Amfarisi, waa bakyään indiir kàkyer Yɛsu. 47 Apan, amfum a angaŋ anà Amfarisi bàköŋà làbay a nsaŋ a kölàköl, waa bàtɛn naa: « Ininà bi kan’kwo mukyer? Ntɔn baal wà wàmukyer idiim mbɔɔn! 48 Isàkal naa bi kàmuwɛy musin akyer abà, baar banswà bàyun’sà làkwikilà. Apan, Bàlɔmà bàyàyà mupay ndwà a Nzam abi anà nsi abi! » 49 Umwɛy uboo aba, ikɔb ande Kayifa, kàkäl undweer a angaŋ u mbul awun, nde kàtɛn a ba naa: « Bɛ, bɛ akà undiir mwɛy làkayöbà anki! 50 Nkye bɛ làmanà anki naa yubwaŋ naa mbuur mwɛy ukü ntɔn un’sɛŋ, waa nsi yanswà mpa ikyà bwà? » 51 Kyekà, nde kàtɛɛnà anki abà unsà ukwen ande ŋakwo, wɛɛ ntɔn kàkäl nde undweer a ngaŋ u mbul awun, nde kàtɛɛ ngɔɔm naa Yɛsu akyer asàkwà ntɔn un’sɛŋ ande, 52 kànà ntɔn un’sɛŋ mpɛl anki, wɛɛ sye ntɔn mutüüb baan a Nzam abà bàtɛ upay.

53 Fà ilä akin, amfum a Ayudà bàtsül mbar naa bàdwa Yɛsu. 54 Undiir awun, Yɛsu mpa kàfàfilyaaŋà nde kà imɛɛy u mii a amfum a Ayudà: nde kàkyen u mpey, kà itiir a nsi mwɛy tsütsü a nsye a ipɔl, u bul mwɛy ikɔb a la Ɛfalayimi, waa kàbwaay kwo anà alɔŋki ande.

55 Un’kyɔm a Pak a Ayudà kàkäl tsütsü. Baar mbɔɔn bàfwee kà itiir a nsi aki bàbeenà Yɛlusàlɛm kusà a un’kyɔm mukwo, ntɔn mukàpöŋ ndür. 56 Ba bàkäl muleŋà Yɛsu, wɛɛ umpal bàkäl ba u Ndwà a Nzam, ba bàtɛɛnà ba a ba naa: « Bɛ làsii aben? Nkye nde uyà anki un’kyɔm? » 57 Kyekà, andweer a angaŋ anà Amfarisi bàpɛ nswɛɛŋ naa: isàkal naa mbuur kan’yöb ikal awà nde, nde kakyään ntɔn ba bun’kör.