1 Yàmɛnà naa kusà a un’kyɔm a Pak, Yɛsu kàkyer ayöb naa taaŋ ande lan’kwo, taaŋ ntɔn mulwomà u mɛɛn pà anà mukyà akà Taa. Nde kàkwen bànde abà u mɛɛn pà, nde kakwen aŋàsöönà. 2 Kyekà, umpal bàkäl ba mudyà làsisye, ileŋ kàkyàbiil itaan an’kyän u mpem a Yudasi, mwan a Simɔn Isikalyɔt, ntɔn mukun’yälà. 3 Yɛsu kàyöbà naa indiir byanswà Taa kàpɛ kà an’kɔɔ ande, naa nde kàtoo amu Nzam, nde wàmufurà akà Nzam. 4 Yɛsu kàmbarà u mɛsà, kàlwom ipfey adu ande, waa kàwɛl làpye, kàbäm la u lɔŋ. 5 Ungö, nde kàsi an’dà u làlɔŋà, waa kàsɛmà muywɛy in’kɔl a alɔŋki ande, waa kàkɔɔmà mya a làpye kàbäm nde u lɔŋ. 6 Apan, kan’yàtol nde akà Simɔn Petɔlà, nde waa utɛn a nde naa: « Mwol, ngye, an’ywɛy in’kɔl! » 7 Yɛsu waa kun’fuur naa: « Undiir in’kyer mɛ wà, ngye wa ayöb anki apanà, wɛɛ ngye wa asàyöb ungö. » 8 Petɔlà kàtɛn a nde naa: « Aay, ngye mɛ in’kɔl an’ywɛy anki akà ikikye! » Yɛsu kun’fuur naa: « Isàkal naa mɛ mya aywɛy anki, ngye un’tüüb anà mɛ watɛy. » 9 Simɔn Petɔlà kàtɛn a nde naa: « Mwol, isàkal abwɛy, twon aman’ywɛy nà in’kɔl mpɛl, wɛɛ anà an’kɔɔ anà un’tswe sye! » 10 Yɛsu kàtɛn a nde naa: « Mbuur aŋàywab, nde mfun afàywab yatɛy, ntɔn ndür ande yanswà yàŋàpɔŋà. Bɛ, bɛ làbà aŋàpɔŋà, wɛɛ kà bɛ banswà anki. » 11 Nde kàkyer ayöb ubwaŋàbwaŋ naa nà kàlun’yälà, undiir awun kàtɛn nde naa: « Kà bɛ banswà anki làbà aŋàpɔŋà. »

12 Ungö kaywɛy nde in’kɔl, Yɛsu kàfàbwaar ipfɛy adu ande, nde kàfurà u mɛsà, waa kàtɛn a ba naa: « Nkye bɛ lan’yöb undiir amàlakyer mɛ? 13 Bɛ, bɛ làfan’bel "Un’lɔɔŋ" anà "Mwol", bɛ làbye anà iböŋ, ntɔn mɛ in’wà nde. 14 Abun, isàkal naa mɛ Mwol anà Un’lɔɔŋ, mɛ amàlaywɛy in’kɔl, wɛy bɛ, bɛ sye làywɛy in’kɔl bɛ a bɛ. 15 Mɛ amàlapà mbaan, ntɔn bɛ sye làkyer asànaa amàlakyer mɛ là. 16 Ndandaa, ndandaa, mɛ alàkyään: un’syääl ukwe anki ulyaaŋ nkum ande, itàkal naa ntööm ulyaaŋ mbuur kun’töm. 17 Isàkal naa bɛ lan’yöb indiir abi, bɛ làbà aŋun’sak isàkal naa bɛ lan’syääl bya. 18 Mɛ, mɛ in’tɛn anki ntɔn bɛ banswà, ntɔn mɛ in’kyàyöb baar kàsɔ̈ɔ̈l mɛ. Wɛɛ, wɛy Ndaa Aŋàsɔn ikwe: "Mbuur kàdyee làmpà anà mɛ, kàman’diŋà làkɔl mbaar." 19 Apanà, mɛ amàlakyään kusà a ndaa ayi muyà, ntɔn, umpal iyàyà ya, waa bɛ làyàsà làkwikilà naa "Mɛ In’wà". 20 Ndandaa, ndandaa mɛ alàsam: mbuur wanswà awal mbuur an’tɔm mɛ, nde kàman’wal sye. Mbuur kàman’wal, nde kan’wal sye mbuur kan’töm. »

21 Ungö mutɛn indiir abi, mpem a Yɛsu kàkyer ayɔɔ, waa kàtɛ imbäl ki: « Ndandaa, ndandaa mɛ alàkyään, umwɛy uboo abɛ akyer ayan’yälà. » 22 Apan, alɔŋki bàleerà ba a ba u mii, ukɔɔn ayöb naa nde atɛɛnà ntɔn nà. 23 Umwɛy uboo a alɔŋki, awà kàfakweenà Yɛsu, kàkäl ukɔl a nde. 24 Apan, Simɔn Petɔlà kun’bɛl imbweer: « Un’fuul, nde atɛɛnà ntɔn nà. » 25 Ungö, un’lɔŋki awà kàkàyiir kà itɔl a Yɛsu, waa kun’fuul naa: « Mwol, nà wa? » 26 Yɛsu kàfuur naa: « Mbuur awà in’yàpà mɛ itiir a làmpà in’yàdümà mɛ. » Apan sye, Yɛsu kàwɛl itiir a làmpà, kàdümà kya, waa kàpɛ kya akà Yudasi, mwan a Simɔn Isikalyɔt. 27 Pa kàyä Yudasi itiir a mampà kya, Satanà laa kun’bilà nde. Yɛsu kàtɛn a nde naa: « Yudasi, undiir awà ngye awà mukyer, kyer wa agyägyä! » 28 Baar bàkäl u mɛsà bàyöb anki, akà mbuur mwɛy, naa ntɔn nkye Yɛsu kun’kyään nde abwɛy. 29 Bàmbɔɔn bàsii naa ntɔn bɔ̈ɔ̈n a ngim làkälà a Yudasi, undiir awun Yɛsu kun’swɛŋ nde naa nde ukyen mukàsom indiir byàkäl mfun ntɔn un’kyɔm, itàkal naa mupà an’kab akà aŋàlàmbwà. 30 Pa kàwɛl Yudasi itiir a làmpà, nde kàtoo agyägyä. Làpib làkäl aŋàbwà.

31 Apan, ungö a ntoo a Yudasi, Yɛsu kàtɛn naa: « Apanà, làkoo a Mwan a mbuur lan’mɛnà, làkoo a Nzam sye lan’mɛnà amu nde. 32 [ Isàkal naa làkoo a Nzam lan’mɛnà amu nde, ] itaan a mbɔɔn tɛy, Nzam sye asàmɛɛy làkoo a Mwan amu nde ŋakwo. 33 Baan amɛ, mɛ in’fàsaal anki anà taaŋ mbɔɔn mukal anà bɛ. Bɛ, bɛ làkyer asan’leŋ, asànaa kàtɛn mɛ a amfum a Ayudà: "bɛ, bɛ làkwo anki muyà u mper ayà in’kyà mɛ", mɛ in’tɛn a bɛ sye apanà. 34 Mɛ amàlapà nswɛɛŋ akün: làkäl anà ukwen bɛ a bɛ. Asànaa kàlakwen mɛ, wɛy bɛ sye làkäl anà ukwen bɛ a bɛ. 35 Isàkal naa bɛ lan’kwen bɛ a bɛ, apan, baar banswà bàsàyöb naa bɛ làbà alɔŋki amɛ. »

36 Simɔn Petɔlà kàfuul Yɛsu naa: « Mwol, ngye ken akyà? » Yɛsu kun’fuur naa: « Apanà, ngye akwo anki muyà mper in’kyà mɛ, wɛɛ ngye asan’lab ungöngö. » 37 Petɔlà naa: « Mwol, ntɔn nkye mpa in’kwo mɛ muyalab apanà? Mɛ, mɛ an’kyey mupà mɔ̈ɔ̈ amɛ ntɔn ngye! » 38 Yɛsu naa: « Akɔɔb mɔ̈ɔ̈ angye ntɔn mɛ! Ndandaa, ndandaa, mɛ akyään, nkɔɔ mwɛy uyàtàkal aŋàbel anki, ayan’tɔn ngye mbalà tär. »